Read Mayangna Luk 14 Bible Online

Luk 14 - Mayangna bible

Luk 14

¹Yakurupdinin mani as kat, Jisas laih fariseo muihni as ūni kau kiunadai di kasna atnin, dawak fariseo muihni balna ūk laih pakwi tatalna dai.

²Kidika yakat Jisas muhni yakat muih al as sakdai witing laih muihni yakat was duwadai.

³Jisas yaklau lā sumalniyang balna dawak fariseo muihni balna yakat diyulwi dakana: —¿Yakurupdinin mani yakat sipyah siknis muihni as yamni kalyamna atnin kidik awaskat sip awasyah?

⁴Kaunah witingna laih ap dadanadai. Dawak witing yaklau siknis muihni kidika duwi yamni kalyamwi sihpamwakat kiunadai.

⁵Dawak fariseo muihni balna yakat laih aput diyulna: —¿Manna kaupak wais kidika witing walanibis kidik awaskat tuniruh almuk pan muryang kidika was butnin pāni kuhrna as kau kawi kiuna usnit kat yakwasyah, yakurupdinin mani karang bik?

⁶Dawak di as bik nangnitlanin sip awas dadanadai.

⁷Jisas laih talna dai muih balna diyulwakat uina kidika tibil yakat yalahnin rispik sinini balna kidika amput walwi yakwi duduwakat, dawak adika yulni diyulna dai:

⁸—Muih as yaklau marid kasnin alasnina as kau mayulwakat yawama mani kat, tatuna kau yalahnin pāni yamni yakat yalahwinih, kat muih ūk man karak witing kauh nuhni kalkulna muihni as bik kiunin sipki;

⁹dawak manna albupak manayulwakat yawanamana muihni kidika kaiwi aput mayulnin sipki: ‘Man muih ūk akat pa kalatah.’ Bahang man laih asalma karuk yawa sini witni kau sakyakat yalahma ki.

¹⁰Wirlawakat, mayuyulwakat yawama mani kat, yalahnin pāni witni kau yakat yalahtah, kaput laih mayulwakat yawanaman muihni kidika kaiwi aput mayulwarang: ‘Yang karak kaltalyang yamni, yalahnin pāni as rispik pāni yakat lawa yalahtah.’ Kaput laih man rismapik nuhni duma tibil yakat man karak yalahna bangkidika balna muhnina yakat.

¹¹Kat angdika muihni witing alas nuhni kaldakawa kidika laih, sau yakat kallakna karang; dawak sau yakat kaldakawa muihni kidika laih, nuhni kalyamna karang.

¹²Kalyulwakat kiuna muihni yakat bik aput kalyulna: —Man lawa kasnin dini as muih balna yakat diama mani kat, man karak kaltalyang yayamni balna kidika, wirahma ahal balna yakat, wanaihma balna yakat, dawak man yaihmatkau di duyang balna kidika yakat bik diyultang kat uinin awaski; kat witingna yaklau biriwi mayuyulwakat yawama, dawak kaput laih man birita mamat dunaman karang.

¹³Wirlawakat, kasnin alasnina as muih balna yakat diama mani kat, muih miniknakunni balna, di sip awas muihni balna, yamni lapapakwas muihni balna dawak miniknapa di tatalwas muihni balna yakat diyultang kat uiwang;

¹⁴dawak man laih alasna awama. Kat witingna laih lauwi manin sip awas bahang, kaunah man laih la kat muihni balna dadauna kidika watwi yaklalauwarang mani kat mamat duma ki.

¹⁵Kidika dakana mani kat, tibil yakat yalahna bangdai kidika kaupak as yaklau Jisas yakat kalyulna: —¡Angdika muihni Papang king kāwa sauni yakat kasnin alasnina yakat sakkarang kidika laih kulnin alasna isninglak karang!

¹⁶Jisas yaklau kalyulna: —Muih al as yaklau masan kasnin as muih balna yakat diana, dawak muih mahni palni uinin diyulna dai.

