Read Mayangna Luk 2 Bible Online

Luk 2 - Mayangna bible

Luk 2

¹Kidika mani balna yakat, king tanit nuhni Augusto yaklau yamnin yulna sau muihni balna bitik yakat ayangnina āna atnin.

²Adika tatuna muih ayangnina ānin kidika laih Cirenio Siria kabamintni kana sakkauna yamna dai.

³Muih bitik kidika witingna tawannina kat kat uiwi ayangnina āninna dai.

⁴Kaput bahang, José laih Galilea sauni Nazaret tawanni kaupak kalahna dai, dawak Belén, Judea yakat kiunadai, king Devid batahnna dai kidika pāni yakat, kat José laih Devid sulani dai bahang.

⁵Kidika yakat Mery karak uina dai ayangnina āna atnin, kat Mery laih witing karak kaldunin pramis dai dawak Mery laih kidika yakat muih karukdai.

⁶Dawak witingna Belén yakat raukat, Mery laih muihbin dunin mani kiwi kanadai.

⁷Dawak kidika yakat walanibis al tatuna batahnna dai, dawak muihbin animat kau tulwi turuh pupuwa pāni daklana pasyakat lakna dai, kat witingna panina as bik disdai bahang kakana pāni yakat.

⁸Belén yaihnit yakat sīp maintalyang balna buas bangdai, witingna laih pukta kidika di dahnin pāni yakat sīp maintalwi payahlalawadai.

⁹Sirihni palni Dawan innisal as witingna yakat dikalahna dai, dawak Dawan alasnina yaksihni kidika laih witingna yaihnitna yakat yaringni dahlna dai; dawak witingna laih uba palni yamaduduna dai.

¹⁰Kaunah insal kidika yaklau diyulna: “Manna yamaduduwinih, kat yul yamni as manayulna aiwayang, kidika laih muih bitik alasna yulni karang:

¹¹Warmani Devid tawanni yakat manalaihwi yakyang muihni as batahnna, kidika laih Mesías, Dawan kidika.

¹²Manna sain as dutanama, muihbin kidika amat binina kau tulwi turuh pupuwa daklana pasyakat tuskat talnama.”

¹³Kidika minitni yakat, insal kidika yaihnit yakat kisang insal ūk balna mahni bik kalalahna dai, Papang yakat ayangni nuhni yamwi aput yuyulwadai:

¹⁴“¡Papang yakat ayangni nuhniyamna karang mayakat! ¡Kulnin aslah lani sau akatwiting yamni ditalwamuihni balna pasyakat!”[3]

¹⁵Insal balna kidika kisang yakat iluina mani kat, sīp maintalyang balna kidika laih biri biri yulwi dakakana: —Bahang mawanang Belén yakat, di kalahna kat Dawan yaklau maiyulna kidika talna.

¹⁶Sirihni palni uina dawak Mery dawi José karak raukat tatalna dawak muihbin kidika bik turuh pupuwa pāni daklana pasyakat tuskat tatalna dai.

¹⁷Witingna kidika tatalna mani kat, muih balna yakat yuyulna dai insal yaklau muihbin yulni diyulna dai kidika,

¹⁸dawak muih balna dakakana bitik laih yamni dakakana dai sīp maintalyang balna yul yuyulwa kidika.

¹⁹Mery laih kidika di balna bitik kidika isning yakat ban āwi duwadai.

²⁰Sīp maintalyang balna niningnakauh laih, di tatalna dawak dakakana dai kidika yulni Dawan yakat ayangni nuhni yamni nawatwi aina dai, bahang witingna yakat amput diyulna dai kidika bitik rahm kaput kalahna dai.

²¹Ma tiaskaubās laihna yakat muihbin kidika laih Papang sainni ahana dai, dawak ayangni Jisas papakna dai, insal yaklau Mery muihkaruk kalahwas tanitkauh ayangni amput paknin kalyulna dai kaput.

²²Witingna maisihni dis kalahnin mani kiwi kana kat Moses lani balna yakat yulwa kaput, witingna muihbin kidika Jerusalén yakat duwi uina dai Dawan muhni yakat duwi uina atnin yulni.

²³Kaput yayamna dai kat Dawan lāni yakat aput ulna bahang: “Walabis al tatuna balna bitik laih Dawan dini yakna karang.”

²⁴Bahang witingna sakripais yamna uina Dawan lāni yakat yamnin yulwa kaput: buhtuku bikikisni bu kidik awaskat buhtuku wawahma binina bu.

²⁵Kidika mani yakat muih al as Jerusalén yakat yalahwadai ayangni laih Simeón. Witing laih muih al as la kat dai, Papang yakat manah ayangni nuhni yamwadai dawak bik Israel laihwi yaknin lani kidika tahawadai. Spirit Holi kidika laih Simeón karak dai,

²⁶dawak kalyulna dai witing laih dauwas karangki Mesías kidika talwas kat, Dawan yaklau sihwarang kidika.

