Read Mayangna Mark 4 Bible Online

Mark 4 - Mayangna bible

Mark 4

¹Watwi Jisas lakun kungyakat sumalna. Muih mahni kalududuhna dai bahang Jisas laih lakun yakat kuring as witdai kidika yakat kawi yalahna dai dawak muih balna kidika laih lakun kungyakat wawatna dai.

²Bahang witingna di balna mahni kau yulwi disumalna dai malni yulni kau. Kidika disumalwa yakat diyulwadai:

³“Manna adika dakanauh: Di dahyang muihni as kalahwi di dahna.

⁴Dawak dahwa yakat, di minik balna buas kidika tapas yakat bubukna dawak di lawani balna uiwi ukmumukna.

⁵Di minik balna buas kidika laih kipala balna walsah yakat bubukna, sau dis dai kidika yakat; kidika di minik balna kidika laih sirihni palni ukusna dai, kat sau kidika laih tubakni awasdai kidika yulni;

⁶kaunah ma kidika kalahwi buswi kusulamukna dai rikni dis dai bahang.

⁷Di minik ūk balna kidika laih wakal pasyakat bubukna, dawak wakal balna kidika barakwi balakwi imumukna dai, kaput laih di minik kidika minik yakwasdai.

⁸Kaunah di minik ūk balna kidika laih sau yamni yakat bukwi bararakna, dawak minik kidika bik yamni kalahna; di minik balna buas kidika minik as kaupak granos 30 kalahna, ūk balna kidika laih granos 60 kalahna dawak ūk balna laih granos 100 kalahna.”

⁹Dawak Jisas yaklau minitlakwi yulna: “Wais balna tapamana dutamana kidika dakanauh.”

¹⁰Usnit kat, Jisas witing alas watna kat, witing yaihnitkau disainipil balna 12 karak aslah bangkidika yaklauwi kalyulwi dakakana ais as yulnin dukih kalawih kidika malni yulni karak.

¹¹Nangnitnalana: “Manna yakat laih Papang yaklau manayulwi witing king kāwa sauni malni kau sakkidika yulni; kaunah ahni kau bangkidika muihni balna yakat laih di bitik kidika yul malni kau manah diyulna ki,

¹²kaput laih witingna tatalwa bik tatalwas kapat atnin, dawak dakakawarang bik amanglalawas atnin, Papang yakat wiryaklawas atninna dawak bik witing yaklau dutnina dawak diswas atnin.”

¹³Diyulna: “¿Manna adika malni yulni amanglatasmanah? ¿Bahang amput amanglatanamayah ūk balna kidika?

¹⁴Di minik dahwa kidika laih sihm Papang yulni yulwi sumalwa kapatki.

¹⁵Muih bangki sihm di minik ta yakat bubukna kapat muihni balna kidika: yul kidika dakakawi, kaunah dakakawa usnit kat sitan kidika kaiwi didakyakmukwi isningna yakat dadahna yulni balna dai kidika.

¹⁶Ūk balna laih sihm kipala walsah kau bubukna dai kidika kapat ki: yul kidika dakakawi dawak kulninna bitik karak duduwi,

¹⁷kaunah riknina yamni dis yulni, sip barangni awaski; kidika bahang, yul yamni kidika yulni traini talnin yakat bubukwi dawak usnit uinin lani kidika bik wauhwi rahm kulnin lani duduwa kidika dispapamwi.

¹⁸Ūk balna kidika laih sihm di minik wakal pasyakat bubukna kapatki: yul yamni kidika dakakawi,

¹⁹kaunah sau dini balna kidika yaklau diyamwakat uba kulwi kalbabauwi, sau ritsni balna yakat dalani tatalwak alas diyulwi, dawak witingna laih di bitik kidika dukih diawi. Adika dini balna bitik witingna yakat kawi yul yamni kidika balakwi dawak sip dawakat minik kalahwas ki.

²⁰Kaunah muih ūk bangki yul yamni kidika dakawi isningna yakat āwi duduwi, dawak minik yamni yayakwi, sihm di minik sau yamni kau dahna kapat. Adika balna kaupak buas kidika laih sihm minik as kaupak granos 30, granos 60 dawak granos 100 kalalahna kapatki.”

