Read Mayangna Mark 15 Bible Online

Mark 15 - Mayangna bible

Mark 15

¹Kidika payahwakat, sumalyang balna taninatuna balna kidika muihbararak balna, la sumalniyang balna dawak la tunan muihni balna karak kalududuhna dai. dawak Jisas kidika sitwi duwi uiwi Pailat tingni yakat ahana dai.

²Pailat yaklau kalyulwi dakana: —¿Manyah Ju balna kingnina? —Jisas yaklau nangnitlana: Man lawa yultaman kaputki.

³Sumalyang balna taninatuna balna yaklau di mahni kau yulwi yulni yayakwadai bahang,

⁴Pailat yaklau watwi Jisas yakat kalyulwi dakana: —¿Man di as bik nangkitlatasmahn? Talah di yapak karak yulwi yulma yayakwih.

⁵Kaunah Jisas laih nangnitlawasdai; dawak Pailat laih di as bik amanglawasdana dai.

⁶Kasnin alasnina mani yakat, Pailat yaklau silak muihni as kau pri kaldawadai, muih balna yaklau angdika muihni yuyulwarang kidika.

⁷Muih al as ayangni Barrabás kidika silak yakat tusdai, ūk balna muih muhni yakat yaklauwi muih ihina kat bangdai kidika karak aslah bangdai.

⁸Bahang muih balna kidika uiwi kakana, dawak Pailat yakat kalyuyulna witing amput nining yamwa kat kaput yamwi diana atnin.

⁹Pailat yaklau nangnitnalana: —¿Manna dukih manawih Ju balna kingnina kidika pri kaldana atnik?

¹⁰Kat Pailat laih amanglawadai sumalyang balna taninatuna balna kidika tumnin lani yulni Jisas yakat laihwi duwi uiwi witing tingni yakat ahana dai kidika.

¹¹Kaunah sumalyang balna taninatuna balna yaklau muih balna yakat diyulwi kulninna wirlalana dai, Barrabás kidika yuyulwakat pri kaldana atnin.

¹²Pailat yaklau diyulwi dakana: —¿Dawak Ju balna kingnina timana yakat laih ais yamnik kidika dukih manawih?

¹³Witingna yaklau sarahwi nangnitlalana: —¡Pan prihni yakat patah!

¹⁴Pailat yaklau diyulna: —Bahang ¿Ais dutni yamnayah? Kaunah witingna laih watwi yulwi sararahna: —¡Pan prihni yakat ilta patah!

¹⁵Bahang Pailat laih muih balna karak yamni atnin yulni, Barrabás yakat pri kaldana dai; dawak Jisas yakat wisnin dipakna usnit kat, tingnina yakat āna dai pan prihni yakat ilwi pana atninna.

¹⁶Kalbauyang muihni balna kidika laih Jisas kidika duwi uina dai king ūni watak yakat, dawak kalbauyang muihni balna bitik yakat ududuhna dai.

¹⁷Kalmuknin dini pauni sa as kau mumukna dai, dawak tunan yakat laih wakal kraunni kau papakna dai.

¹⁸Usnit kat parasni yulwi sararahna: —¡Ju balna kingnina laih sangka ki!

¹⁹Dawak tunan yakat pan kau wiswi, susuihwas tuhwi dawak witing muhni yakat limbabahwi rispik lani kalyayamwadai.

²⁰Kidika kaput witing yakat sarahni kaltatalna usnit kat, kalmukwa dini pauni sa kat mumukna dai kidika yakpamwi witing prakni dai kidika ahana dawak ahni yakat yayakna dai pan prihni yakat ilwi pana atnin.

²¹Cirene kaupak muih al as ayangni Saiman, Alejandro dawak Rufo karak papangnina, kidika mani di dahnin pāni kaupak kiukana dai. Kidika yakut bayakwakat, taihwi kalyayamna dai Jisas panan prihni kidika trukna atnin.

²²Jisas kidika laih pa as ayangni Gólgota yakat duwi uina dai (kidika wirlana kat: “Tunan wakalni pāni”);

²³dawak wain pan yani walapni karak banawi kalalana dai, kaunah Jisas laih diwas danadai.

²⁴Bahang pan prihni yakat ilwi papana dai. Dawak kalbauyang muihni balna kidika laih suerte ruruhmna dai Jisas prakni kidika biswi duna atnin dawak witingna talnin kukulna dai muihnina kat kat ais duwi uiwarangpa.

