Read Mayangna Luk 1 Bible Online

Luk 1 - Mayangna bible

Luk 1

¹Muih mahni palni uhulna mayang mapas kingyakat di kalahna balna yulni umani kidika,

²muih balna yaklau amput maisumamalna dai kidika kaput, dawak tatuna kaupak talwinah, yul yamni kidika yulnin warkni dudunadai.

³Yang Teófilo yamni palni yang adika bik, tatuna kaupak waltik talnayang, dawak yamni talnayang adika dini balna adika pāni kat kat maulna atnik,

⁴kaput laih man yamni amanglana atnam di rahm masumamalna kidika.

⁵Herod witing Judea kingni dai mani yakat, sumalyang as yalahwadai ayangni laih Zacarías, witing laih Abías sulani paskaupak dai. Yalni ayangni laih Isabel,[1] kidika laih Aarón sulani dai.

⁶Witingna laih la kat dai Papang muhni yakat dawak Dawan lāni balna kat dakakawadai, kaput bahang muih as bik sip witingna dutnina yuyulwasdai.

⁷Kaunah witingna walabis dis dai, kat Isabel sip duwasdai kidika yulni; baisa kidika minityakat, witingna laih uman muihbararak kakalna dai.

⁸Ma as kat Zacarías sumalniyang balna uduhna as kidika Papang muhni yakat wark yamnin dibukna dai,

⁹kidika laih sumalyang balna pasyakat ninihng kaput yayamwadai, Zacarías yakat suerte kalbukna dai Dawan ūni holi pāni yakat kawi walapni yamni kidika busna atnin.

¹⁰Witing laih walapni yamni kidika buswa kat, muih balna mahni kidika laih ahni yakat minitna yulwabangdai.

¹¹Kidika yakat Dawan innisal as Zacarías yakat kalkalahna, kidika laih sakripais walapni busnin pāni kaupak tingpal nining yakat kasakni sakdai.

¹²Zacarías witing insal yakat talna mani kat, amangnilawas danadai dawak bik uba palni yamaduna dai.

¹³Kaunah insal kidika yaklau kalyulna: —Zacarías, yamaduwinih, kat Papang laih man mamatyulnaman kidika dakana, dawak yalma Isabel yaklau walamabis as mawarangki, kidika ayangni laih Jan pakma ki.

¹⁴Man laih alasna awamaki dawak muih balna mahni bik witingna alasna kalalahwarang ki witing batahnna yulni,

¹⁵kat man walamabis kidika laih Dawan muhni yakat nuhni palni karangki. Witing laih wain dawak wasak bik diwas karang ki, kaunah Spirit yaklau kalbangna karangki baisa batahnwas tanitkauh.

¹⁶Witing yaklau yamwakat Israel ninisan balna mahni palni Papangnina Dawan yakat wiryaklalana karang.

¹⁷Adika Jan laih Dawan tanityakat kiuna karang, spirit karak dawak prapit Elías parasni karak bik, papang balna kidika dawi walabis balna karak watwi yamni diyakna atnin yulni dawak muih kulninna dudutni balna kidika laih yul kat dakana atninna. Kaput karak laih tawan yakat ridi yamna karang Dawan kaiwakat duna atnin.

¹⁸Zacarías yaklau insal yakat kalyulwi dakana: —¿Yang amput rahm kulkiyah adika dini? Kat yang laih uba palni muihbarakyang dawak yalki bik sihm muihbarak ki.

¹⁹Insal kidika yaklau nangnitlana: —Yang kuduh Gabriel, dawak yang laih Papang dini yamtayang; witing yaklau yasihna man karak yulbauna atnik dawak adika yulni yayamni balna adika bik mayulna atnik.

²⁰Kaunah waralaih, yul balna mayulnayang kidika rahm kultasman dai bahang, tubi kalma ki; sip yulbautas awamaki, angkat mani adika dini balna bitik kalahwarang kat.

²¹Kaput bahang, muih balna kidika laih ahni yakat Zacarías tani-awi biri biri yulwi dakawabangdai ais yulni holi pāni kaupak sirihni kalahwaspa.

²²Kalahna mani kat, sip yuldibauwas dai; bahang witingna amanglalana dai holi pāni yakat sahmuhni amana kapat talna kidika, bahang witing laih sain kau manah yuldibauwādai; dawak sip yulbauwas, kaput manah tanityakat kiunadai.

²³Warkni balna kidika witni kat kiuna mani kat, Zacarías laih ūni kau kiunadai.

²⁴Kidika usnit kat, yalni Isabel kidika laih muihkaruk danadai, dawak waiku singka pasyakat ūni kaupak kalahwasdai, aput kulwīnah:

²⁵“Waralaih Dawan yaklau adika aput yayamna, muih balna yaklau dutni yāyamnin awas yulni.”

