Read Mayangna Luk 19 Bible Online

Luk 19 - Mayangna bible

Luk 19

¹Jisas laih Jericó yakat ka'yaklawi tawan nuhni pasmunah bayakna dai.

²Kidika yakat muih al di duyang as sakdai ayangni laih Sakius, witing laih Roma dini tunan minit dadakwa muihni balna dai kidika taninatuna dai.

³Witing laih dukih kalana dai Jisas kidika amanglana atnin, kaunah sip talwasdai kat uba muih mahni dai kidika yulni dawak bik parahni dai kidika yulni.

⁴Kidika yulni tuna kiri kiwi pan as ma yakat kilna dai kidika yaihnit munah Jisas bayakwarang dai kidika yakat.

⁵Kidika yakut Jisas bayakwi kiwalik kauna ma yakat talwi aput kalyulna: —Sakius, kidika kaupak lakwah, kat warmani laih man ūma yakat watki ki.

⁶Sakius laih sirihni palni yaklakna dai, dawak kulnin alasna palni Jisas yakat kalpakna dai.

⁷Kidika tatalna mani kat, muih balna bitik Jisas niningkauh yuyulna dai, dutni muihni ūni yakat kiuna atwi.

⁸Bahang Sakius laih yaklau dawi Dawan yakat kalyulna: —Dawan, talah, di dutayang balna kidika bitik muih balna yakat papuswayah diaki ki; dawak muih as yakat dini malnayang kat, baisa wat arungka minit laktik kalaki ki.

⁹Jisas yaklau kalyulna: —Warmani adika ūni akat laihwi yaknin lani kidika kaina, kat adika alni bik sihm Abraham sulani bahang.

¹⁰Bahang muih Walanibis al kidika laih walwi laihwi yakna kaina didisna balna dai kidika yakat.

¹¹Muih balna kidika laih Jisas yaklau kidika yulni balna yulwakat dakawabangdai, dawak witing yaklau malni yulni as diyulna dai, kat Jerusalén kaupak ulis danadai kidika yulni, dawak muih balna laih Papang king kāwa sauni kidika, kidika usnit kat kiwi kawarangki atwi kukulna dai.

¹²Aput diyulna dai: “Rispik lani duyang alni as dai, witing laih pa nai sau ūk kau kiunadai, king kawi nawatwi kaina atnin.

¹³Kalahwi kiwas tanitkauh yakat, dini yamyang balna salap kidika yakat diyulwakat aina dai, dawak witingna muihnina kat kat lalah diawi aput diyulna dai: ‘Manna adika lalahni duta wark yamtanauh mampat mani yang nawattik aiwaki kat.’

¹⁴Kaunah sauni muihni balna kidika laih witing yakat dutni kalkukulwadai, dawak witing dangnit kaupak muih buas yakwi sisihna dai aput yulna atninna: ‘Yangna dukih yanawaski adika muihni yangna kingkina atnin.’

¹⁵“Kaunah witing laih king kawi sauni yakat nawatwi kiunadai. Kiwi kana mani kat, dini yamyang balna yakat diyulwakat uinadai lalah diana muihni balna dai kidika yakat, witing laih amanglanin dukih kalana dai witingna muihnina kat kat ampus minitkau lalana kidika.

¹⁶Tatuna kidika kiwi muhni yakat yaklauwi aput kalyulna: ‘Dawan, man lalahma kidika laih baisa minityakat wat salap minitkau bayakna.’

¹⁷King kidika yaklau nangnitlana: ‘Yamni palni ki; man laih di yamyang as yamni man; di bulah yakat barangni man dai kidika yulni, tawan salap pasyakat kabamint mahatayang.’

¹⁸Ūk kidika kiwi yaklauwi aput kalyulna: ‘Dawan, man lalahma kidika laih baisa minityakat wat singka minit kau bayakna.’

¹⁹Kidika alni yakat bik aput nangnitlana: ‘Man laih tawan singka pasyakat kabamint āwama ki.’

²⁰“Kaunah ūk as kiwi yaklauwi aput kalyulna: ‘Dawan, akat sakki man lalahma. Angsahr as kau surutik apaknayang sakdai;

²¹Bahang man yamamadunayang dai, kat man laih muih al as dadasni man kidika yulni, man laih laktasman pāni kaupak dulautaman dawak dahtasman pāni kaupak di minik balna yaktaman.’

²²Bahang king kidika yaklau kalyulna: ‘Di yamyang dutni, man silp yulma balna yakauna pāt yakat mahatayang. Muih al as dadasniyang kidika amanglataman dai kat, laktasyang pāni kaupak dulautayang kat dawak dahtasyang pāni kaupak di minik yaktayang kat,

²³¿ais yulni lalahki kidika bank yakat duyawasmandaih, nawattik aiwing kat minitkau bayakna kidika karak yana atnam?’

