Read Mayangna Matyu 6 Bible Online

Matyu 6 - Mayangna bible

Matyu 6

¹“Manna Papang ayangni nuhni yamnin warkni kidika muih balna muhnina yakat yayamwinih ūk balna kidika talninna yulni manah. Kaput yamtanama kat, Papangmana kisang kau sak kidika warkmana minit manawas karang ki.

²“Kidika bahang, man lawa dukih diawa muihni balna yakat ilp diataman kat, muih balna muhnina yakat yakwi yulwinih, sins dis muihni balna yayamwa kaput Papang yulni sumamalwa ūni balna yakat dawak ta balna yakat bik, muih balna kidika yaklau yamni diyuyulna atninna yulni. Yang lawik barangni manayultayang kidika karak manna warkmana minit kidika dutamana.

³Man lawa muih dukih diawa muihni balna yakat ilp diataman kat, man karak kaltalyang yamniman kidika yakat bik kalyulwinih;

⁴malni kau yamtah. Dawak man Papangma malni kau yamtang kat talwa kidika yaklau man warkma minit kidika mawarang ki.[12]

⁵“Manna mamatna yulta mana kat, sins dis muihni balna kapat laih atwinih, Papang yulni sumamalwa ūni yakat dawak muih kalududuhwa pāni sipintang yakat yaklauwi minitna yuyulwa kidika muih balna ditalna atnin yulni manah. Yang lawik barangni manayultayang kidika karak manna warkmana minit kidika dutamana.

⁶Kaunah man, mamat yulta man kat, payahtaman pāni yakat awa dūr putta Papangma man karak sak kidika yakat mamat yultah. Dawak Papangma di malnikau yamtangkat matalwa kidika yaklau warkma minit kidika mawarang.

⁷“Dawak mamat yulta man yakat yul dauh balna kidika lamwi yulwinih, Papang yakat kukulwas muihni balna yayamwa kaput, witingna mahni yuyulwarang kat Papang yaklau baisa didakawarang ti kukulwa kidika.

⁸Manna laih witingna kapat atwinih, kat manna Papangmana laih baisa kalyultas mana kau nuki manna ais dukih manawa kidika.

⁹Manna laih aput mamatna yulnamna ki: ‘Mayang maPapangki kisang kau sakman kidika, man ayangma laih holi kulna kidika.

¹⁰Man king āwaman sauni kidika kaiwang. Man kulnam lani kidika sau akat yamtah, kisang yakat yamtaman kaput.

¹¹Warmani kasnikna dini dukih yanawa kidika yanatah.

¹²Yangna dutni yamnayangna kidika datang kat diswang, sihm yangna lawik dutnina datiningkat disna kaput dutni yanayayamna muihni balna yakat.

¹³Matraikitalnin pas yakat maiāwinih, kaunah dutni kidika kaupak mailaihta yaktah.’[13]

¹⁴“Kat manna lawa dutni manayayamna muihni balna yakat dutnina kidika datanangkat diswarang kat, manna Papangmana kisang kau sak kidika yaklau manna dutmana kidika bik dawak diswarang;

¹⁵Kaunah manna lawa ūk balna dutnina kidika datanang kat diswas karang laih, Papangmana yaklauwi bik manna dutmana kidika dawak diswas karang ki.

¹⁶“Manna di kastas yuh wauhtamana kat, muhmana kidika kulnamna bukna kapat laih atwinih, sihm sins dis muihni balna kapat, kulninna bukna kapat yayamwa kidika muih balna yaklau yuh wawauhwi diatnin yulni. Barangni manayultayang kidika karak manna uman warkmana minit dutamana.

¹⁷Man, di kastas yuh wauhma kat, muhma kidika suhta dima balna kidika yamni kalyamtah,

¹⁸muih balna kidika amanglaninna awas yulni man yuh wauhtaman kidika. Man Papangma karak raumana kidika manah amanglawarang ki, dawak witing yaklau man warkma minit kidika mawarang ki.

