Read Mayangna Mark 13 Bible Online

Mark 13 - Mayangna bible

Mark 13

¹Jisas witing makat yulnin ūni kaupak kalahwakat, disainipil balna kaupak as yaklau kalyulna: —¡Sumalyang, talah kipala balna dawak ū balna bik nunuhni kidika!

²Jisas yaklau nangnitlana: —¿Man adika ū nunuhni balna talamahn? Bahang kidika ūni balna yakat kipala as bik kipala ūk minityakat watwas karangki. Bitik palni laih daukalna karangki.

³Usnit kat Olib asangni yakat uina, makat yulnin ūni muhnitkau sakdai kidika. Jisas laih yalahna, dawak Pita, Jims, Jan dawak Andru kauna ahni naikau witingna manah kalahwi Jisas yakat kalyulwi dakakana

⁴mampat mani adika dini kalahwarangpa dawak bik angdika sainni karangpa adika dini balna kalahwarang mani kat.

⁵Jisas yaklau nangnitnalana: “Manna amung talnauh muih as bik alas manayulnin awaski.

⁶Kat muih mahni palni yang ayangki kau duwi aiwarang ki. Aput yuyulwarang: ‘Yang kuduh’, dawak muih mahni yakat alas diyuyulna karang.

⁷“Manna akauh akauh bik war yulni dakanama mani kat, muihsak dadauwinih. Kaput kalahnin mani karangki; kaunah baisa ma witni mani awas karangki.

⁸Kat nisan as kidika nisan ūk niningyakat kalbauwarang ki dawak sau as kidika sau ūk niningyakat kalbauwarang ki; dawak pa balna mahni yakat sau isihwarang ki, dawak yuh lakwarang ki. Kidika laih waralaihtakat dalani wauhnin balna kidika kalahwa karangki.

⁹“Manna alas alas muihmana kalmaintalnauh; kat lā muihni balna tingnina yakat mana-ahawarang ki dawak Papang yulni sumamalwa ūni balna yakat bik manawiwisna karangki. Kabamint muihni balna dawak king balna muhnina yakat bik manaduwi uina karang yang yulki; kaupak laih witingna muhnina yakat yang yulki kidika yultanama.

¹⁰Bahang ma witni kawas tanitkauh yakat laihwi yaknin yulni kidika nisan balna bitik yakat diyulna karangki.

¹¹Dawak manna kulwi kalbabauwinih ais yulnamna kidika la yamyang balna tingnina yakat mana-ahawakat. Kidika minitni yakat Papang ais yulnin manawa kidika yultanauh, kat yultanama kidika laih manna awas karangki, kaunah kidika laih Spirit Holi karangki.

¹²Kalwirah balna kidika laih wirahnina ūk balna kidika daunin tingni yakat ahana karang, dawak papang balna kidika laih walaninabis ahal balna kidika daunin tingni yakat ahana karang; dawak walabis ahal balna kidika laih papangnina niningyakat yaklawi ihina karang.

¹³Muih bitik manna yakat dutni manakukulwarang yang yulki; kaunah angdika muihni kat barangni laihwi duwarang kidika laih witni mani kat, kallaihwi yakna karangki.

¹⁴“Manna rispik lani dis yamadangni kidika sak-atnin pāni awas yakat sakkat talnama mani kat, (yulwi talwa muihni kidika amanglawang), Bahang Judea yakat bangkarang muihni balna kidika, asang yakat kikirarang muihni balna kidika;

¹⁵dawak angdika muihni kat ūni tuna yakat sakkarang kidika, yaklakwi ūni pas kaupak di as bik yakwas kawang;

¹⁶dawak angdika muihni di dahnin pāni yakat sakkarang kidika laih, nawatwi kaiwi asnina kat bik dulauwas kawang.

¹⁷¡Muih yayal balna laih miniknakun palni kidika mani balna yakat muihkaruk dawak muih binina ta susuwa kauna duduwa karang kidika laih!

¹⁸Manna Papang yakat kalyultanauh adika dini wasma yakat kalahnin awas,

¹⁹kat kidika mani balna laih dalani wauhnin mani balna karang Papang sau yamna kaupak wat as bik kalahwas kapat, dawak usnitkauh bik kalahwas karangki.

²⁰Dawak Dawan yaklau kidika mani parahni yamwaskat muih as bik laihwi yaknin kidika duwas karang; kaunah witing parahni yamna, witing dini balna kidika dalani talwa yulni parahni yamna.

²¹“Bahang manna yakat muih as yaklau aput manayulwarang kat: ‘Talnauh, akat sakki Mesías’, kidik awaskat ‘Talnauh yakat sakki’, manna rahm kalkukulwinih.

²²Bahang Mesías dauh dawak Prapit dauh balna aiwarang ki; dawak witingna laih sain balna dawak taldas dini balna bik yayamwarangki, muih balna yakat alas diyulna atnin, rahm yamna atnin dawak Papang yaklau walwi yakna balna kidika yakat bik kaput diyayamwarang.

²³¡Manna amung talnauh! Yang manna yakat adika dini balna bitik kidika uman muhnilaukau manayulnayang.

²⁴“Kaunah kidika mani balna yakat, dalani wauhnin mani balna kidika bayakwarang usnit kat, ma kidika laih puksani lakwarang ki, waiku kidika bik yaringni dis dawarangki,

²⁵yala balna kidika kisang kaupak bubukwarang dawak makau kisang parasni balna kidika laih isihwarang.

²⁶Kaput dawakat muih Walanibis al kidika mukus balna yakat parasni nuhni karuk dawak alasnina yaksihni karuk bik kaiwarangki.

²⁷Witing yaklau innisal balna yakat pakwakat sau sutni arungka yakat witing dini walwi yakna balna kidika ududuhwarang ki, sau bangni witni kaupak kisang bangni witni kat.

²⁸“Ani damni panan yulni adika kulnamna yakat āta dutanauh: Tingni balna kidika batatani kalwakat, basni balna kidika kalahwi, manna amanglatamana madaihnin mani kidika laih ulis kidika.

²⁹Sihm kaput bik, manna talnang kat adika dini balna kalahwakat, amanglatanauh muih Walanibis al kidika laih uman dūr yakat kidika.

³⁰Barangni manayultayang adika dini balna bitik kalahwarang ki warmani muihni balna kidika dadauwas tanitkauh yakat.

³¹Kisang dawak sau kidika laih dis kakalwarang ki, kaunah yang yulki kidika laih kaput kalahwarang ki.

³²“Kaunah kidika mani dawak awarni kidika laih, muih as bik amanglawaski, kisang innisal balna dawak walanibis al kat bik amanglawaski. Witing Papangni manah amanglawi.

³³“Kaput bahang, manna sahmuhni tahata talnauh,[19] kat manna amanglatasmana mampat kat kidika mani kiwi kawarangpa.

³⁴Adika laih sihm muih al as kat, sau ūk kau kiwarang sakkauna, witing ūni kidika dini yamyang balna yakat maintalnin diyulwa kidika kapatki. Dini yamyang balna muihnina kat kat wark yamnin diawi, dawak dūr maintalyang yakat tahawi talnin pakwi.

³⁵Kaput bahang, manna sahmuhni bang-awanauh, kat manna amanglatasmana ū dawan kidika mampat kaiwarangpa, masan, pukpapus kat, payahlawarah kat kidik awaskat mapiris kaiwarangpa;

³⁶kaunah kaldakas amabangmana kat kaiwi manatalnin awaski.

³⁷Manna yakat manayultayang yulni kidika sihm muih bitik yakat diyultayang: “¡Sahmuhni bang-awanauh!”