Read Mayangna Mark 14 Bible Online

Mark 14 - Mayangna bible

Mark 14

¹Baisa ma bu kiwi kawas tanitkauh kidika yakat insal kaiwi bayakna alasnina mani kidika dai, plawar pupuhnin dini dis busna kasnin mani kidika. Sumalyang balna taninatuna balna dawak la sumalniyang balna kidika kauna kalpakwi Jisas yakat laihwi inin wawalwadai yul alas munah.

²Bahang buas laih yuyulwadai: —Dikah kasnin alasnina mani yakat laihnin, muih balna kidika kiri yaklauwas atninna.

³Jisas laih Betania yakat kiunadai, Saiman lipar muihni kalatwadai kidika ūni yakat; witing laih tibil yakat yalahna sakkat, muih yal as kiwi kanadai yal kidika laih, punin dini pihni kau, dipulu kaupak kahnin dini walapni yakna kidika, minit nuhni dai bahang duwi kiwi Jisas tunan yakat utuhna.

⁴Kidika yakat muih buas bangdai kidika laih kulninna daukalwi aput yuyulna: —¿Ais yamwi di walapni kidika dauh utuhwih?

⁵Witing sipdai lalah 300 minit bakanpamwi muih miniknakunni balna yakat ilp diana atnin. Dawak kidika yal yakat niningkauh yuyulna dai.

⁶Kaunah Jisas yaklau yulna: —Datanauh; ¿ais yulni ustamanah? Aput yayamna adika laih yamniki.

⁷Bahang muih miniknakunni balna kidika laih manna pasmangna yakat ban dutanama ki, dawak bik witingna yamni kidika dukih diawakat sipki yamni diyamnamna; kaunah yang laih man pasmangna yakat ban yadutas awanamaki.

⁸Adika yal laih witing ais yamnin sipdai kidika yakat yamna: yang muihki nuhni kidika baisa tanit kau kahnin dini walapni kidika kahna sau ū yakat yanunuwarang kidika yulni.

⁹Barangni manayultayang sau angkat angkat laihwi yaknin yulni sumamalwarang kidika, adika yal ais yamna kidika bik yuyulwarang ki, dawak kaput laih ma-isingkatna karang.

¹⁰Judas Iscariote, disaipil 12 balna kidika kaupak as kidika yaklau, sumalyang balna taninatuna balna yakat kiuna dai Jisas kidika witingna tingnina yakat āna atnin.

¹¹Kidika yulni dakakana kat, witingna alasna kaldakakana dawak pramis kalalahna dai Judas yakat lalah kalana atnin, dawak Judas laih amput dawi Jisas kidika sumalyang balna taninatuna balna tingnina yakat ānin kidika walna dai.

¹²Kasnin alasnina ma tatuna yakat plawar pupuhnin dini dis busna kakaswadai kidika, dawak insal kaiwi bayakna mani sīp kurih as laihna kat sakripais yayamwadai kidika yakat, Jisas disainipil balna yaklau kalyulwi dakakana: —¿Angdika pāni yakat yangna yawik insal kaiwi bayakna mani masan kasnin dini kidika yamnikna dukih mawih?

¹³Bahang witing disainipil balna paskaupak bu yakwi sihna, aput diyulwi: —Manna tawan nuhni yakat yawanauh. Kidika yakat muih al as was butnin dini as kau was butwi kiwalik kat kalpaktanama; dawak usnit uita yawanama,

¹⁴dawak angkat kawarang kidika yakat, ū dawan yakat kalyultanama: ‘Sumalyang yaklau yulwi dakawi: ¿Angdika ūni paskau daklana yakat yang disaikipil balna karak insal kaiwi bayakna mani masan kasnin dini kidika kastanakiyah?’

¹⁵Witing yaklau ū makau yakat daklana as nuhni dawak bik yamni as namangnakawarang. Kidika yakat mayang masan kasnin dini kidika yamtanama.

¹⁶Disaipil balna kidika laih kalahwi tawan nuhni yakat uina dai. Witingna laih Jisas yaklau amput diyulna dai kidika kaput kalpapakna, dawak kidika yakat insal kaiwi bayakna mani masan kasnin dini kidika yayamna dai.

¹⁷Ma puklakwa yakat Jisas disainipil balna 12 kidika karak uiwi kakanadai.

¹⁸Witingna tibil yakat di kaswabangkat, Jisas yaklau aput diyulna: —Barangni manayultayang manna kaupak as, yang karak di kaswa kidika yaklau, malni kau yaīwarangki.

¹⁹Witingna laih kulninna bukna dai, dawak as as kalahwi Jisas yakat kalyulwi dakakana: —¿Yang yah?

²⁰Jisas yaklau nangnitnalana: —12 balna kidika kaupak as, yang di kastayang dini yakat plawar busna suihwi kaswa kidika ki.

²¹Muih Walanibis al kidika laih ta yakat lapakwarang ki ulna balna yakat yuyulwa kidika; kaunah ¡minikun palni angdika muihni yaklau malni kau īwa kidika! Witing niningyakat yamni dai batahnwas dai kat.

