Read Mayangna Luk 4 Bible Online

Luk 4 - Mayangna bible

Luk 4

¹Jisas laih Spirit Holi kalbangna palni Jordán wasni kaupak kilna, dawak Spirit yaklau kauhmak wanilang yakat duwi kiunadai.

²Kidika yakat ma 40 sakdai, dawak sitan yaklau traini talna dai. Kidika mani balna pasyakat di as bik kaswasdai, kaput bahang usnit kat yuh kallaihna dai.

³Bahang sitan yaklau kalyulna: —Rahm palni man kidika Papang Walanibis man kat, adika kinipala akat kalyultang kat plawar busna kalwang.

⁴Jisas yaklau nangnitlana: —Ulna yakat aput yulwi: ‘Muih kidika plawar busna kau manah sangka awas karang ki.’[7],

⁵Usnit kat sitan yaklau ma yakat dulauwi sau akat pa balna bang kidika bitik niningkawi,

⁶aput kalyulna: —Yang lawik adika parasni bitik dawak sau nunuhni balna kidika bik man yakat maki. Kat yang tingki yakat dunayang bahang, dawak yang lawik wais yakat kalanik dukih yāwarang kidika yakat kalaki ki.

⁷Man limbabahta yang akat manah ayangki nuhni yamma kat, adika bitik kidika man dīma karang.

⁸Jisas yaklau nangnitlana: —Ulna yakat aput yulwi: ‘Man Papangma Damawan yakat manah ayangni nuhni yamtah, dawak bik witing yakat manah dini yamtah.’

⁹Usnit kat sitan yaklau Jerusalén tawanni nuhni yakat duwi kiunadai, dawak makat yulnin ūni tuna yakat ilwi aput kalyulna: —Rahm palni man kidika Papang Walanibis man kat, akaupak sau yakat buktah;

¹⁰kat Ulna yakat aput yulwi: ‘Papang yaklau witing innisal balnakidika sihwarang ki mainmatalwi tamat kana atninna.

¹¹Witingna tingnina kau malaihwimadulalauwarang, man kipala minityakat buknam awas yulni.’

¹²Jisas yaklau nangnitlana: —Ulna yakat bik aput yulwi: ‘Man Papangma Dawan yakat traini talwinih.’

¹³Sitan witing Jisas yakat traini talnin dini ūk dis dawakat, witing kaupak naikau kalahwi kiunadai.

¹⁴Jisas laih Spirit Holi parasni kidika kalbuhng Galilea yakat nawatwi kiunadai, dawak witing yulni kidika sau balna bitik yakat yuyulwadai.

¹⁵Pa balna bitik kau Papang yulni sumamalwa ūni balna yakat kawi sumalwadai, dawak muih balna bitik laih witing ayangni nuhni yayamwadai.

¹⁶Jisas laih Nazaret yakat kiunadai, barakna dai kidika tawanni yakat. Yakurupdinin mani[8] yakat Papang yulni sumamalwa ūni yakat kanadai, witing nining yamwadai kaput, dawak kasakni yaklauwi ulna yulni balna kidika yulwi talna dai.

¹⁷Prapit Isaías ulna wauhnitaya kidika yulwi talnin kalalana dai, dawak kurahna pāni yakat aput ulna sakdai:

¹⁸“Dawan Spirit kidika laihyang mikit yakat ki, kat witing dini yayakna bahang muih miniknakunni balna yakatyul yamni kidika uiwi diana atnin; silak muihni balna yakatyul yamni kidika diyulnin yasihna dawak muih miniknapa dis kidikaminiknapa diana atnik; tataihwa muihni balna yakatpri lani diana atnik;

¹⁹Dawan yamni talna kurihni kidikamuih balna yakat sumalna atnik.”

²⁰Usnit kat Jisas yaklau wauhtaya kidika putwi Papang yulni sumamalwa ūni yakat di yamwa muihni yakat kalawi yalahna dai. Kidika yakat muih balna bangdai kidika bitik witing yakat manah kaltatalna dai.

²¹Witing tatuna yulbauwi aput yulna dai: —Warmani adika wauhnitaya ulna adika kaput kalahna manna muhmana yakat.

²²Muih balna bitik laih Jisas yulni yamni manah yuyulna dai dawak di yayamni balna yulwa kidika yakat dakawi yamni tatalna dai. Biri biri aput yulwi dakakana dai: —¿Adika awasyah José walanibis kidika?

²³Jisas yaklau nangnitnalana: —Rahm palni manna lawa adika sinsni lani yayultanama: ‘Daktar, man alas kalyamtah.’ Dawak baisa kidika minityakat yayultanama: ‘Capernaum yakat yamtang kat dakanayangna kidika, man sauma akat bik yamtah.’

