Read Mayangna Matyu 7 Bible Online

Matyu 7 - Mayangna bible

Matyu 7

¹“Manna muih ūk lani kidika yulwi yayamwinih, Papang yaklau manna yakat lamana yamnin awas yulni.

²Bahang manna lawa muih ūk balna yakat amput lanina yamtamana kat Papang yaklau kaput lamana yamna karang ki; dawak ais kau kulta talnama kat, Papang yaklau bik kidika kau manakulwi talna karang.

³¿Ais yulni man wirahma minikpa yakat dibasta kana kidika talamanh, man mamakpa yakat pan sar as kana kidika laih talas data?

⁴Dawak man palni mamakpa yakat pan sar as dutaman kat, ¿amput man wirahma yakat kalyulmayah: ‘Yatang kat mamakpa kau dibasta kana kidika yakkuh’?

⁵¡Sins dis muihni!, man mamakpa yakat pan sar kana kidika tatuna yaktah, dawak kaput laih man yaknam sip karang man wirahma minikpa yakat dibasta kana kidika.

⁶“Papang dini yakna balna kidika sul balna yakat diayawinih, manna namangna kauh yaklauwi mana kasninna awas yulni. Dawak manna kimanapala yaringni minit nunuhni balna kidika kusih balna yakat ruruhmwinih, atakninna awas yulni.

⁷“Manna yultanauh dawak Papang yaklau manawang; waltanauh dawak yaktanama; dūr yakat yultanauh dawak apahna karang.

⁸Kat yulwa muihni kidika laih duwi; dawak walwa muihni kidika laih yakwi; dawak dūr yakat yulwa kidika laih apahwi.

⁹“¿Ais manna kaupak as sip katpah walanibis yaklau plawar busna yulwakat kipala kalana atnin?

¹⁰¿Kidik awasbik waspa dini yulwakat bil kalana atnin?

¹¹Bahang manna dutni muihni mana kidika, walamanabis balna yakat di yayamni balna manah diata mana kat, ¡manna Papangmana kisang kau sak kidika yaklau ampus palni di yayamni diawarangyah kalyuyulwa muihni balna yakat!

¹²“Kaput bahang, manna muih balna yakat yamtanauh ūk balna yaklau manna yakat manayamna atnin kultamana kaput; kat adika kuduh lā yaklau dawak prapit balna uhulna yakat bik yamnin yuyulwa kidika.

¹³“Dūr dibin munah awanauh. Kat disnin dūrni dawak tani kidika balna laih pirihta nunuhni ki dawak ahni panunuhni ki, dawak muih balna mahni bik kidika balna yakut kakawi;

¹⁴kaunah sangka atnin dūrni dawak tani kidika laih dibinina ki dawak bik kanin dadasni ki, dawak muih bulah palni walwi yayakwi.

¹⁵“Manna amung talnauh alas yulyang muihni balna Papang yulni yulnin kukulwa kidika yakat. Witingna laih sīp kapat kalwi manna yakat aiwi, kaunah kulninna pasyakat laih sihm nawah pauni anyang balna kapat ki.

¹⁶Manna amanglanamna sip ki witingna di yayamwa balna kidika munah, kat wain dawak ani damni minik balna kidika wakal balna paskaupak minik yayakwas ki.

¹⁷Kaput bahang, pan yayamni balna bitik kidika minik yayamni manah yayakwi, kaunah pan dutni kidika laih minik bik dutni yakwi.

¹⁸Pan yamni kidika laih sip minit dutni yakwas ki, dawak pan dutni bik sip minik yamni yakwas ki.

¹⁹Pan dudutni minik yamni yayakwas balna kidika laih, dakwi kuh yakat ruhmwi.

²⁰Kaput bahang manna amanglatanama witingna di yayamwa balna kidika karak.

²¹“ ‘Dawan, Dawan’ yatwa muihni balna bitik kidika, Papang king kawa sauni yakat kakawas karang ki, kaunah yang Papangki kisang kau sak kidika yakat kulnin lani yayamwa muihni balna kidika manah kakawarang ki.

²²Kidika mani yakat muih mahni palni yayuyulwarang: ‘Dawan, Dawan, man yulma kidika yulnamayang dai dawak man ayangma kau spirit dudutni balna kang'yaknayangna dai dawak man ayangma kau bik taldas dini balna mahni palni yamnayangna dai.’

²³Kaunah yang lawik nangnitnalanayang karang: ‘Wat as bik manatalasyang dai; ¡dutni yamyang muihni balna yang kaupak naikau alahwanauh!’

²⁴“Kaput bahang, angdika muihni yang yultayang kidika dakawi yamwarang kat, kidika laih sihm sins duyang alni as kipala minit yakat ūni pakna dai kidika kapat ki.

²⁵Was launa, was balna kidika nunuhni ana dawak wing balna kidika ū yakat laihna; kaunah ū kidika bukwasdai, kat ūni kalni kidika laih kipala minit yakat āna dai kidika yulni.

²⁶Kaunah angdika muihni yang yultayang kidika dakawi yamwas kidika laih, kidika laih sihm muih al as sins dis kauhmak minit yakat ūni pakna dai kidika kapat ki.

²⁷Was launa, was balna kidika nunuhni ana, wing pararasni wauhna dawak ū kidika laih sau yakat bukna dai. ¡Daukalna nuhni palni dai!”

²⁸Jisas yulbauwi dana mani kat, muih balna bitik kidika yamni tatalna dai witing amput sumalwa kidika,

²⁹kat witing laih parasni bitik karuk yamwadai kidika yulni, lā sumalniyang balna yayamwadai kidika kaput laih awas.