²²Witingna laih di kaswabangkat, Jisas tingni yakat plawar busna kidika duwi Papang yakat tingkih kalana usnit kat, bahwi disainipil balna yakat diana, aput diyulwi: —Dutanauh, adika ki yang muihki nuhni.

²³Usnit kat tingni yakat sutak as duwi, Papang yakat tingkih kalana usnit kat, witingna yakat diawakat bitik didina.

²⁴Jisas yaklau diyulna: —Adika ki yang āki, pramis as[20] barangni yamwa kidika, adika laih sau yakat utuhna muih mahni ilpnina.

²⁵Barangni manayultayang yang wattik wain minik wasni kaupak ditas awaki ki, Papang king kāwa sauni kat laih wain wisam wasni kidika diki ki.

²⁶Salmo balna kidika unbabauna usnit kat, Olib asangni yakat uina dai.

²⁷Jisas yaklau diyulna: —Manna bitik laih yang akat yamni yakultas awanamaki. Ulna balna kidika aput yuyulwi: ‘Sīp maintalyang muihni kidika īki ki, dawak sīp balna kidika laih kalrarawarang ki.’

²⁸Kaunah yang wattik lawaki mani kat, baisa Galilea yakat yawasmana kat yang tatuna yawaki ki.

²⁹Pita yaklau kalyulna: —Ūk balna kidika bitik yamni makukulwas karang bik, yang laih yamni makulki ki.

³⁰Jisas yaklau nangnitlana: —Barangni mayultayang adika puknita, baisa sakara wat bu yulwas kat, man lawa wat bas yatalasyang tima.

³¹Kaunah Pita yaklau baisa baisa kalyulwi dakana dai: —Yang man karak daunik karang bik, matalasyang laih yultas awaki ki. Dawak witingna bitik kaput manah yuyulna dai.

³²Usnit kat pa as ayangni Getsemaní yakat uina dai. Jisas yaklau disainipil balna yakat diyulna: —Manna akat yalahtanauh, yang laih yawik mikit yultayang kat.

³³Dawak Pita, Jims dawak Jan kauna duwi kiuna, dawak witing laih kidika yakat kulnin bukna dai.

³⁴Aput diyulna: —Yang sangkika yakat kulnik bukna kaldakayang daunin yulni. Manna akat watta sahmuhni bang-awanauh.

³⁵Kidika usnit kat Jisas laih baisa apis tanit yakat kiwi abukwi muhni kidika sau yakat sukna, dawak Papang yakat kalyulna, rahm yamna atnin, kidika mani witing dalani kidika dakawas atnin.

³⁶Witing minityulna yakat aput yulna: “Yang Papangki, man namang yakat laih di bitik kidika sipman: adika dinin wasni tapahlni kaupak yalaihta yaktah; kaunah yang dukih yawa kaput laih yamwinih, kaunah man dukih mawa kaput yamtah.”

³⁷Usnit kat witingna bangdai kidika yakat nawatwi kiuna, dawak kakamana bangkat ditalna dai. Pita yakat kalyulna: —Saiman, ¿ama tusmahn? ¿Awar as bik sip sahmuhni sak-awasmandaih?

³⁸Sahmuhni bang-awanauh dawak mamatna yultanauh, kalmana laknamna awas yulni. Manna laih kulnamna kidika yamniki, kaunah muihmana nuhni kidika laih yudutni ki.

³⁹Watwi kiwi sihm yulni balna dai kidika lamwi yulwi minityulna dai.

⁴⁰Nawatwi kaina mani kat, disaipil balna kidika watwi kamabangkat ditalna dai, kat uba palni miniknakauhna dai kidika yulni. Dawak witingna ais nangnitlaninnapa amanglalawasdai.

⁴¹Wat bas yakat nawatwi kaiwi aput diyulna: —¿Manna baisa ama urupdabangmanah? Kamanah aitani ki, muih Walanibis al kidika muih dutni yamyang balna tingnina yakat kanin awarni kidika kaiwi kana.

⁴²Lawanang mawanang; malni kau yaīwa muihni kidika laih kaiwi uliswi.

⁴³Jisas laih baisa yulbauwa sakkat disaipil balna 12 paskaupak as Judas kidika muih mahni kalpakwi kiwi kana, kalbaunin dini isparah dawak pan karuk. Witingna laih sumalyang balna taninatuna balna, la sumalniyang balna dawak muihbararak balna yaklau disisihwak uina dai.

⁴⁴Judas malni kau īyang muihni kidika yaklau sain as diana dai, aput diyulwinah: “Angdika muihni yakat umki kat, kidika karangki; laihta yamni sitta duyawanauh.”

⁴⁵Kaput bahang Jisas yaihnit yakat kiwi kalyulna: —¡Sumalyang! Dawak umna.

⁴⁶Bahang witingna laih Jisas yakat lalaihna.

⁴⁷Kaunah kidika yakat bangdai kidika kaupak as yaklau isniparah yakwi sumalyang nuhni dini yamyang yakat tapani nakas dakna.

⁴⁸Dawak Jisas yaklau muih balna yakat diyulwi dakana: —¿Ais yulni manna isparah dawak pan duta yalaihna aiwanamanah, yang laih sihm dimalyang as yang kapat?

