Read Mayangna Luk 12 Bible Online

Luk 12 - Mayangna bible

Luk 12

¹Muih mahni palni kalududuhna dai, uba mahni kidika yulni biri biri kaltuklalakwadai. Jisas laih disainipil balna yakat tatuna aput diyulna: “Fariseo muhni balna planinawar pupuhwa dini kidika yakat amung talnauh, yuldarangkat, sinsnina dis lani yakat.

²Kat di as bik malni kau diski walwi yakwas atnin, dawak di as bik malna dini diski amanglawas atnin.

³Kaput bahang, manna puksani yakat ais balna yulnamana kidika laih, madah yaringni yakat dakana karang; dawak malni kau dawak dūr putsakta yulnamana kidika laih, ū tuna balna kaupak parasni sarahwi yulna karang.

⁴“Manna yang karak kaltalyang yayamni mana kidika, manna yamaduduwinih manainin muihni balna kidika yakat, kaunah usnit kat sip di as bik yayamwaski.

⁵Yang lawik manayulki ki wais yakat yamanidunamna kidika: yamanidutanauh sangnika dakyakna usnit kat, kuh yakat ruhmnin parasni duwa kidika yakat. Witing yakat laih rahm yamanidutanauh.

⁶“¿Uhbinina singka kidika lalah dadasni binina bu minit bakanwa awasyah? Kaput bik, Papang laih witingna kaupak as yakat bik dinitkahwas ki.

⁷Manna namangnakauh laih, basmana balna kat bik bitik kulwi talna ki. Kaput bahang manna yamaduduwinih: manna laih uhbinina mahni karak bik manna kauh nuhni manakulna ki.

⁸“Manayultayang angdika muihni kat muih balna muhnina yakat yang ilpki yakat yulwarang kidika laih, muih Walanibis al kidika bik Papang innisal balna muhnina yakat witing ilpni yulna karang ki;

⁹kaunah angdika muihni kat muih balna muhnina yakat yatalasyang tarang kidika laih, Papang innisal balna muhnina yakat bik talasyang tarang ki.

¹⁰“Papang yaklau dutni dawak diswarang ki angdika muihni muih Walanibis al niningyakat di as yulwarang kidika; kaunah angdika muihni kat Spirit Holi niningyakat yulni dutni yulwarang kidika laih dutni dawak diswas karangki.

¹¹“Papang yulni sumamalwa ūni balna yakat manaduwi uiwarang mani kat, kidik awaskat wihta balna dawak tunan muihni balna muhnina yakat bik, manna kulwi kalbabauwinih amput tamatna daknamna pa kidik awaskat ais yulnamna pa,

¹²kat yulbaunamna mani kiwi kawarang kat, Spirit Holi yaklau manasumalna karang ais yulnamna kidika.”

¹³Muih balna paskaupak as yaklau Jisas yakat kalyulna: —Sumalyang, wirahki al yakat kalyultang kat dipahni yang diki kidika yawang.

¹⁴Dawak Jisas yaklau nangnitlana: —Yang karak kaltalyang yamni, ¿wais yaklau manna mamatna yakat wihta kapat yayakna yah kidik awaskat di wayahyang kapat as?

¹⁵Aput bik kalyulna: —Manna amung talnauh tumnin lani kidika yakat; kat sangka atnin kidika laih di mahni duwa atnin kidika kaupak awaski.

¹⁶Bahang adika malni yulni diyulna: “Muih al di duyang as dai, sauni balna kidika laih di minik mahni yakna dai.

¹⁷Muih di duyang kidika laih aput kulwi talna: ‘¿Ais yamkiyah? Di minik balna kidika angkat punik pa disyang.’

¹⁸Dawak aput yulna: ‘Amanglanayang ais yamnik kidika. Di minik putayang ūni balna kidika tuklakmuktik ūk nunuhni yamki ki, kidika yakat di minik balna kidika puna atnik dawak di ūk balna dutayang kidika bitik.

