Read Mayangna Mark 8 Bible Online

Mark 8 - Mayangna bible

Mark 8

¹Ma as kat watwi muih mahni kalududuhna dawak kasnin dini dis bangdai, Jisas yaklau disainipil balna yakat diyulwak uina dawak aput diyulna:

²—Yang adika muihni balna akat miniknakun ditalayang, kat uman ma bās yang karak bangki, adika pāni akat dawak kasninna dini dis bangki.

³Dawak dibayahtas ūnina yakat sihmukki karang kat, sipki ta bamak yakat sangkadauna atninna, kat buas kidika laih pa naikaupak palni aina.

⁴Disainipil balna yaklau kalyuyulna: —¿Kaunah amput adika pāni akat di dibayahninyah, adika pāni akat muih as bik yalahwas adika?

⁵Jisas yaklau diyulwi dakana: —¿Manna plawar busna yapak dutamanah? —Witingna yaklau nangnitlalana: tiaskaubu.

⁶Bahang Jisas yaklau muih balna yakat diyulwak uiwi sau yakat yalalahna, tingni yakat plawar busna tiaskaubu kidika duwi Papang yakat tingkih kalana usnit kat, bahwi disainipil balna yakat diana dawak witingna yaklau muih balna yakat yuyuna dai.

⁷Waspa dini bik buas duwabangdai; Jisas yaklau duwi Papang yakat tingkih kalana, dawak kidika bik sihm disainipil balna yakat diana dai muih balna yakat yuna atninna.

⁸Muih bitik kaswi isningnalak dadanadai, dawak baisa kidika minityakat uslun tiaskaubu puwi babangna dai, yayahni balna wawatna dai kidika.

⁹Kakasna muihni balna kidika laih tausin arungka kuihnin manah dai. Usnitkat Jisas yaklau disihmukwi,

¹⁰disainipil balna karak kuring yakat kawi Dalmanuta sauni yakat uina dai.

¹¹Fariseo balna laih uikawi Jisas karak kalbibilna dai. Dawak dutni kalyamnin yulni, di taldas sainni as yamwakat talnin kalyuyulna witing lāih niningnakana atnin Papang kaupak kaiwa kidika.

¹²Jisas laih parasni palni wingnita puhwi, aput yulna: —¿Ais yulni adika muihni balna di taldas sainni as talnin yuyulwih? Barangni lāih manayultayang, sain as bik manatas awaki ki.

¹³Bahang didamukwi kuring yakat kawi lakun nakas yakat dak'kiuna dai.

¹⁴Witingna dinitnakahwakat kasnin dini dis uina, dawak kuringnina yakat plawar busna aslah duwabangdai.

¹⁵Jisas yaklau baisa kau diyulna: —Talnauh, fariseo balna dawak Herod planinawar pupuhnin dini kidika yakat amung talnauh.

¹⁶Disaipil balna kidika laih biri biri yulwi dakakana, plawar busna dis bangkidika.

¹⁷Jisas laih amanglawi aput diyulna: —¿Manna ais yulni plawar busna dismayang timanah? ¿Baisa manna amanglatasmanah dawak bik amanglatasmanah? ¿Sinsmana kidika yamni palni taihnayah?

¹⁸¿Mamaknapa laih dutamana kaunah talasmanah dawak tapamana bik dutamana kaunah dakasmanah? ¿Ismangnakatwasyah?

¹⁹Plawar busna singka dutik muih tausin singka pasyakat yunayang mani kat, ¿sutni balna bayakna kidika uslun yapak puta bahngnamana daih? Witingna yaklau nangnitlalana: —12.

²⁰—Dawak plawar busna tiaskaubu kidika muih tausin arungka pasyakat yunayang mani kat, ¿uslun babung yapak puta bahngnamana daih? Witingna yaklau nangnitlalana: —Tiaskaubu.

²¹Bahang witingna yakat diyulna: —¿Manna baisa amanglatasmanah?

²²Usnit kat Betsaida yakat uiwi kakana, dawak muih minikpa di talwas as Jisas yakat uiwi kalalana dai, kalni dinit bukna dai kallaihna atnin.

²³Jisas yaklau muih minikpa di talwas kidika tingni yakat laihna dawak tawan kaupak naikau yakna dai. Minikpa balna kidika susuihwas kau suihwi tingni kidika minityakat lakwi kalyulwi dakana sip di talwadaipa.

²⁴Muih minikpa di talwas kidika laih minikpa lāih di talwi, aput yulna: —Muih ahal balna ditalayang. Sihm pan balna kat tulu tulu kapat ditalayang.

²⁵Jisas yaklau watwi tingni kau minikpa balna minityakat lakna, dawak muih al kidika laih minikpa balna kidika yamni lāih di talna dai.

²⁶Bahang Jisas yaklau ūni kau sihpamwi, aput kalyulna: —Watta tawan yakat nawatwi kiwinih.[10]

²⁷Kidika usnit kat, Jisas disainipil balna karak kalpakwi Cesarea Filipo sauni tawanni binina yakat uina dai. Ta bamak yakat Jisas yaklau disainipil balna yakat diyulwi dakana: —¿Muih balna yaklauwi yang adika waisyang yatwih?

²⁸Witingna yaklau nangnitlalana: —Muih buas laih man kidika Jan muih was utuhyang man atwi, ūk balna kidika laih Elías man matwi dawak ūk balna kidika laih prapit balna kidika kaupak as man matwi.

²⁹—Witing yaklau diyulwi dakana: Dawak manna laih, ¿yang waisyang yatimanah? Pita yaklau nangnitlana: —Man kuduh Mesías.

³⁰Kaunah Jisas yaklau diyulna dai witing yulni kidika muih as kau bik yulnin awas dai.

³¹Jisas yaklau disumalna dai muih Walanibis al kidika laih uba palni dalani wauhwarang kidika dawak muihbararak balna, sumalyang balna taninatuna balna dawak la sumalniyang balna yaklau ruhmwi dadawarang kidika. Witing kidika ihiwarang, kaunah ma bās kat dauna kaupak yaklauwarang ki.

³²Kidika yulni laih baisa kau lāih diyulna dai. Bahang Pita yaklau ahni naikau duwi kiwi bilna dai.

³³Kaunah Jisas wiryaklawi disaipil balna yakat ditalwi, Pita yakat bilwi aput kalyulna: —¡Sitan yang kaupak naikau alahwah! Man laih Papang di talwa kapat talasman, kaunah man laih sau muihni balna di tatalwa kapat talaman.

³⁴Usnit kat Jisas yaklau disainipil balna yakat dawak muih balna yakat bik diyulwak uiwakat aput diyulna: —Manna kaupak angdika muihni yang disaikipil atnin dukih kalawakat, man muihma kidika damatkahtah, dawak panama prihni kidika duta uskit uitah.

³⁵Kat angdika muihni witing silp sangnika laihwi yaknin kulwakidika laih, diswarang ki; kaunah angdika muihni yang yulki dawak laihwi yaknin yulni kidika yulni sangnika diswarang kidika laih, sangnika laihwi yakwarangki.

³⁶¿Muih al kidika sau adika duwi ais yamwarangyah, sangnika laih diswarang kat?

³⁷Kidika awasbik, ¿muih al kidika sangnika minit ampus launin sipyah?

³⁸Bahang angdika muihni kat adika muihni balna barangni awas dawak dutni yamyang balna adika muhnina akat yang dawak yulki kidika yakat niking yakasaldarang kat, muih al walanibis kidika bik witing yakat nining yakasaldarang ki witing Papangni alasnina yaksihni karuk dawak insal holi balna karak kaiwarang mani.