²⁶Waiku tiaskauas laihwa yakat, Papang yaklau insal Gabriel kidika sihna dai Galilea tawanni as ayangni Nazaret yakat,

²⁷yal as baisa al karak kalpakwas ayangni laih Mery yakat kaltalna kiuna atnin, kidika yalni laih king Devid sulani kaupak muih al as ayangni José karak kaldunin pramis kalahna dai.

²⁸Insal kidika laih muih yal sakdai kidika pāni yakat ka'kiwi aput kalyulna: —¡Maparastayang, Papang yaklau yamni matalna! Dawan laih man karak ki.[2]

²⁹Insal yakat kaltalna mani kat, yulni balna yulna kidika dakawi amanglawasdana dai, dawak witing alas kalyulwi dakawadai kidika parasnin lani kidika ais tankapa.

³⁰Insal kidika yaklau kalyulna: —Mery, man yamaduwinih, kat man laih Papang ilpni dutaman.

³¹Waralaih man muihkaruk kalmaki: walabis al as duma ki, dawak witing ayangni laih Jisas pakma.

³²Witing laih muih al nuhni karang, Papang makau sakkidika Walanibis kalatwarang kidika, dawak Dawan Papang yaklau king kalyamna karang, sihm witing muihnibarak Devid kau kalyamna dai kapat,

³³kaput laih Israel ninisan yakat ban kaput king kana atnin yulni. Witing kingni lani kidika laih saran diskarang.

³⁴Mery yaklau insal yakat kalyulwi dakana: —¿Amput adika dini kalahwarangyah, yang muih al as karak bik yalahtasyang adika?

³⁵Insal kidika yaklau nangnitlana: —Spirit Holi kidika laih man mamatyakat kaiwarangki, dawak Papang makau sakkidika parasni kidika laih man mamatyakat sihm mukus kapat kaiwi watwarangki. Kidika bahang, muihbin batahnwarang kidika laih Holi dawak bik Papang Walanibis pakna karangki.

³⁶Man wanaihma Isabel kidika bik walabis al as dawarangki, witing laih muihbarak kaunah; walabis yaknin sip-awaski kalatwadai kidika, witing laih muihkaruk dana kaupak waiku tiaskauas duwi.

³⁷Papang niningyakat laih di as bik sip-awas laih awaski.

³⁸Bahang Mery yaklau yulna: —Yang laih Dawan warauni yang; bahang Papang yaklau yang yakat ais yamnin yayulna kidika yamwang. Kidika yulni karak insal laih kiunadai.

³⁹Kidika mani balna yakat, Mery laih sirihni palni tawan as kau kiunadai, Judea sauni asang manas yakat,

⁴⁰dawak Zacarías ūni yakat kawi Isabel yakat kalparasna dai.

⁴¹Isabel witing Mery yaklau kalparaswa yulni kidika dakana mani kat, muihbin kidika laih witing bani yakat kalitikna dai, dawak witing laih Spirit Holi yaklau kalbangna dai.

⁴²Bahang yulni parasni aput yulna: —¡Papang yaklau muih yayal balna bitik pasyakat man kauh baisa blis mayamna, dawak walamabis kidika bik blis kalyamna!

⁴³¿Yang adika waisyang, Dakiwan nanangni kaiwi yatalna atnin?

⁴⁴Man yaparastaman kidika sirihni palni dakanayang bahang, yang walakibis kidika alasna duwi bāki pasyakat kalitikna.

⁴⁵¡Yamni palniki Dawan yaklau di yamnin balna mayulna yakat rahm kulnaman kidika!

⁴⁶Mery yaklau yulna: “Yang solki kidika laihDawan nuhni kidika yakatayangni nuhni yamwi;

⁴⁷yang spiritki kidika laihyang Papangki yalaihwi yakyang yakatalasna ki.

⁴⁸Kat Papang yaklau witing minikpa kidika yang yakat yatalna kidika yulni, witing warauni minikunni kidika, dawak waradika kaupak alasna ismanglakmuihniman yatwarang ban kaput;

⁴⁹kat parasni bitik duwa kidika yaklau yang yakat di nunuhni yamna kidika yulni. ¡Witing ayangma kidika laih holi ki!

⁵⁰Papang laih dalani lani kidikaban kaput atnin duwi angdika muihni balna yaklauwiting yakat rispik kalyayamwa balnakidika yakat.

⁵¹Witing parasni bitik karak di yamna: witingnamanah kapat kaldakakawamuihni balna warknina kidika laihdismukna,

⁵²king balna kidika laihtronnina kaupak lakmukna dawak muih miniknakunni balna kidikalaih mayakat ilna.