²⁴Dawak tanityakat baisa aput yulwi kiunadai: —Rahm palni manayultayang prapit as bik witing sauni yakat laih yamni kalyayamwas ki.

²⁵Rahm palni, Israel yakat tingmak balna mahni bangdai prapit Elías mani balna dai yakat, kurih bas minitkau papusbah was lauwas dawak sau bitik yakat yuh lakna dai mani yakat;

²⁶kaunah Elías laih Israel muihni balna tingmak as yakat bik sihwasdai, kaunah Sarepta muihni tingmak as yakat sihna dai, Sidón tawanni nuhni kidika yaihnit yakat.

²⁷Prapit Eliseo mani balna yakat bik Israel yakat pilau sikninis duyang muihni balna bik mahni bangdai, kaunah witingna kaupak as bik laih yamni kalalahwasdai, kaunah Siria kaupak Naamán kidika manah yamni kalahna dai.

²⁸Kidika dakakana mani kat, Papang yulni sumamalwa ūni yakat muih balna bangdai kidika bitik kulninna daukakalna dai.

²⁹Yaklauwi tawan kaupak kangwi yayakna dai Jisas yakat, dawak asang tuna tawannina yayamna pakdai kidika yakat duwi iluina dai, kidika kaupak sau yakat ruhmlakna atnin yulni.

³⁰Kaunah Jisas laih witingna pasmunah bayakwi kiunadai.

³¹Jisas laih Capernaum yakat kiunadai, Galilea tawanni as yakat, dawak yakurupdinin mani yakat muih balna yakat disumalwadai.

³²Dawak muih balna kidika laih Jisas amput sumalwa kidika yakat yamni tatalna dai, kat witing parasni karuk yulbauwa dai kidika yulni.

³³Papang yulni sumamalwa ūni yakat spirit dutni duyang muihni as sakdai, kidika muihni yaklau parasni yulwi sarahna:

³⁴—¡Yanadatah! ¿Jisas Nazaret kaupak ais yamta yangna yakat yanaustamahn? ¿Yanadaukalmukna aiwanamahn? Yang laih amangmalatayang, man laih Papang Holi man kidika.

³⁵Jisas yaklau kidika sitan yakat bilwi aput kalyulna: —¡Apdatah dawak kidika alni yakat datah! Bahang sitan yaklau muih al kidika sau yakat ruhmlakna muih balna bitik muhnina yakat, dawak witing kaupak kalahna dai dutni as bik kalyamwas.

³⁶Muih balna kidika bitik yamaduwi biri aput yuyulna: —¿Adika ais yulni balnayah? Adika alni witing parasni bitik karuk spirit dudutni balna yakat kalahnin diyulwakat, ¡witingna laih kalalahwi!

³⁷Dawak Jisas yulni laih kidika sauni pa balna bitik yakat yuyulwadai.

³⁸Jisas laih Papang yulni sumamalwa ūni kaupak kalahwi Saiman ūni yakat kanadai. Saiman unisah yal kidika laih yamah parasni kallaihna tusdai, dawak witing yulni Jisas kalnidinit bubukna dai.

³⁹Jisas laih yal kidika minityakat abukwi yamah yakat bilna, dawak yamah kidika laih kaldana dai. Kidika minitni yakat, yal kidika yaklauwi dinina yamna dai.

⁴⁰Masan yakat, siknis satni balna duduwadai kidika Jisas yakat duwi uinadai, dawak Jisas yaklau witingna minitna yakat tingni dulauwakat sikninanis kaupak yamni diyamna dai.

⁴¹Siknis muihni balna mahni kaupak bik sitan balna kalalahna dai, aput yulwi sararahwadai: —¡Man kuduh Papang Walanibis! Kaunah Jisas laih sitan balna yakat dibilwadai dawak bik didawakat yulbabauwasdai, kat witingna laih amanglalawadai bahang witing laih Mesías kidika.

⁴²Payahlawakat, Jisas laih tawan nuhni kaupak ahni nai pa as kau kiunadai. Kaunah muih balna kidika laih kalwalwi witing sakdai yakat uinadai. Laihwatnin kukulna dai kiwas atnin yulni,

⁴³kaunah Jisas yaklau diyulna: —Papang king kāwa sauni yulni yamni kidika bik tawan ūk balna yakat diyulnik ki, kat kidika yulni yasihwakat aiwanayang.

⁴⁴Jisas laih kaput yul yamni kidika sumalwi kiwadai Judea[9] sauni yakat Papang yulni sumamalwa ūni balna bang bang yakat.