¹⁹Usnit kat yang alas muihni yakat aput yulki: Yang karak kaltalyang yamni, di mahni apakna dutaman kurih mahni dini; urupdah, kastah, ditah, alasna alahwah.’

²⁰Kaunah Papang yaklau kalyulna: ‘Tapdadas, adika puknita daumaki, dawak di apakna dutaman kidika laih, ¿wais dini karangyah?’

²¹Muih al kidika kaput kalkalahwi witing alas ritsni balna uduhwa mani kat, kaunah Papang muhni yakat laih minikunni ki.”

²²Usnit kat Jisas yaklau disainipil balna yakat diyulna: “Adika manayultayang: Manna kulwi kalbabauwinih ais kasta sangka atnamna kidika, dawak asna āwanamna kidika bik.

²³Muih sangnika kidika kauh nuhni kalkulna ki kasnin dini kidika karak dawakat, dawak mamuihki nuhni kidika kauh nuhni ki asna kidika karak dawakat.

²⁴Kuparis balna yakat talnauh: di dahwi minik yayakwas ki, di minik balna puninna ūni kat bik diski; kaput kaunah, Papang yaklau dibayahwi. ¡Manna laih ampus nuhni manakulnayah di lawani balna karak dawakat!

²⁵Dawak kaput bik, muih as uba kulwi kalbauwarang bik, ¿amput sangnika kidika naini yamwarangyah awar as yakat?[20]

²⁶Bahang dibindauh kidika kat bik yamninna sip-awas kat, ¿ais yulni di ūk balna kidika yulni kulwi kalbauwih?

²⁷“Yamni talnauh dipulu balna kidika amput bararakwapa: wark yayamwaski dawak asnina bik yayamwaski. Kaput kaunah, manayultayang king Salomón kat bik, dini yayamni balna karak, kidika asna kapat kawasdai.

²⁸Bahang Papang yaklau dibasta balna yakat kaput yamwakat, di dahnin pāni yakat warmani sakki dawak payahwakat di busnin pāni yakat busyamwa kidika, ¡manna muih rahm kulnin lani dismana kidika yakat laih ampus asna manaāninyah!

²⁹Kaput bahang, manna kulwi kalbabauwinih, ais kasnamna pa dawak ais dinamna pa.

³⁰Kat adika dini balna bitik kuduh sau muihni balna yakat diyamwakat kulwi kalbabauwa kidika, kaunah manna laih papang as dutamana ais dukih manawa kidika uman amanglana.

³¹Manna laih Papang king kāwa sauni yakat tapamana lakta dakanauh, dawak adika dini balna dutanama.

³²“Manna yamaduduwinih, yang sīpki balna; manna laih bulah mana, kaunah Papang laih dalani lani duwa kidika karak king kanin sauni kidika mananin kulna.

³³Di dutamana kidika bitik bakanmuktanauh, dawak dukih diawa muihni balna yakat diatanauh; sirihni yamtanauh bik balna kidika umani kakalwaskau, kisang yakat rits balna saran dis kidika, sip di malyang kawas kidika dawak banibil bik daukakalwas kidika.

³⁴Bahang angkat manna ritsmana sakkarang kidika, kidika yakat bik ismangna kidika sakkarang.

³⁵“Prakmana āwa dawak awasmana dahlta ridi awanauh.

³⁶Di yamyang balna kapat awanauh daninawan marid kasnin kaupak kaiwi dūr yakat lakwakat sirihni apahnin tanitatalwa kidika kapat.

³⁷Di yamyang balna kidika laih alasna isningnalak karang daninawan kaiwi ditalwakat sahmuhni bangkarang kidika. Barangni manayultayang daninawan kidika yaklau diyulwakat tibil yakat yalalahwa kat kasnin dini kidika lakwi diawarang ki.

³⁸Witingna laih alasna isningnalak karang, pukpapus kidik awaskat payahlanin manah kiwi ditalwakat sahmuhni bangkarang kat.

³⁹Dawak manna adika amanglatanauh: ū dawan as kidika witing amanglawa kat laih dimalyang kidika ais awarni kiwi kawarang kidika, muih as bik dawakat ūni yakat kawi di malwas karangki.