⁵³Yuh wawauhwa muihni balna yakat laihdi yayamni diana dawak di duyang balna yakat laihtingnina pāni manah disihmukna.

⁵⁴Israel tawanni yakat ilp kalana,witing warauni yakat, dawak dalani didakawa kidika laihdinitkahwasdai.

⁵⁵Kaput pramis diyamna dai mayangmamuihkibararak balna yakat, Abraham yakat dawak sulani balnakalalahwarang kidika yakat bik.”

⁵⁶Mery laih Isabel karak waiku bas kalpakwi raudai, dawak kidika usnit kat ūni yakat nawatwi kiunadai.

⁵⁷Isabel witing muihbin dunin mani kiwi kana mani kat, walabis al as duna dai.

⁵⁸Witing yaihnit muihni balna dawak wanaihni balna bik uiwi alasna lani kalalana dai Dawan yaklau witing karak yamnidai kidika dakakana kat.

⁵⁹Ma tiaskaubās laihwa yakat, muihbin kidika laih Papang sainni ānin duwi uina dai, dawak witing papangni ayangni Zacarías kaput paknin kukulna dai.

⁶⁰Kaunah nanangni yaklau yulna: —Dikah. Witing ayangni laih Jan paknin ki.

⁶¹Nangnitlalana: —Man wanaihma balna pasyakat muih as bik diski kidika ayangni kaput.

⁶²Bahang muihbin papangni yakat sain kau kalyulwi dakakana, muihbin ayangni kidika amput paknin dukih kalawa kidika amanglana atnin yulni.

⁶³Papangni kidika laih tat labanni as yulna kidika yakat ulna atnin, dawak aput ulna: ‘Witing ayangni laih Jan.’ Dawak muih balna bitik laih yamni tatalna dai.

⁶⁴Kidika minitni yakat Zacarías witing watwi yulbauna, dawak Papang yakat ayangni nuhni yamna dai.

⁶⁵Witing yaihnit muihni balna bitik laih amanglalawasdai, dawak Judea sauni asang balna kidika bitik yakat ais kalahna kidika yuyulna dai.

⁶⁶Muih balna dakakawa kidika bitik biri biri aput yulwi dakakawadai: “¿Adika muihnibin ais kalwarangpah?” Kat rahm palni Dawan laih witing parasni kidika manikingkawadai muihbin ilpni yakat.

⁶⁷Muihbin papangni Zacarías kidika, Spirit Holi kau kalbuhng dawak Papang ayangni kau yulbauwīnah, aput yulna:

⁶⁸“¡Dawan laih ayangni nuhniyamnaki, Israel Papangni, kat witing laih tawanni yakatlaihwi yakna kaina!

⁶⁹Mailaihwi yakyang muihniparasni nuhni duwa asmaisihna, witing dini yamyang Devid sulanikaupak as.

⁷⁰Adika ki muhnilaukau pramisyamna dai kidika witing pranipit holi balna munah:

⁷¹mayang manikingkauh yaklalauwamuihni balna kaupakmailaihwi yakwarang kidika dawak dutni maiyayamwa balna bitikkaupak bik,

⁷²mayang mamuihkibararak balna yakatminiknakun ditalwarang kidika dawak witing pranimis holi yakatdinitkahwas karang kidika.

⁷³Dawak adika ki pramis yamna dai kidika mapapangki Abraham yakat:

⁷⁴mayang manikingkauh yaklalauwabalna kaupak mailaihwi yakwarang kidika, di as bik yamadudas witing diniyamna atnin

⁷⁵dawak witing muhni yakat barangnidawak bik holi atnin masangkika bitik yakat.

⁷⁶Man namangkauh laih,yang walakibis bin, Papang makau sakkidika pranipitmapakna karang, kat man laih Dawan tanityakatyawama bahang witing tani balna kidikaridi yamtinah,

⁷⁷witing tawanni kidikaamanglana atnin Papang yaklau witingna dutninadawak diswa kidika dawak laihwi yaknin lani bikdiawa kidika.

⁷⁸Kat mayang maPapangki, witing dalani lani nuhni duwakidika munah, mayakaupak ma wisamni as duai'mayawi,

⁷⁹yaringni diana atnin yulni puksani pasluihni yakat yalalahwabalna yakat, lapakda balna kidika yakatmatakituna kana atnin kulnin aslah tani munah.”

⁸⁰Muihbin kidika laih barakwadai dawak spiritni niningyakat bik parasni kalwadai, dawak kauhmak wanilang yakat yalahna dai Israel muihni balna muhnina yakat kalahna kat.