¹⁹“Manna sau akat dimana balna kidika ududuhwinih, banibil kaswa kidika dawak di balna didiswa kidika dawak bik di malyang muihni balna kawi di mamalwa kidika.

²⁰Nawatkauh laih makau kisang yakat dimana balna kidika uduhtanauh, banibil kaswas kidika dawak di balna didiswas kidika dawak di malyang muihni balna bik kawi di mamalwas kidika.

²¹Bahang angkat man dima sak karang kidika, kidika yakat man ismang kidika sak karang.

²²“Mamikpa balna kidika laih sihm mamuihki nuhni awasni kapat ki; kaput bahang, man mamakpa balna kidika yayamni kat, man muihma nuhni kidika bitik laih yaringni karang;

²³kaunah man mamakpa balna kidika dudutni laih, man muihni nuhni kidika bitik laih puksani karang. Dawak man muihma yakat yaringni dutaman kidika puksani laih, ¡puksani kidika laih ampus palni puksani karang yah!

²⁴“Muih as bik sip daniwan bu dini yamwas ki, kat as kidika yakat dutni kalkulwi dawak ūk kidika yakat laih yamni kalkulwarang bahang, kidik awas bik as yakat barangni karang dawak ūk yakat laih dutni kalyamwarang bahang. Papang yakat dawak sau ritsni balna kidika karak libitdi sip warkni yamdas ki.

²⁵“Kaput bahang yang lawik manna yakat manayultayang: Manna kulwi kalbabauwinih kasta dawak dita sangka atnamna kidika yulni, dawak asna āwanamna kidika yulni bik kulwi kalbabauwinih. ¿Man sangmaka kidika kauh tanit nuhni awasyah kasnin dini kidika karak dawak muihma nuhni kidika kauh tanit nuhni awasyah asna kidika karak?

²⁶Manna talnauh di lawani balna wing yakat awawaihwa kidika: di dahwi minik yayakwas ki dawak di minik balna kidika di punin ūni balna yakat bik pupuwaski; kaput kaunah, manna laih Papangmana kisang kau sak kidika kaupak kasnin dini manawi. ¡Dawak manna laih di lawani balna kidika karak baisa nunuhni mana!

²⁷Kaput bik, muih as yaklau uba palni kulwi kalbauwarang bik, ¿witing sangnika kidika amput dawi naini yamwarangyah awar as yakat?[14]

²⁸“¿Dawak ais yulni manna asna yulni kulta kalbautamanah? Yamni talnauh di dahnin pāni balna yakat amput dipulu balna bararakwa kidika: wark kalalahwas ki dawak kaninna dini bik bibiwaski.

²⁹Kaput kaunah, manna yakat manayultayang king Salomón kat bik, asnina yamni kidika balna kapat kāwasdai.

³⁰Bahang dibasta di dahnin pāni yakat sak kidika dawak yahan mani kat di busnin pāni yakat busyamwarang kidika yakat Papang yaklau kaput yamni kalyamwa kat, ¡manna rahm kulnin lani kultas muihni mana yakat laih rahmni bitik duwi asmanana mana ānakarang ki!

³¹Kaput bahang manna aput yulta kulwi kalbabauwinih: ‘¿Ais kasdarangyah?’ kidik awaskat ‘¿Ais didarangyah?’ kidik awaskat ‘¿Ais kau asna mahawarangyah?’

³²Adika dini balna kuduh yaklau yayamwakat Papang yakat kukulwas muihni balna kulwi kalbabauwa kidika, kaunah manna laih Papangmana as kisang yakat dutamana kidika witing nuki manna ais dini dukih manawa kidika.

³³Kaput bahang, manna Papang king kawa sauni yakat yamni dakanauh Papang ais yamnin yulwa kidika, dawak manna laih adika dini balna bik bitik dutanama.

³⁴Manna yahan mani dini kidika yulni kulwi kalbabauwinih, kat yahan mani laih ma sak karang ki kulwi kalbauna atnin yulni. Ma balna bitik kidika laih witing silp tranibil balna mahni palni kidika duwi.