Read Mayangna Deuteronomio 11 Bible Online

Deuteronomio 11 - Mayangna bible

Deuteronomio 11

¹“Manna Dawan Papangmana yakat dalani talnauh, dawakat witing lāni balna yakat yamtanauh.

²Warmani amanglatanauh Dawan dawak Papangmana yaklauwi barangni manayakwa kidika, manna walamanabis balna kidika laih amanglalawaski dawak bik tatalwaski. Witing nuhni kidik dawak parasni nuhni duwa kidika amanglatanauh,

³dawak sain nunuhni yamna kidika Egipto yakat, Fero niningyakat dawak sauni niningyakat bik,

⁴Egipto muihni kalbauyang balna kau diyamna kidika, aninaras balna, kārnina, amput kuma pauni wasni yakat āmukna kidika, witingna manna yakat manauiwi aiwak. Dawan yaklauwi imukna karang.

⁵Kaput bik manna ismangna kattanauh manna yulmana kauhmak wanilang yakat di yamna balna kidika, manna akat aiwa āwanamana kat;

⁶kaput bik Datán dawak Abiram, Eliab walanibis balna, Rubén sulani balna, sau wakahwi ukmukna kidika wanaihnina balna, dawak ūnina lababanni balna bitik, dawak di duduwa balna bitik, Israel balna muhnina yakat.

⁷Manna palni witnis mana Dawan di balna mahni yamna kidika.

⁸“Warmani lā balna mananayang kidika bitik yamtanauh, kaput parasni kalnamna, kalbauta minit bayakta sau dutanama kidika,

⁹kaput laih ma mahni yalahnamna Dawan yaklauwi sau dianin pramis yamna dai kidika muihmanabararak balna yakat, dawak sulamana balna yakat bik; sau as tāwas dawak amak kidika was kapat kira kidika.

¹⁰Manna kalbauta minit bayakta sau dutanama kidika laih sihm Egipto kapat ki, manna kidika kaupak alahwanamana kidik, manna yakat di dahtamana dai, di miniksani balna kidika kalmana kau ratamana dai, di dadahwa pāni yakat,

¹¹kaunah manna sau as āwa dutanama kidika laih asangpas dawak sau langni bik duwi, dawak makau kisang kidika kaupak was kaiwi utuhwi.

¹²Kidika laih sau as, Dawan yaklauwi maintalwi, kidika yakat manah talwi minikpa kidika, kurih bitik yakat.

¹³“Warmani lā mananayang yakat yamtanama kat, Dawan Papangmana yakat dalani tala, manna kulnamna bitik kau dawak solmana bitik kau bik,

¹⁴witing yamwarang[5] dawak was kidika kaiwarang awarni kat, kaput laih manna plamanawar minik kidika yakta dutanama dawak, wain, disala bik dutanama.

¹⁵Kaput bik yamwak dibasta balna kidika ukuswarang asangpas yakat, tingmanalau balna kasninna, kaput bik kasnamna manas dunamna.

¹⁶Kaunah amungtalnauh datanang alas manayuyulwarang; Dawan kaupak naikau alahwa dawan dauh balna yakat prinias yayamwinih; kidika balna yakat limbabahwinih,

¹⁷kat Dawan manna namangna yakat yaklauwarang, dawak kalawak was bik lauwas karang; kaput laih sau bik di minik balna yakwas karang, kaput laih sirihni palni dautanama sau yamni yakat, Dawan yaklauwi sau manawarang kidika.

¹⁸“Adika yulni balna adika kulnamna yakat āta dutanauh; sain kapat bik sittanauh tingmana dawak sapamana yakat bik.

¹⁹Kidika sumaltanauh walamanabis balna yakat, ūpas yakat dawak tapas balna yakat bik, alangwamana dawak lawamana yakat bik.

²⁰Ūmana kalni balna yakat dawak dūr yakat bik ultanauh,

²¹kaput laih manna sangmanaka dawak walamanabis balna sangninaka bik, Dawan yaklauwi muihmanabararak balna yakat sau dianin pramis yamna dai kidika naini kalwarang makau kisang dawak sau yamna kapat karang.

²²“Warmani lā manatayang kidika yakat yamtanama, dalani talamana kat Dawan Papangmana yakat, witing tani yakat barangni yawanama kat,

²³dawak Dawan yaklauwi manna muhmana kaupak ruhmwi yakwarang dawak manna laih tawan tanit mahni dawak bik pararasni balna kidika minit bayaktanama.

²⁴Angdika manna kalmana taihtanama kidika, yakat wattanama. Lainmana kidika kauhmak wanilang kaupak líbano kat karang, dawak Eufrates wasni kaupak Mediterráneo kumani kat karang.

²⁵Muhmana yakat muih as bik sip-awas karang. Dawan Papangmana kidika yaklauwi yamwak muihsak dadauwarang, angkat pāni bayaktanama balna bitik kidika, witing pramis yamna yakat.

²⁶“Adika mani manatayang manna laihta duna atnamna blisin kidika awaskat latuhna kidika.

²⁷Blisinni karang, Dawan Papangmana lāni kidika kat yamtanama kat, warmani manatikda kidika.

²⁸Latuhna karang, dawan dauh balna usnitna uitanama kat, Dawan Papangmana lani dakas awanama kat, dawak witing tani kaupak alahwanama kat warkmana manawada kidika.

²⁹“Dawan Papangmana yaklauwi manawak awanama kat, Gerizim asangni yakat ayangni nuhni yamtanama, dawak latuhna kidika laih Ebal asangni yakat.

³⁰Adika asangni balna laih Jordán wasni nakas yakat rauki, makawa niningkau ta kiwa yakat, Cananeo balna saunina, sau langni kau yalalahwa kidika, Gilgal muhnit kau, dawak More kirahni balna yaihnit yakat.

³¹Manna Jordán wasni kidika daklawanamna manah ki, Dawan Papangmana yaklauwi sau manawarang kidika kalbauta minit bayakta dunamna. Minit bayakta dakyakta dutanama kat, kidika yakat yalahtanama,

³²manna mahka palni adika lani balna manatayang adika yamtanama.