⁴⁰Manna bik ridi awanauh; kat muih Walanibis al kidika laih amanglatasmana kat kaiwarangki.”

⁴¹Pita yaklau kalyulwi dakana: —Dawan, ¿adika malni yulni adika yangna yakat manah yanayultadah kidik awaskat muih bitik yakat diyutadah?

⁴²Dawan yaklau yulna: “¿Angdika di yamyang kidika barangniyah dawak yul kat dakawih, daniwan tingnilau balna witing tingni yakat āwi dawa kidika, awarni kat dibayahna atnin yulni?

⁴³Di yamyang kidika laih alasna isninglak karang, daniwan kiwi kaltalwakat yamnin kalyulna dai kaput yamwasak karangkat.

⁴⁴Rahm palni manayultayang daniwan kidika yaklau dini yayamni balna kidika witing tingni yakat āwi dawarang ki.

⁴⁵Kaunah kidika di yamyang, daniwan laih kainin baisa ki ti kulwi, di yamyang ūk ahal dawak yayal balna yakat dutni diyamwarang kat, dawak di kaswi, diwi wasak dauwarang kat,

⁴⁶daniwan kidika kainin awarni amanglawas kat kaiwi wah kalawakat,[21] barangni muihni balna awas wawauhwa kidika kapat wauhwarang ki.

⁴⁷“Di yamyang witing daniwan ais dukih kalawa kidika amanglawa bik, witing ridi awaslaih dawak bik yulni dakawas laih, dalani mahni kalawi wah kalana karang ki.

⁴⁸Kaunah di yamyang kidika witing wah dunin dini kidika amanglawas di balna kidika yamwarang kat, dalani dibindauh karak wah kalana karangki.

⁴⁹“Yang laih sau akat kuh bina aiwanayang; dawak ¡amput dahlwa kat kapat talkih yawi!

⁵⁰Traini talnin yamadangni munah bayakki ki, dawak ¡amput wauhtik witni kat yawaki kidika!

⁵¹¿Manna kultamanah yang laih sau akat kulnin aslah lani duaina aiwanayang? Manayultayang kaput awaski, kaunah sahwi kalahnin lani duainayang.

⁵²Kat warmani kaupak tanityakat, ū as yakat kalwanaih singka kidika sahwi kalalahna karang, muih bās kidika laih bu niningna yakat dawak bu kidika laih bās niningna yakat.

⁵³Papang kidika laih walanibis al niningyakat karang dawak walanibis al kidika laih papangni niningyakat karang; nanang kidika laih walanibis yal niningyakat karang dawak walanibis yal kidika laih nanangni niningyakat karang; usah muihbarak kidika laih usah sirau niningyakat karang dawak usah sirau kidika laih usah muihbarak niningyakat karang.”

⁵⁴Jisas yaklau muih balna yakat aput bik diyulna dai: “Manna talnangkat mukus balna kidika ma kāwa kaupak kilwakat, yultamana was lauwarang ki, dawak rahm kaput kalahwi.

⁵⁵Dawak wing kidika wadah niningkaupak wauhwakat, daihwarang ki timana, dawak rahm kaput ki.

⁵⁶¡Sins dis muihni balna! Manna kisang yakat dawak sau yakat bik lakta tala amanglatamana kat, ¿amput manna yalahtamana mani balna yakat laih lakta tala amanglatas manah?

⁵⁷“¿Ais yulni man alas lama yamtasmahn la kat kaput?

⁵⁸Muih as yaklau la mahawarang kat dawak witing karak la muhni yakat yawama mani kat, traitala kulnin lani as kau wattah, wihta muhni yakat maduwi kiwas atnin; kaput awas karang kat, wihta yaklau guardia balna tingnina yakat mahawarang, dawak guardia balna yaklau silak yakat maahawarang.

⁵⁹Yang lawik mayultayang kidika kaupak alahwas awama angkat mani lalahma bin witni kidika lauma kat.”