²¹Aput bik diyulna: “¿Ais awas kidika duaiwi baks dinityakat kidika awaskat krikri dinityakat ānin katpah? Dikah, awas kidika laih maluih yakat ilnin dini, ingni duna atnin yulni.

²²Sihm kaput bik, di as bik malna sak-awaski sip lāih yakwas dana atnin, dawak di as bik malni kau sak-awaski sip ahni laih yakat kalahwas atnin.

²³Wais tapamana dutamana kidika dakanauh.”

²⁴Aput bik diyulna: “Yamni talnauh ais dakamana kidika. Ais kau kulta talnama kidika, sihm kidika kau Papang yaklau manna yakat manakulwi talna karang; dawak minityakat baisa bik manana karang.

²⁵Bahang angdika muihni duwa kidika minityakat baisa kalana karang; kaunah angdika muihni di dis kidika laih, ais duwa kidika bitik dakyakna karang.”

²⁶Jisas aput bik yulna: “Papang king kāwa sauni kidika laih sihm muih al as yaklau sau yakat di minik dahwa kapat ki;

²⁷kama kidika dawak sahmuhni sakkidika, pukta dawak madah bik sihm, kapat di minik kidika pitwi kalahwi dawak barakwi, kaunah witing laih amanglawaski di minik kidika amput barakwapa.

²⁸Dawak sau kidika laih witing silp di minik yakwi; tatuna laih ukuswi kalahwa kidika, dawak usnit kat minik yakwa kidika dawak usnit kat minik balna kidika muihni duwi.

²⁹Dawak minik kidika uman dadasna kat bahwi, kat bahnin mani kaikana bahang.”

³⁰Jisas yaklau aput bik yulna: “¿Papang king kāwa lani kidika ais kapātyah kidika awaskat ais karak libitnin sipyah?

³¹Kidika laih sihm mustat minik sau kau dahwa kidika kapat ki. Sau akat di minik balna bitik pasyakat kidika kauh dibin ki,

³²kaunah dahna mani kat, barakwi pan balna bitik pasyakat witing kauh nuhni kalwi, tingni rahni balna kidika nunuhni kalwi kidika dinityakat di lawani balna kidika ūnina yayamwi.”

³³Jisas laih aput disumalwa dai, malni yulni balna mahni karak sihm adika balna apat angkat witingna tanka duninna sip kat.

³⁴Kaunah malni yulni dis, yuldibauwas awasdai, disainipil balna karang bik naikau diyakwi diyulwadai.

³⁵Kidika mani puklakwa yakat, Jisas yaklau disainipil balna yakat diyulna: —Lakun nakas yakat madakmawanang:

³⁶Bahang muih balna kidika damukwi Jisas duwi dak-uina dai kuring as witdai kidika kau; dawak kuring ūk balna bik kalpakwi uina dai.

³⁷Kidika yakat wing as parasni wauhna, was lalamwa balna kidika kuring minityakat manah utuhna, kaput laih kuring kidika was bangilwa dai.

³⁸Kaunah Jisas laih kuring mamahni yakat tun ānin karak tunani āwi kamana dai. Uswi sahmuhwi aput kalyuyulna: —¡Sumalyang! ¿Man kultasmahn, mayang was pasyakat mahamawa kidika?

³⁹Jisas laih yaklauwi wing yakat yamnin kalyulna dawak kuma yakat aput kalyulna: —¡Apdatah! ¡Yakat wattah! Wing kidika laih laihwatna dawak watwi di bitik yamni kalna.

⁴⁰Usnit kat Jisas yaklau disaipil balna yakat diyulna: —¿Ais yulni uba yamadutamanah? ¿Baisa rahm kulnin lani kidika dismanah?

⁴¹Kaunah witingna laih uba palni yamaduduna dai, dawak biri kalyulwi dakakana: —¿Waisyah adika muihni, wing dawak kuma bik yulni dakawa kidika?