Read Mayangna Luk 11 Bible Online

Luk 11 - Mayangna bible

Luk 11

¹Wat as Jisas witing minityulwasakdai pa as kau; minityulwi dana mani kat, disainipil balna kaupak as yaklau kalyulna: —Dawan, mikitna yulnikna yanasumaltah, Jan disainipil balna yakat disumalna kaput.

²Jisas yaklau diyulna: —Mamatna yultaman kat, aput yultanauh: ‘Papang,[16] man ayangma kidikalaih holi karang. Man king āwaman sauni kidika kaiwarang.[17]

³Kasnikna dini kidika ma bitik yakatminitbayak yanatah.

⁴Dutkina balna kidika datangkatdiswang, kat yangna bik dutnina datiningkat diswi dutni yanayayamna muihni balna bitik yakat. Traini talnin yakat yanaāwinih.’[18]

⁵Jisas yaklau aput bik diyulna: —Yuldarang kat manna paskaupak kaltalyang muihni yamni as duwa karang, dawak pukpapus ūni yakat kiwi aput kalyulwarang: ‘Kaltalyang yamni, plawar busna bās wayaki yatah,

⁶kat yang karak kaltalyang yamni as wisam ūki yakat kaina pa ūk kaupak, dawak ais kalanikpa di disyang.’

⁷Ūk kidika yaklau ū paskaupak aput laih kalyulwas karang: ‘Yauswinih: dūr kidika laih putna sakki, dawak payahnin pāni yakat walakibis balna karak uman alangwanayangna; lawik di as bik manik sip-awasyang.’

⁸Manayultayang, witing karak kaltalyang yamni yulni yaklauwi di as bik kalawas karang bik, asalni dis yulni yaklauwi ais dukih kalawa kidika bitik kalawarang ki.

⁹Kaput bahang, yang lawik manayultayang: Yultanauh, dawak Papang yaklau manawarang; waltanauh, dawak yaktanama; dūr yakat yultanauh, dawak apahna karang.

¹⁰Kat angdika muihni yulwa kidika laih, duwi; dawak walwa muihni kidika laih, yakwi; dawak dūr yakat yulwa muihni kidika laih, apahwi.

¹¹“¿Ais manna paskaupak papang as kat, sipyah walanibis al[19] yaklau waspa dini kalyulwakat, bil kat kalana atnin,

¹²kidik awaskat sakara sumani yulwakat wakurus kat kalana atnin?

¹³Bahang manna dutni muihni mana kidika, walamanabis balna yakat di yayamni diata amanglatamana kat, ¡kisang kau Papang sakkidika laih ampus Spirit Holi kidika diawarangyah kalyuyulwarang muihni balna yakat!

¹⁴Spirit dutni yaklau muih al as kau tubi kalyamna kat Jisas yaklau kangwi yakna dai; dawak spirit dutni kidika kalahna mani kat, muih al tubi kidika laih yulbauna dai. Muih balna kidika laih yamni tatalna dai,

¹⁵kaunah buas balna kidika laih aput yuyulna dai: “Beelzebú, sitan balna taninatuna kidika yaklau adika alni akat kangwi yaknin parasni kidika kalana.”

¹⁶Ūk balna kidika laih, kallaihnin dini as ānin yulni, kisang kaupak taldas sainni as yamwang atwi kalyuyulna dai.

¹⁷Kaunah witing laih, witingna ais kukulwa kidika amanglawa bahang, aput diyulna: “Sau as pasyakat sahwi kalahna bu biri biri niningnakauh yaklalauwa kidika laih, witing alas kaldaukalwi dawak ūni balna kidika laih bitik bukyayamwi.

¹⁸Kaput bik, sitan kidika witing alas sahwi kalahwarang kat, ¿amput parasni duwarangyah? Aput yultayang kat manna lawa yultamana yang laih Beelzebú parasni kau dutik sitan balna kang'yaktayang,

¹⁹kaunah kaput karang kat, ¿wais yaklau manna usmatna uiyang balna yakat kangwi yaknin parasni diawih? Kaput bahang, witingna alas lāih yayakwi manna laih tunamana balakna kidika.

