Read Mayangna Deuteronomio 16 Bible Online

Deuteronomio 16 - Mayangna bible

Deuteronomio 16

¹“Abib wainiku kidika kiwi kawakat insal kaiwi bayakna kidika alasnina yamtanama, Dawan Papangmana risnipik kau, kat pukta as sihm kidika puknita as kapat kat Egipto kaupak Dawan yaklauwi manayakna dai bahang.

²“Adika alasnina yamtanama yakat kuduh, Dawan Papangmana yakat turuh yal, sīp sakripais yamtanama, witing yaklauwi walwi yakna pāni yakat.

³“Sakripais yamna dinimuihni kidika kastanama plawar pupuhnin āwas busna kidika karak. Ma tiaskaubu plawar pupuhnin dis busna kidika kastanama, kidika laih wauhnin planiwar busna kidika, kat Egipto kaupak sirihni palni alahwanama bahang; kaput laih manna sangka awanama mani balna yakat, Egipto kaupak alahwanamana kidika kulta awanama.

⁴Adika ma tiaskaubu pasyakat manna saumana bitik yakat plawar pupuhwa dini kidika dis atnin ki, di muihni sakripais yamtamana kidika ma tatuna yakat, apis bik danamna awaski payahwak kau kasnin.

⁵Manna sakripais yamnamna kidika, tawan nuhni pini balna yakat yamnamna awaski, Dawan Papangmana manana kidika balna yakat,

⁶kaunah witing ayangni sak-atnin pāni as walwi yakna yakat yamtanama, kidika laih ma ulahu yakat yamtanama, Egipto kaupak alahwanamana awarni yakat.

⁷Dimuihni kidika lahtanama, dawak kastanama, Dawan Papangmana yaklauwi pa walwi yakna yakat, dawak payahwak ūmana kau yawanama.

⁸Ma tiaskauas plawar pupuhnin āwas busna kidika kastanama, dawak ma tiaskaubu yakat alasna nuhni yamtanama Dawan Papangmana risnipik kau; kidika manna wark as bik yamtas awanama.

⁹“Wīk tiaskaubu bayakwak usnit kat, plawar minik bahnin mani kana kidika yakat,

¹⁰manna wīk alasnina kidika yamtanama Dawan Papangmana risnipik kau, dawak minitdis kalanin dini kidika duyawanama, Dawan Papangmana blisyamna kidika.

¹¹Bahang manna Dawan Papangmana muhni yakat alasna yamtanama, witing yaklauwi pa walwi yakna kidika ayangni sak-atnin yakat, walamanabis balna dawak dimana yamyang balna karak, libait balna, pa ūk muihni balna, warau balna dawak tingma balna karak bik manna pamana yakat yalalahwa kidika.

¹²Manna yamni ismangna aitanauh kat Egipto sauni yakat manna bik waraumana dai bahang, adika lani manatayang kidika laihta yamtanauh.

¹³“Manna plawar minik bahnin kidika dawak wain ataknin kidika bik dahnkalwak, ma tiaskaubu alasna yamtanama ū labanni balna yamta.

¹⁴Bahang manna bitik walamanabis balna, dimana yamyang balna karak kalpakta alasna dutanama, libait balna, warau balna dawak tingmak balna tawanmana nunuhni yakat yalalahwa balna kidika.

¹⁵Adika alasnina Dawan Papangmana risnipik kau yamtanama ma tiaskaubu praisni, witing yaklauwi pa walwi yakna yakat; kat Dawan Papangmana yaklauwi di minik bahtamana kidika bitik blisyamwarang bahang, bahang manna bitik laih yamni awanama.

¹⁶“Muih ahal bitik kidika, kurih as pasyakat wat bas Dawan Papangmana muhni yakat yawanama, witing pa as walwi yakna yakat, adika alasnina balna yakat: plawar pupuhnin dis busna kakaswa alasnina kidika, wīk alasnina dawak ū labanni alasnina kidika bik. Muih as bik tingni yakat di dis kiwas karang,

¹⁷kaunah muih bitik kidika minitdis kalanin kidika duwi uiwarang, Dawan Papangmana yaklauwi dimana balna yakat blisyamna kidika kaupak.

¹⁸“Wihta balna ātanauh tawan nunuhni balna bitik yakat, Dawan Papangmana yaklauwi manawarang kidika sulani balna bitik mana yakat, kaput laih tawan yakat la kat lanina yamna atnin.

¹⁹La kat yamnin kidika daukakalwinih; muih balna kidika buas nuhni, ūk balna kidika dauh kapat laih dikulnin awaski; datanangkat muih tāmanadunin awaski, kat muih tani duwa kidika laih minikna puklakwi sins duyang kidika, dawak la kat muihni yulni balna kidika daukalpamwi.

²⁰Lakat, dawak lakat kamanah usnit uinamna ki, kaput laih Dawan Papangmana sau manana yakat yalahna atnamna.

²¹“Pan as bik dadahwinih, dawan dauh kau mamatna yulnamna, dawak Dawan Papangmana kau sakripais busnin pāni yaihnit yakat dadahwinih.

²²Kipala bik dulalauwinih dawan dauh kau mamatna yulnin, kidika laih Dawan Papangmana dutni talwi.