Read Mayangna Mark 6 Bible Online

Mark 6 - Mayangna bible

Mark 6

¹Jisas laih kidika kaupak kalahwi witing sauni yakat kiuna, dawak disainipil balna kidika laih witing karak uina dai.

²Yakurupdinin mani[6] as kat kiwi kana kat, Papang yulni sumamalwa ūni yakat kawi sumalna dai. Muih mahni Jisas sumalwa kidika yakat yamni palni dakawi biribiri yulwi dakakana: —¿Adika muihni angkaupak di manas tanka dunayah? ¿Angkaupak kidika sinsni lani yaknayah dawak di taldas dini yamwa kidika bik?

³¿Adika awasyah ū yamyang kidika, Meri walanibis dawak Jims, José, Judas dawak Saiman wirahni kidika? ¿Dawak witing wirahni yayal balna bik mayang mapasking akat yalalahwa awasyah? Kaput bahang yulni dakakawasdai.

⁴Kaunah Jisas yaklau diyulna: —Pa bitik kau laih prapit as kau rispik yayamwi, kaunah witingna saunina, wanaihnina balna pasyakat dawak ūnina yakat laih kaput yayamwas ki.

⁵Kidika yakat taldas dini as bik sip yamwasdana dai, siknis muihni balna buas minitna yakat tingni dulauwi sikninanis kaupak yamni diyamna kidika kaupak ūk laih.

⁶Dawak witing laih sip amanglawasdai kat muih balna yaklau rahm kalkukulwas dai kidika yulni. Jisas laih tawan binina ulis balna kidika yakat sumalwi awaihwadai.

⁷Disainipil balna 12 yakat diyulwak uina, dawak bu yakwi disihna, dawak parasnina bik diana spirit dudutni balna kidika minitna yakat.

⁸Tapas yakat di as bik duwi uinin awas diyulna, kaunah tulnah as manah duwi uinin diyulna. Bik, plawar busna dawak lalah bik duwi uinin awasdai.

⁹Sus laih āninna sip dai kaunah buhni kalahnin asnina laih duwi kiunin awas.

¹⁰Aput diyulna: —Manna ū as kau āwanama kat, kidika yakat manah bangkauna pa ūk kau yawanama.

¹¹Dawak pa as kau yawanang manapararaswas dawak bik manadakanin yuyulwas karang kat, kidika kaupak alahwa kalmana kau sau yahamni manalaihna kidika usta yaktanama, kidika laih witingna yakat isningnapakna as karang.

¹²Bahang disaipil balna kidika kalahwi muih balna yakat diyuyulna Papang yakat wiryaklana atnin.

¹³Sitan balna bik mahni palni kangwi yayakna, dawak siknis muihni balna bik mahni dia wasni kau salapwi yamni diyayamna.

¹⁴King Herod laih Jisas yulni yuyulwak dakana dai, pa balna bitik yakat. Dawak Herod laih yulwadai: —Jan muih was utuh'yakyang laih watwi yaklauna, kidika bahang adika parasni taldas dini kidika duwi.

¹⁵Muih ūk balna laih yuyulwadai: —Adika laih prapit Elías. Dawak ūk balna laih yuyulwadai: —Adika laih prapit as ki, sihm muhnilaukau pranipit balna kapat.

¹⁶Kaunah Herod adika yulni balna dakawi, aput yulna: —Kidika laih Jan. Yang lawik sihtingkat tunani dadakna dawak waralaih watwi yaklauna.

¹⁷Herodías yulni Herod yaklau sihwakat Jan kidika ihina, dawak silak ūni yakat sin kau sitnadai. Herodías laih Herod wirahni al Felipe yalni dai, kaunah Herod laih kidika yalni karak kalduduna dai.

¹⁸Dawak Jan laih Herod yakat kalyulna dai: “Man wirahma al yalni kidika man yalma atnin sip-awaski.”