²⁵Pan prihni yakat ilwi papana kidika matunaknin manah awar tiaskau arungka dai.

²⁶Dawak ais yulni dauna yulni balna kidika panan prihni minit yakat ulwi papana dai: “Ju balna kingnina.”

²⁷Sihm witing karak aslah dimalyang ahalni bu ilwi papana dai, as kidika laih tingnipal niningyakat dawak ūk kidika laih wadahni niningyakat.[21],

²⁸

²⁹Kidika yakat muih balna bayayakwa kidika yaklau dutni kalyamwi, tunani yakat laihwi isihwi aput kalyuyulwadai: —¡Man, makat yulnin ūni tuklakta ma bas kat watta laihta dulautaman kidika,

³⁰man alas kallaihta yaktah dawak pan prihni kaupak lakwah!

³¹Sumalyang balna taninatuna balna dawak la sumalniyang balna kidika bik sihm kaput sarahni kaltatalwadai. aput yuyulwadai: —Muih ūk balna yakat laih laihwi yakna, kaunah witing alas laih sip kallaihwi yakwaski.

³²¡Mesías Israel kingni kidika pan prihni kaupak yaklakwang, kaput laih mayang taldi rahm kalkuldarang! Dawak witing karak ilwi papana muihni balna kat bik witing yakat dutni kalyuyulwadai.

³³Matunak kiwi kāwa kat, sau bitik kidika puksani lakna dai maulah awar bās kat.

³⁴Sihm kidika awarni yakat, Jisas laih parasni yulwi sarahna: “Eloi, Eloi, ¿lema sabactani?” (wirlana kat: “Yang Papangki, yang Papangki, ¿ais yulni yaruhmta danamahn?”)

³⁵Kidika yakat muih buas bangdai kidika dakawi aput yuyulna: —Dakanauh, Prapit Elías yakat kainin kalyulwi.

³⁶Bahang witingna kaupak as kiri kiwi asna yudutni as duwi wain sapahni kau suihwi pan as kau sitwi Jisas yakat uiwi kalana dina atnin, aput yulwinah: —Datanauh, rahm Elías kaiwi pan prihni kaupak lakwarangpa.

³⁷Kaunah Jisas laih parasni sarahwi dauna dai.

³⁸Dawak makat yulnin ūni asnina kidika laih papustihr biswi kalahna dai, sutni makaupak sutni sau kat.

³⁹Kalbauyang muihni balna taninatuna Jisas muhnityakat sakdai kidika talwakat Jisas dauna kat, aput yulna: —Rahm palni adika alni laih Papang walanibis dai.

⁴⁰Muih yayal balna bik buas nai kaupak talwabangdai; kidika balna pasyakat Mery Makdalin, Jims bin kauh kidika dawak José nanangni Mery dawak Salomé kauna bangdai.

⁴¹Adika yayalni balna laih Jisas usnit uhuina dai dawak bik ilp kalalana dai Galilea yakat sakdai mani. Baisa kidika minityakat yayal ūk balna bik mahni bangdai Jisas karak kalpakwi Jerusalén yakat uina dai kidika balna.

⁴²Ridi yayamwa mani kidika puklakwa yakat, yuldarang kat, yakurupdinin mani[22] masan yakat,

⁴³José, Arimatea kaupak kidika dawak bik la tunan muihni nuhni kalkulna kidika, witing bik Papang king kāwa sauni kidika tahawadai, kulnin aslah duwi Pailat yakat kiwi Jisas muihni nuhni kidika kalanin kalyulna dai.

⁴⁴Pailat witing isning aiwasdai Jisas laih uman dauna kidika, bahang kalbauyang balna taninatuna yakat kalyulwak kaiwakat kalyulwi dakana, Jisas dauna kidika nai ampus dawapa.

⁴⁵Kalbauyang muihni balna taninatuna kidika yaklau kalyulna mani kat, Pailat yaklau Jisas muihni nuhni kidika José yakat kalana dai.

⁴⁶Bahang José laih linin asnina umukni as bakanwi, Jisas muihni nuhni kidika pan prihni kaupak lakwi umuk yakau tulna dai. Usnit kat kipala yakat sauni ū kuhrna kat kidika pasyakat āwi panikungmak kidika kipala as kau taihsakna dai.

⁴⁷Mery Makdalin dawak José nanangni Mery karak, witingna tatalna dai angkat Jisas ahana dai kidika.