¹⁷Masan kasnin awarni yakat muih al kidika yaklau dini yamyang yakat sihna uinin muihni balna yakat aput diyulna atnin: ‘Aiwanauh, kat masan kasnin dini kidika laih uman ridi ki.’

¹⁸Kauna muih balna bitik laih yulwasdadana. Tatuna kidika laih aput atna: ‘Wisam palni sau as bakannayang, dawak yawik talnik ki. Kalmadinit buktayang dutki datang diswang.’

¹⁹Ūk kidika laih aput yulna: ‘Turuh ahalmuk pan muryang balna singka bakannayang, bahang wark yakat ātik talki ki. Kalmadinit buktayang dutki datang diswang.’

²⁰Dawak ūk laih aput yulna: ‘Wisam palni marid alahwayang, bahang yawinik sip awasyang.’

²¹Dini yamyang kidika laih nawatwi kiwi daniwan yakat ais kidika bitik kalyulna dai. Bahang daniwan kidika laih kulnin daukalna, dawak dini yamyang yakat aput kalyulna: ‘Sirihni palni ta balna yakat dawak ta nunuhni balna yakat bik yawah dawak muih miniknakunni balna, di sip awas muihni balna, miniknapa di tatalwas muihni balna dawak yamni lapapakwas muihni balna kidika bik duaitah.’

²²Usnit kat dini yamyang kidika yaklau yulna: ‘Dawan, ais yamnin yayulnaman dai kidika uman yamnayang, dawak baisa pa pakki.’

²³Bahang di yamyang daniwan kidika yaklau kalyulna: ‘Ta balna yakat dawak daklana balna yakat bik yawah dawak muih balna yakat taihta diyamtangkat kakawang, ūki adika muih bung dana atnin.

²⁴Kat manayultayang tatuna uina muihni balna kidika laih as bik yang masan kasnik kidika kaupak kakaswas karangki.’

²⁵Muih mahni Jisas usnit uhuiwadai; dawak wiryaklawi aput diyulna:

²⁶“Muih as yang yakat kaiwi yang kauh dalani yatalwas kat papangni, nanangni, yalni, walanibis balna, wirahni ahal dawak yayal balna, dawak witing muihni karak dawakat, yang disaikipil atnin sip awaski.

²⁷Dawak angdika muihni witing panan prihni trukwi uskit uiwas kidika laih, yang disaikipil atnin sip awaski.

²⁸Manna kaupak as mayakat kilwi talnin pāni as yamnin kulwakat, ¿ais tatuna laih yalahwi kulwi talwas atnin katpah lalah ampus diswarang kidika, kaput karak witing talna atnin sip yamwi yakwarangpa?

²⁹Wirlawakat, sau paskau rahni balna laihwa dini kidika āwi usnit kat yamwi yakwas dawarangkat, muih tatalwarang kidika bitik laih witing yakat sarahni kalyuyulwarang ki,

³⁰aput yulwinah: ‘Adika alni laih sarpakwi laihwi yamna, kaunah sip yamwi yakwas dana.’

³¹Kidik awaskat king as kidika king ūk niningyakat kalbauna kiwarang kat, ¿ais yalahwi kulwi talwas atnin katpah soldado balna 10,000 karak sip kalbauwarangpa soldado balna ūk 20,000 kidika niningyakat?

³²Dawak sip niningyakat yaklauwas kat, king ūk kidika baisa naikau sakkat, yul trukyang muihni balna sihwarangki kulnin aslah lani duna atnin yulni.

³³Kaput bahang, manna kaupak angdika muihni di duwa balna kidika bitik dawas laih, sip awaski yang disaikipil atnin.

³⁴“Kuma kidika laih yamni ki; kaunah wilamni dis kalwa mani kat, ¿amput watwi dunin yamni karangyah?

³⁵Yamni awaski sau yakat dawak bubuh mahni kidika yakat bik. Kidika laih dauh ruhmnin dini.”