Read Mayangna Deuteronomio 14 Bible Online

Deuteronomio 14 - Mayangna bible

Deuteronomio 14

¹“Manna kuduh Dawan Papang walanbis balna mana. Muihmana yakat dadakwinih, dawak basmana bik dadakwinih muih as dauwak.

²Kat manna laih tawan as Dawan Papang dini manayakna; sau akat tawan balna bitik paskaupak manawalwi yakna, witing dini atnamna.

³“Maisihni kidika kakaswinih.

⁴“Adika dini balna laih sipkarang kasnamna: turuh, sīp almuk, kuts,

⁵sana satni balna, asangpas kutsni balna dawak ūk balna bik.

⁶Kaput ki bahang tinglau karang, asangpas dini karang tamni dawak tipisnimak awas kat, susni sahna duwa dawak dibasta kaswa balna kidika kasnin yamni kulna ki,

⁷kaunah adika balna laih kastas awanama, dibasta kasyang balna karang dawak susni sahna karang bik: “Kiamil, tibam satni; kidika laih maisihni kulna karang, dibasta kaswi kaunah tipisnimak sahwas bahang.

⁸“Kusih kidika tipisnimak sahna kaunah dibasta kaswaski. Kidika bahang maisihni kulnin ki. Adika dini muihni balna kakaswinih, laihnin bik awaski dadauna kat.

⁹“Waspadini balna kisini duduwa kidika laih kastanama,

¹⁰kaunah kisini dakah silini dis kidika kakaswinih; kidika laih maisihni kulnamna ki.

¹¹“Dilawani balna kasnamna kidika,

¹²kaunah pas yakat as as laih kasnamna sip-awaski: yakalnuh, dawak yakal satni balna kidika,

¹³dawak yakal bikikisni balna kidika bik,

¹⁴kuparis balna,

¹⁵uhu nuhni, kubam, yami satni bik,

¹⁶mukmuk, kuma paskau yami kapapat satni balna kidika bik,

¹⁷awahta, upam, kuma kupaniris.

¹⁸Yami nuhni abubilla dawak umis.

¹⁹“Di muih satni lawani duwa bitik kidika dutni kulna ki. Sip-awaski, kasnin.

²⁰Kaunah dilawani duwa balna yamni kulna kidika laih sipki kasnin.

²¹“Tinglau as, kidika awas bik, asangpas dini alas dauna kidika manna kasnamna awaski, kat manna kidika kuduh tawan as Dawan Papang yaklauwi dini yakna bahang, kaunah sipkarang pa ūk muihni pasmangna yakat yalalahwa balna yakat dianam; witingna laihtak sipki kasninna. Kaput bik sip karang bakamnamna, pa ūk muihni kaiwi bayakwak. “Kuts baisa dibin ta suwa kidika iwi lahwinih.

²²“Kurih bitik manna damatnakahnin awaski, di dahta minik yaktamana bitik kidika salap tunan minit kidika yaknamna karang ki.

²³Adika salap tunan minit yaknin kidika kuduh, wain balna dahta minik yaktamana kidika, dawak disala balna yaktanama kidika, kaput bik tumanaruh balna, sīpmana balna walanbis tatuna sahwarang kidika manna bitik kalpakta Dawan Papangmana muhni tani yakat kastanama, witing pa walwi yakwarang yakat, kaput laih Dawan yakat risnipik kalanin kidika lan alahwanamna.

²⁴Kaput bik manna dimana balna yakat Dawan blisyamna kidika yulni, yakat kalanin yulni, salap tunan minit kidika yaktamana, dawakat adika dini balna bik Dawan pa as walwi yakna yakat duta yawanama,

²⁵dini balna kidika wauhta bakanta, lalahni kidika duta yawanama, Dawan pa as yakna pāni yakat.

²⁶Bahang kidika lalahni kau manna angdika dini as bakannin kultanama kidika: turuh almuk wark kalahyang, sip karang, wain karang kidika awas kat wain dinin satni, kidika awas kat manna ais as bakannin kultanama kidika bakanta, Dawan Papang muhni yakat bitik kalpakta kastanama, ūmanapas muihni bitik karak.

²⁷“Manna tawanmana yakat libait muihni balna yalalahwa kidika ruhmwi dadawinih, kat witingna palni saunina duduwas bahang, manna dunamana kapat.

²⁸“Kurih bās bayakwa bitik yakat, di minik dahta yaktamana kidika kaupak sahyakna salap kidika yakta awanama, dawak tawanmana nuhni yakat puta awanama,

²⁹libait muihni balna aiwarang mani kat, witingna laih saunina duduwas kidika, kidik awaskat pa ūk muihni balna manna pasmangna yakat yalalahwa kidika, kidik awaskat papangnina dis warau balna kidika, dawak tingmak balna kidika kauna, kaswi minitnatang bayak atninna. Kaput laih Dawan Papangmana kidika yaklau blismanayamna karang, ais ais yamtamana kidika bitik yakat.