²⁴Dawak kidika yakat bangdai kidika muihni balna yakat diyulna: ‘Lalahni kidika dakyakta baisa minitkau wat salap lana muihni yakat kalatanuah.’

²⁵Witingna yaklau kalyuyulna: ‘Dawan, ¡kaunah witing laih uman baisa minitkau wat salap duwi!’

²⁶King kidika yaklau nangnitnalana: ‘Bahang manayultayang angdika muihni mahni duwa kidika laih minityakat baisa kalana karang; kaunah dis muihni kidika laih, ais duwa kidika bitik dakyakna karang.

²⁷Dawak yang nikingkauh yaklalauwa muihni balna witingna kingnina āwas atnik kukulwadai kidika balna niningnakauh laih, laihta duaita yang muhki yakat ītanauh.’ ”

²⁸Kidika yulna usnit kat, Jisas laih Jerusalén yakat kiunadai.

²⁹Betfagé dawak Betania ulis dana mani kat, Olib asangni yaihnit yakat, disainipil balna bu yakwi sihna dai,

³⁰aput diyulwīnah: —Tawan muhnityakat tawan bin as pakkidika yakat yawanauh, kidika yakat yawa āwanama mani kat, biriku as baisa muih as bik kilwas kidika as sitna sakkat talnama ki. Uluhta duaita yatanauh.

³¹Dawak muih as yaklauwi manayulwarang ais yulni uluhtamanah, Dawan yaklau yulwi kaltinama.

³²Disaipil balna kidika laih uinadai dawak Jisas yaklau amput diyulna dai kidika kaput yayakna dai.

³³Biriku kidika ululuhwakat, daniwan balna kidika yaklau diyulwi dakakana: —¿Ais yulni uluhtamanah?

³⁴Witingna yaklau nangnitnalalana: —Kat Dawan yaklau yulwa bahang.

³⁵Dawak praknina balna kau biriku minityakat ilwi Jisas yakat uiwi kalalawakat kilna dai.

³⁶Jisas laih ta yakat kiwakat, muih balna kidika laih asninana balna kidika ta yakat ririwadai.

³⁷Dawak Olib asangni yaklakwi kiwa yakat uiwi kakana mani kat, usnit uiyang muihni balna bitik laih alasna manah sarahwi Papang ayangni nuhni yayamna dai taldas dini yamwakat tatalna dai kidika yulni.

³⁸Aput yuyulwadai: —¡King as Dawan ayangni duwi kaiwa kidika laih ayangni nuhni yamna karang! ¡Kisang yakat laih kulnin aslah lani dawak ma yakat laih alasna yaksihni!

³⁹Bahang fariseo muihni balna buas muih pasyakat bangdai kidika balna yaklau kalyuyulna: —Maestro, usmat uiyang balna yakat dibiltah.

⁴⁰Kaunah Jisas yaklau nangnitnalana: —Manayultayang adika balna ap dadawarang kat, kipala balna kidika sararahwarang ki.

⁴¹Jerusalén ulis kiwi kana mani kat, Jisas laih tawan nuhni kidika talwi witing yulni kaidana,

⁴²aput yulwinah: “¡Man bik adika mani amanglataman kat laih man yakat kulnin aslah lani mawarang kidika! Kaunah waralaih kidika dini malni yakat sakbahang sip talasman.

⁴³Bahang man yakat ma dudutni balna kidika aiwarangki, man namangkauh yaklalauwa balna kidika yaklau yaihmat yakat daklalawarang ki, dawak maawaihdakwi makalbabauwarang ki pa balna bitik yakat,

⁴⁴Dawak bitik madaukakalwarang ki. Man yakat yalalahwa muihni balna kidika bitik ihiwarang ki, dawak man yakat kipala as bik dadawas karangki, kat man laih Papang malaihtik yakkuhti kaina minitni yakat amangnilatasman dai bahang.”

⁴⁵Kidika usnit kat, Jisas laih makat yulnin ūni yakat ka'yaklawi muih balna di bakanwabangdai kidika balna bitik kangwi yakmukna dai,

⁴⁶dawak aput diyulna: —Ulna yakat aput yulwi: ‘Yang ūki kidika laih makat yulnin ūni karang’, kaunah manna laih kidika yakat di malyang balna panina sulihni yamnamana.

⁴⁷Jisas laih ma balna bitik yakat makat yulnin ūni yakat sumalwadai, dawak sumalyang balna taninatuna balna, lā sumalniyang balna dawak tawan tanituna balna bik witing yakat īnin wawalwadai.

⁴⁸Kaunah amput yamninpa amanglalawasdai, kat muih balna bitik laih witing ais yulwa kidika yakat dakakawadai bahang.