¹⁹Kidika yulni Herodías yaklau Jan yakat dutni kalkulwi inin yamna; kaunah witing sip yamwas dai,

²⁰kat Herod yamaniduwa dai bahang, Jan laih muih al as barangni dawak holi dai kidika yulni, dawak tingni dinityakat āwi duwadai. Dawak kidika yulwak dakawa bik ais yamninpa amanglawasdai, Herod laih Jan yulwa kidika yamni dakawadai.

²¹Kaunah Herodías witing kulwadai kidika mani kiwi kāwa kat talna, Herod witing batahnna mani kidika tanituna balna yakat, kalbauyang balna taninatuna balna yakat dawak Galilea kaupak nunuhni dikulna muihni balna yakat bik kasnin alasnina as yamwi diana.

²²Herodías walanibis yal[7] kidika kasnin alasnina pāni yakat kawi ubuna, dawak kidika ubuna laih Herod niningyakat dawak witing karak kalpakwi di kaswa bangdai kidika muihni balna bik yamni tatalna, dawak king yaklau siraubin yakat kalyulna: —Ais dukih mawa kidika yayultah, dawak yang lawik mana awaki.

²³Dawak wat wat pramis kalyamna ais dini yulwarang kidika kalawarang ki, witing king kāwa sauni kidika papus wayah karang bik kalawarang ki atna.

²⁴Siraubin kidika laih kalahwi nanangni yakat kalyulwi dakana: —¿Ais yulki yah? Nanangni yaklau nangnitlana: —Jan muih was utuh'yakyang tunani kidika yultah.

²⁵Siraubin kidika laih sirihni kawi kiwi king yakat kalyulna: —Warminitni dukih yawi di lakwi kasnin dini as kau Jan muih was utuh'yakyang tunani kidika lakta yama.

²⁶King laih uba palni kulnin bukna dai; kaunah pramis as yamna dai bahang muih yulwak uina dai kidika balna muhnina yakat, kalanin dini yulwa kidika sip dikah kaltasdai.

²⁷Kaput bahang kidika usnit kat kalbauyang muihni as sihna Jan tunani kidika dakwi uiwi kalana atnin.

²⁸Kalbauyang muihni kidika laih silak ūni yakat kiwi Jan tunani kidik dakwi di lakwi kasnin dini as kau laksakwi uiwi kalana. Yal siraubin kidika yakat kalana, dawak witing yaklau nanangni tingni yakat kalana dai.

²⁹Jan usnit uiyang balna kidika dakakana mani kat, Jan muihni nuhni kidika dulauwi duwi uiwi nununadai.

³⁰Kidika kaupak usnit kat, apostel balna Jisas karak aslah kalbahahana dawak ais yayamna kidika dawak sumamalna dai kidika bitik kalyuyulna dai.

³¹Jisas yaklau diyulna: —Aiwanang, mayang manah pa as yamni kau mawi apis mawingkita puhdanang. Kat muih balna kidika uiwi aiwi ahawadai, kidika bahang witingna sip di kakaswas dai.

³²Kaput bahang Jisas witing apostel balna duwa kidika karak kalpakwi pa nai kau uina dai kuring as kau.

³³Kaunah witingna uiwakat muih mahni ditalwi amangninalalana dai; bahang tawan balna bitik kaupak muih kiri uina dai kidika pāni yakat, dawak witingna tatuna ui'kakana dai Jisas karak.

³⁴Jisas kuring kaupak yaklakna mani kat, muih mahni kidika talna, dawak witingna yakat miniknakun ditalna dai, kat witingna laih sihm sīp balna maintalnin muihni dis kapat bangdai bahang; dawak di mahni niningnakana dai.

³⁵Maulahu niningkauh yakat, disainipil balna kidika witing yaihnit yakat uiwi aput kalyuyulna: —Uman maulahu dana, dawak adika pāni laih naikau ki.

³⁶Muih balna kidika sihtangkat di dahnin pāni balna dawak tawan binina balna yaihnit yakat uiwi kasnin dini bakakanwang.