²⁰Kat yang lawik spirit dudutni balna kidika Papang parasni kau kangtik yaktayang kat, kidika tanka laih Papang king kāwa sauni kidika uman manna yakat kaikana.

²¹“Muih al as witing kalbaunin dini yamni duwi ūni maintalwa kat, ū yakat ais dawa kidika laih yamni sakki.

²²Kaunah muih al ūk baisa parasni as kaiwi minitbayakwi kalbaunin dini balna kidika dakyakwarang dawak dini balna kidika muih balna yakat wayahwarang.

²³“Yang ilpki yakat awas kidika laih, yang nikingkauh ki, dawak yang karak kalpakwi anawas kidika laih, nawatkauh rawi.

²⁴“Spirit dutni as muih al as kaupak kalahwa mani kat, pa balna buhni yakat walwi awaihwi yakurupdana atnin; kaunah yakwas dawakat, aput kulwi: ‘Angkaupak yang ūki alahwanayang kat, kidika yakat wattik nawattik yawanayang karang.’

²⁵Nawatwi kiwa mani kat, muih al kidika laih sihm ū as bitwi yamni dana kapat kat kaltalwi.

²⁶Bahang kiwi spirit dudutni balna ūk tiaskaubu uduhwi kalpakwi kidika alni sangnika yakat kawi yalalahwi, dawak witni kat kidika alni laih baisa dutni kalwi tatuna dai kidika karak dawakat.”

²⁷Jisas laih kidika dini balna yulwa sakkat, muih balna pasyakat muih yal as sarahwi aput yulna: —¡Yal as man kidika mayakwi mamuhna kidika laih alasna isninglak ki!

²⁸Jisas yaklau nangnitlana: —¡Angdika muihni balna Papang yulwakat dakawi yayamwa balna kidika laih baisa alasna isningnalak ki!

²⁹Muih mahni kidika laih Jisas yaihnit yakat baisa kalududuhna dai, dawak witing yaklau aput diyulna: “Adika mani muihni balna laih dudutni ki; taldas sainni as talnin yuyulwi, kaunah Jonás sainni kaupak sain ūk laih tatalwas karangki.

³⁰Bahang Jonás witing Nínive muihni balna niningna yakat sain as dai kidika, muih Walanibis al kidika bik warmani mani muihni balna niningna yakat sain as karang.

³¹La yamwi adika mani muihni balna yakat lanina yamwarang mani kat, wadah niningkauh king yal kidika yaklau pāt yakat āwarangki; kat witing laih sau ūk naikaupak kaina bahang Salomón sinsni lani kidika dakana atnin yulni, dawak akat sakkidika laih baisa nuhni ki Salomón karak dawakat.

³²Nínive muihni balna laih la yamwi adika muihni balna lanina yamwarang mani yakat yaklalauwarang ki, dawak pāt yakat diahawarang ki; kat Nínive muihni balna laih Jonás yulni dakawi Papang yakat wiryaklalana bahang, dawak akat sakkidika laih baisa nuhni ki Jonás karak dawakat.

³³“Muih as bik awas kidika dahlwi malni yakat lakwaski dawak baks dinityakat bik awaski, kaunah mayakat ilwi, kakawa muihni balna kidika laih yaringni duna atninna yulni.

³⁴Mamakpa balna kidika laih sihm muihma nuhni awasni kapat ki; mamakpa balna kidika yayamni kat, muihma nuhni bitik laih yaringni duwa karang; kaunah dudutni laih, muihma nuhni kidika puksani yakat sak karang.

³⁵Amung talah man muihma yakat yaringni dutaman kidika puksani atnin awaski.

³⁶Bahang muihma nuhni bitik yaringni duwa kat dawak kidika yakat puksani as bik laih, di balna bitik ahni manah talma, sihm awas as yaringni mawa kapat.”

