Read Mayangna Deuteronomio 10 Bible Online

Deuteronomio 10 - Mayangna bible

Deuteronomio 10

¹“Bahang Dawan yaklauwi yayulna: ‘Man kipala lababanni bu yakta, sihm tatuna dai kapat, data pan kau baks as yamta watta asang yakat ilyawah mayang karak yulbaunin.

²Bahang yakat yang lawik wattik lā balna tatuna ulnayang dai kidika wattik ulna awaki, kat kinipala balna dai kidika man lawa ruhmta bahnaman bahang, kidika adika lani balna wattik ulki mani, man lawa baks yamna man yakat apahna awama.’

³“Bahang yang mahka kidika baksni yamna yang, acacia tatni kau yamna yang, kipala labanni bik bu yamna yang, datik wattik asang yakat dutik ilwik yawanayang.

⁴Bahang papang yaklauwi watwi la balna salap dai kidika ulna, tatuna mayang asla kaluduhna bangmayang kat asang mayakat kuh dahlwa paskaupak, yul maibauwadai kaput,

⁵ulwi yawa kat, yang asang kaupak mahka lahwak aiwanayang; bahang usnit kat Dawan yaklauwi adar yana, yakat lā balna ulna kidika baks pasyakat ānayang, bahang ban bangki.

⁶(Israel walanbis balna kidika Beerot-bene-jaacán dawak kidika kaupak Mosera sauni nining yakat uina. Kidika Aarón dauna dawan nununa dai, adika sauni yakat laih was manas palni dai.

⁷Kidika kaupak bayakwi uiwa dai Gudgoda kat bahang Gudgoda kaupak bayakwi Jotbata sauni kat uiwa dai adika sauni yakat laih was manasdai.

⁸Adika pāni yakat kuduh Dawan yaklauwi Leví sulani paskaupak walwi yakwadai, pramis baksni kidika trukwi Dawan nuhni yakat duwi kiunin dawi bik witingna yaklauwi Dawan muhni yakat prias yamnin, bliskalyamnin witing ayangni karak, warmani yayamwa kidika kaput.

⁹Kidika bahang libait balna kidika kalwirah pasyakat, witingna silp dinina kapat duduwas dadana, kat witingna dinina kidika kuduh Dawan, dawak Dawan witing palni yulna kaput.)

¹⁰“Yang asangma yakat sakyang dai madah 40, dawak pukta bik 40, sihm tatuna ilwik yawanayang dai praisni, kaput bik adika mani balna bik Dawan yang kau yadakana, manna kau bik manaiwi disnin kidika kulwaski,

¹¹kaunah aput yayulna: ‘Man ridi alahwa yawa tawan tatuna dutah kaput laih, muihmanabararak balna kau sau yamnin dianin pramis alahwanayang kidika dakyakta dunamna yulni.’

¹²“Israel walanbis balna waralaih dakanauh, ¿Dawan, Papangmana kidika manna kaupak ais dunin yulwih? witing risnipik kalanin yulwi, dawak manna bitik tani kidika yakat yawanamna, witingna yakat mamatna yulnamna parasmana dawak solmana bitik,

¹³witing lāni balna kidika bitik yamnin, kaput laih yamni atnamna yulni.

¹⁴Manna amanglatanauh Dawan Papangmana kidika witing dini balna, makau kisang dawak sau, kaput bik kidika paskau di balna bangkidika bitik witing dini balna.

¹⁵Kaput kaunah Dawan dukih kalana dai muihmanabararak balna kidika, kidika kaupak sulani balna kidika duna, kidika kuduh manna, tawan balna paskau bangmana kidika, warmani talnamna sipki.

¹⁶“Manna kulnamna yakat ātanauh, pramis markni kidika, ban laih dutni yamwi uiwinih,

¹⁷kat manna Papangmana kidika laih Papang balna Papangnina dawak dawan balna Daninawan; witing laih Papang, la muihni parasni bitik duwi, parasni nuhni duwi dawak bik yamadahngni ki, muih balna kidika satuk satuk talwaski, dawak bik sip muih yaklauwi kulnin laihwas ki, di prisant kalawi;

¹⁸witing warau balna kau dawak tingmak balna kau bik la kat yamwi, dawak dalani ditalwi, bayahwi, praknina diawi pa ūk muihni balna manna pasmangna kau yalalahwa.

¹⁹Kaput bahang, manna muih pa ūk kaupak balna kidika dalani talnauh, kat manna bik Egipto yakat pa ūk muihni mana dai bahang.

²⁰“Manna Damanawan yakat ayangni dulautanauh, dawak witing yakat manah mamatna yultanauh; barangni awanauh witing yakat, di as kat witing ayangni kau yakwi yulni kat, yakta yultanauh.

²¹Kat manna laih witing yakat kuduh ayangni nuhni yamtanama kidika; witing kidika Papangmana, manna yulmana adika di balna yamna, taldas dini balna kidika.

²²Manna muihmanabararak balna Egipto yakat uina kidika muih 70 manah dai, kaunah waradika laih manna Papangmana yaklauwi mahni manayamna, sihm makau yala balna kapat mahni.