³⁷Kaunah Jisas yaklau nangnitnalana: —Manna lawa di diatanangkat kakaswang. Witingna yaklau nangnitlalana: —¿Man dukih mawih yangna yawik lalah 200 karak plawar busna bakantik diatiningkat kasninna?

³⁸Jisas yaklau diyulna: —¿Manna plawar busna yapak dutamanah? Yawa talnauh. Uiwi lakwi talwi kalyuyulna: —Plawar busna singka dawak waspa dini bu.

³⁹Bahang muih balna yakat diyulna uiwi sihr sangni kidika minityakat dakni dakni yalahna atninna;

⁴⁰dawak uiwi dakni as yakat muih 50 dawak ūk yakat muih 100 yalalahna dai sihr sangni kidika minityakat.

⁴¹Usnit kat Jisas yaklau plawar busna singka kidika dawak waspa dini bu kidika bik tingni yakat duwi, dawak kisang yakat talwi Papang yakat tingkih kalana, usnit kat plawar busna kidika bahwi disainipil balna yakat diana muih balna kidika yakat diana atninna. Waspa dini balna kidika bik sihm muih balna bitik yakat yuna dai.

⁴²Muih balna bitik laih kaswi minitnatang bayak dadanadai,

⁴³dawak baisa kidika minityakat uslun 12 puwi babangna dai plawar busna sutni balna dawak waspa dini sutni balna wawatna dai kidika.

⁴⁴Plawar busna kakasna muihni balna dai kidika laih tausin singka dai.

⁴⁵Kidika usnit kat Jisas yaklau disainipil balna yakat diyulwak kuring yakat kakana, lakun kidika witingna tatuna dakyaklawi witingna tatuna uina atnin Betsaida yakat, dawak witing laih muih balna kidika diparaswi sihmukna atnin.

⁴⁶Dawak muih balna bitik sihmukna usnit kat, asang yakat kiuna dai minityulna atnin.

⁴⁷Ma puklakna yakat, kuring kidika laih lakun papus yakat witdai. Jisas witing alas sau buhni yakat watnadai kidika,

⁴⁸talwakat sip kawaih kidika wawaihwas dai, kat wing kidika witingna niningna kauh wauhwadai bahang. Payahlanin manah yakat, Jisas witing was minityakat lapakwi kiunadai witingna bangdai kidika niningyakat, kaunah sihm nailuih kau bayakwarang kapat yamna dai.

⁴⁹Was minityakat lapakwak talwi, witingna kukulna, kidika laih muih isningmuih, dawak sararahna;

⁵⁰kat witingna bitik talwi muihsakdadauna dai. Kaunah usnit kat witing yaklau yuldibauwi, aput diyulna: —¡Kulnamna dadasni dutanauh, yang, yamaduduwinih!

⁵¹Kuring yakat kilna dawak wing kidika laih laihwatna dai; dawak witingna laih amanglawas dadana dai,

⁵²kat plawar busna balna yakat taldas dini yamna kidika amanglawas dadana dai yulni, bahang witingna sinsnina kidika puksani kalnadai.

⁵³Lakun kidika dakyaklawi Genesaret sauni yakat uiwi kakana, kidika kung yakat kuring kidika sisitna dai.

⁵⁴Kuring kaupak sirihni yaklalakna bahang, muih balna kidika Jisas yakat amangnilalana dai.

⁵⁵Kidika sauni bitik awawaihna, dawak siknis muihni balna kidika krikri kau duwi uina dai Jisas sakdai yakat.

⁵⁶Dawak angkat pāni balna kiwi kāwa kidika, tawan binina yakat, tawan balna yakat, kidika awasbik ahni yakat karak bik siknis muihni balna kidika tapas yakat lalakwādai, dawak kalni dinit yakat bukwi yuyulna, dāwak prakni sutni kamanah bik laihna atnin; bahang wais kat laihwa kidika laih sikninis kaupak yamni kalwādai.