³⁷Jisas yulbauwi dana mani kat, fariseo muihni as yaklau kalyulna dai ūni yakat kiwi di kasna atnin, dawak Jisas laih ū pasyakat kawi tibil yakat yalahna dai.

³⁸Fariseo muihni kidika laih Jisas tingni suhwas di kaswa kidika talwi amanglawas danadai.

³⁹Kaunah Dawan yaklau kalyulna: —Fariseo muihni balna mana laih sutak dawak di lakwi kasnin dini kidika dangni manah suhtamana, kaunah paskau kidika laih di malnamana dini balna kidika dawak dutni lani manah ki.

⁴⁰¡Tapdadas balna! ¿Manna amanglatasmanah ahni kau yamna muihni kidika, sihm paskau bik yamna kidika?

⁴¹Manna muih balna yakat di yutanauh paskau bangkidika kaupak, dawak kaput laih dutmana dawak disna karang.

⁴²“¡Alakaih fariseo muihni balna!, manna laih menta dawak sinak satni balna 100 kaupak salap Papang dini yaktamana kidika, kaunah la kat kidika dawak Papang dalani lani duwa kidika yakat laih dakasmana. Adika ki manna yamnamna kidika laih, ūk kidika bik datas.

⁴³“¡Fariseo muihni balna manna laih mamaknakun karang! Papang yulni sumamalwa ūni yakat rispik sinini dudang timana kidika, dawak ta balna yakat muih balna yaklau rispik lani karuk manaparasnin dukih manawa kidika.

⁴⁴“¡Manna laih mamaknakun karang, mamikpa yakat sihm sau ū malni kau kapat mana kidika, muih balna laih kidika balna yakat amanglawas atatakwa kidika!

⁴⁵Bahang lā sumalniyang balna paskaupak as yaklau nangnitlana: —Sumalyang, kidika yulta yangna yakat bik dutni yanayultaman.

⁴⁶Kaunah Jisas yaklau kalyulna: —¡Lā sumalniyang balna, manna bik mamaknakun karang!, truknin dini balna muih as bik truknin sip-awas kidika muih ūk balna yakat diatanangkat trurukwa kidika, dawak manna laih tingkau suknin kat bik dukih manawas kidika.

⁴⁷“¡Manna laih mamaknakun karang!, manna muihmanabararak balna yaklau prapit balna yakat ihina kat saunina ū balna yamtamana kidika.

⁴⁸Kaput karak manna laih lāih yaktamana muihmanabararak balna di yayamna yakat yamni talamana kidika, bahang witingna yaklau ihina dawak manna laih saunina-ū balna yamtamana.

⁴⁹“Kidika bahang, Papang witing sinsni lani yakat aput yulna: ‘Prapit balna dawak apostel balna bik manasihnayang karang, dawak witingna kaupak buas kidika laih itanama dawak ūk balna kidika laih diuitanama.’

⁵⁰Bahang warmani muihni balna yakat laih Papang yaklau diyulwi dakawarang ki sau yamna kaupak prapit balna ihina ānina yulni kidika,

⁵¹Abel āni kaupak Zacarías āni kat, sakripais busnin pāni dawak holi pāni karak walsah yakat ihina kidika. Kidika bahang, manayultayang Papang yaklau warmani muihni balna yakat diyulwi dakawarang ki witingna dadauna yulni kidika.

⁵²“¡Lā sumalniyang balna manna laih mamaknakun karang!, amanglanin dūrni kiniting dunamana kidika; kaunah manna kat bik āwas mana dawak kanin dukih diawa balna yakat bik datanangkat kakawaski.

⁵³Jisas yaklau adika dini balna diyulna mani kat, lā sumalniyang balna dawak fariseo muihni balna bik uba palni kulninna daukakalna dai, dawak yulwi dakanin yulni balna mahni kalyulwi dakakana dai,

⁵⁴witing ais yulwakat kidika kau yulni yakna atninna.