⁴⁹Ma bitik yakat manna pasmangna yakat manasumalnayang dai makat yulnin ūni yakat, dawak wat as bik yalaihtasmana dai. Kauna adika kaput kalahwi, ulna balna yakat yulwa kidika kaput kalahna atnin yulni.

⁵⁰Disaipil balna bitik laih Jisas kidika alas kaldapamwi kikirana dai.

⁵¹Kaunah wahma aslah umuk kau kalsuruhmdana kat Jisas usnit uiwi kiunadai. Kidika wahnima yakat lalaihna,

⁵²kaunah witing laih umuk kidika dapamwi wahdis kiri yaklana dai.

⁵³Bahang Jisas kidika laihwi sumalyang nuhni muhni yakat duwi uina, dawak sumalyang balna taninatuna balna kidika bitik, muihbararak balna kidika dawak la sumalniyang balna kidika bitik kalududuhna dai.

⁵⁴Pita laih nai kaupak usnit uiwi kawi kiunadai sumalyang nuhni ūni watakni kidika yakat, dawak makat yulnin ūni dūrni maintalyang balna karak watwi yalahna dai, kuh yaihnit yakat kuh kalpuihwinah.

⁵⁵Sumalyang balna taninatuna balna dawak la tunan muihni balna karak kalpakwi Jisas alasni as wawalwadai īna atnin; kaunah sip yayakwasdai.

⁵⁶Kat muih mahni kidika Jisas niningkauh alas manah yuyulwadai karang bik, biri biri rahm kalkukulwasdai.

⁵⁷Buas yaklauwi alas yulwi aput yulwi yulni yayakna:

⁵⁸—Yangna dakanayangna witing yaklau aput yulwakat: ‘Yang lawik adika makat yulnin ūni muih balna laihwi yayamna kidika daukalpamki ki, dawak ma bas kat wattik ūk yamki ki muih laihwi yamwas kidika.’

⁵⁹Kaunah kaput bik witingna rahm kukulwasdai muih balna yuyulwa kidika.

⁶⁰Bahang sumalyang nuhni kidika muih balna bangkidika papusyakat yaklauwi Jisas yakat kalyulwi dakana: —¿Man di as bik yultas man? ¿Ais diniyah akat man namangkauh yulwabang adika?

⁶¹Kaunah Jisas laih ap danadai, di as bik yulwas. Sumalyang nuhni kidika yaklau watwi kalyulwi dakana: —¿Man yah Mesías, Papang ayangni nuhni kidika walanibis?

⁶²Jisas yaklau kalyulna: —Agha, yang. Dawak manna talnama muih Walanibis al kidika parasni bitik duwa kidika tingnipal niningyakat yalahwi kisang mukusni balna yakat kaiwakat.

⁶³Bahang sumalyang nuhni kidika prakni balna iswi bisna kulnin daukalna sainni, dawak aput yulna: —¿Mayang ais yulni baisa witnis waldih?

⁶⁴Manna dakanamana Papang niningkauh dutni yulwakat. ¿Ampat talamanah? Witingna bitik laih kulninna aslah kalalahna dai Jisas laih dutni yamna kidika yulni daunin kidika.

⁶⁵Buas balna kidika laih susuihwas tuhwi, minikpa balna taihwi babauna, aput kalyulwinah: —¡Yultah wais mabaunayah! Dawak makat yulnin ūni dūrni maintalyang balna kidika laih muhni yakat babauna dai.

⁶⁶Pita laih sau yakat sakdai, watak yakat. Kidika minitni yakat sumalyang nuhni dini yamyang yayal balna kidika kaupak as kiuna;

⁶⁷dawak Pita kuh yaihnit yakat kuh kalpuihwa sakkidika yakat watwi kaltalwa sakkauna, kalyulna: —Man bik Nazaret kaupak Jisas kidika karak likman dai.

⁶⁸Pita yaklau talasyang kalti, aput kalyulna: —Yang witing yakat amangnilatasyang, amanglatasyang ais yulni yultasakmanpa. Dawak ahni kiwikawa yakat kalahna dai. Bahang wat as sakara yulna dai.

⁶⁹Sumalyang nuhni dini yamyang yal kidika watwi Pita yakat kaltalna, dawak muih ūk balna yakat diyulna: —Adika laih witingna kaupak as ki.

⁷⁰Kaunah witing laih watwi talasyang atna. Kidika usnit kat, kidika yakat muih bangdai kidika balna yaklau watwi Pita yakat kalyuyulna: —Rahm palni man laih witingna kaupak as man. Baisa kidika minityakat man laih Galilea kaupak man.

⁷¹Bahang Pita laih wat wat pramis yamwi, aput yulna: —¡Kidika alni yulni yultamana kidika amangnilatasyang!

⁷²Kidika minitni yakat sakara wat bu yulna dai, dawak Pita laih isningkatna dai Jisas yaklau aput kalyulna dai kidika: ‘Baisa sakara wat bu yulwas kat man lawa wat bas yatalasyang tima.’ Dawak Pita laih kaidana dai.