²⁷Simeón laih Spirit Holi yaklau tanit kawak makat yulnin ūni yakat kiuna; dawak muihbin Jisas papangni balna kidika bik muihbin kidika duwi uina, lā yaklau yamnin yulwa kaput,

²⁸dawak Simeón laih muihbin kidika dulauwi duwi Papang yakat ayangni nuhni yamna, aput yulwinah:

²⁹“Waralaih, Dawan, man pramamis kidika yakat kalahna: sipki man dīma yamyang kidikakaldatang kat kulnin aslah lani karakdauna atnin.

³⁰Kat laihwi yaknin lani kidika laihuman talnayang

³¹tunan bahta yamnaman kidika tawan balna bitik miniknapa yakat,

³²yaringni as nisan balnaduduwarang kidika dawak kidika laih man tawanma Israelrisnipik karang kidika.”

³³Jisas papangni dawak nanangni kidika laih yamni dakakana dai Simeón yaklau muihbin yulni yulna kidika.

³⁴Bahang Simeón yaklau blis diyamna, dawak Jisas nanangni Mery yakat kalyulna: —Talah, adika muihbin laih Israel muihni balna mahni yakat diyamwakat bukna atninna dawak yaklauna atninna kalkulna ki. Witing laih sain as karang dawak muih mahni kidika witing yakat yamni kaltatalwas karangki,

³⁵muih mahni kulninna lani kidika ahni yakat lāih kalahna atnin yulni. Kaunah adika dini balna bitik laih man namangyakat sihm isparah kau solma yakat pawi lawa kapat karangki.

³⁶Kidika yakat bik sihm yal as sakdai ayangni laih Ana, witing laih Papang yulni yulyang as dai dawak witing laih Aser sulani kaupak Fanuel kidika walanibis yal dai. Witing laih uman muihbarak kalnadai. Witing laih sirau palni al duna dai, dawak alni karak kurih tiaskaubu yalalahna dai;

³⁷uman kurih 84 bayakna dai witing tingmak kalna kaupak.[4] Witing laih makat yulnin ūni kaupak kalahwasdai, kaunah witing laih madah dawak pukta yakat Dawan dini yamwadai, yuh wauhwi dawak minit yulwi karak.

³⁸Kidika minitni yakat Ana laih witingna muhnina yakat kiuna, dawak Papang yakat tingkih kalana dawak muihbin Jisas yulni kidika Jerusalén laihwi yakna atnin yulni tahahawa muihni balna bitik yakat diyulna.

³⁹Dawak lāni yakat yamnin yulwa kaput yamna usnit kat, Galilea yakat nawatwi uina dai, witing sauni Nazaret yakat.

⁴⁰Muihbin kidika laih barakwadai dawak baisa parasni kalwadai dawak bik baisa sins duyang kalwadai, dawak witing laih Papang yaklau yamni kaltalwadai.

⁴¹Jisas papangni balna kidika laih kurih bitik yakat Jerusalén yakat uiwadai insal kaiwi bayakna mani kasnin alasnina yakat.

⁴²Dawak kaput manah, Jisas witing kurih 12 laihna kat, witingna bitik kidika yakat uina dai, nining kaput uiwadai bahang kidika kasnin alasnina yakat.

⁴³Kaunah kidika mani balna bayakna usnit kat, witingna ū yakat nawatwi uiwakat, muihbin Jisas kidika laih Jerusalén yakat watnadai, kaunah papangni balna laih amanglalawas dai.

⁴⁴Jisas laih muih balna walsah yakat kiwi atwi kukulna, ma as ta lapapakna; kaunah usnit kat, wanaihni balna dawak kaltalyang muihni balna pasyakat walwi,

⁴⁵yakwas dadanadai. Kaput bahang Jerusalén yakat nawatwi uina dai walna atnin.

⁴⁶Ma bas bayakwakat usnit kat makat yulnin ūni yakat la sumalniyang balna walsah yakat yalahwi yulbauwakat dakawi dawak yul kalyulwi dakakawakat sakkat yayakna dai.

⁴⁷Dawak muih balna bitik witing sinsni lani yulbauwa kidika yakat dawak biriwi yul diyulwa kidika yakat yamni tatalna dai.

⁴⁸Papangni balna kaltatalna mani kat, amangnilawas dadanadai; dawak nanangni yaklau aput kalyulna: —Yang walakibis, ¿ais yamta adika yanayamtamahn? Papangma dawi yang karak kulnikna bukna karuk mawalnayangna.

⁴⁹Jisas yaklau nangnitnalana: —¿Ais yamta yawalnamanah? ¿Manna amanglatasmanah yang Papangki ūni yakat sak-atnik kidika?[5]

⁵⁰Kaunah witingna laih yul diyulwa kidika amanglalawasdai.

⁵¹Bahang witing watwi witingna karak kalpakwi Nazaret yakat kiunadai, kidika yakat witing papangni balna yulnina dakawi yalahna dai. Nanangni laih adika di balna bitik kidika isning yakat āwi duwadai.

⁵²Dawak Jisas laih muihni nuhni kidika dawak sinsni lani bik barakwadai, dawak Papang muhni yakat dawak muih balna muhnina yakat bik yamni kaltatalwadai.