Read Mayangna Deuteronomio 18 Bible Online

Deuteronomio 18 - Mayangna bible

Deuteronomio 18

¹“Sumalyang libait balna, yuldarang kat, Leví sulani balna bitik, witingna laih sihm Israel walanbis di duduwa kapat duduwas karangki. Papang kau sakripais yayamwa kidika kaupak laih witingna sangka karangki, bahang kaput laih sakripais yayamwa kidika kaupak witingna dinina bik sakkarang ki.

²Witingna silp dinina kapat laih duduwaskarang, witingna sau aslah ūk balna kapat, kat witingna dinina kidika laih Dawan karang bahang, witing yulna kaput.

³“Sumalyang balna witingna rahmnina duduwa kidika turuh sakripais yayamwa kidik, kidika awaskat sīp balna sakripais yamnin muih balna duahaiwa kidika laih aput karang: dangni kidika, kananmak dawak bani salani kidika bik,

⁴dawak plawar minik balna, wain dawi di sala balna bik tatuna kalahwa kidika witingna duduna karang, kaput bik sīp butuni tatuna dadakwa balna kidika bik;

⁵kat witingna kidika Papang yaklauwi di walwi yakna bahang, sulani balna bitik paskaupak, kaput laih papangnina kaupak walaninabis balna kat ban kaput witingna tingnina yakat karang Papang yakat prias yamnin kidika.

⁶“Libait as, manna tawanmana paskaupak, Israel pāni angkat angkat kaupak, witing kidika Papang yaklauwi pa yakwi duna yakat kaiwi,

⁷witing kidika yakat sip karang sumalyang warkni kidika yamnin, Papang ayangni kau, sihm witingna libait muihni ūk balna kidika pāni yakat Dawan warkni yayamwa kapat,

⁸dawak witing di ampus duduwa kidika kaput duna karang, papangni kaupak di duwarang kidika baisa minit yakat.

⁹“Manna angkat mani Dawan Papangmana sau manawarang yakat awanama kat, kidika pāni muihni balna lanina dutni duduna kidika usnitna uhuiwinih.

¹⁰Manna pasmangna kaupak muih as bik walamanabis kuh kidika kuhkau sakripais bubuswinih, dawak bik di malni balna kau kidika bik yakwi yuyulwinih, kaput bik baisa matakitkau di balna kaiwi kalahwas kidika bik yakwi yuyulwinih, dawak sukiah lani bik yayamwinih

¹¹miniklanin lani bik dunin awaski, sukiah balna kau bik di diyulwi dakanin-awaski, spirit balna kau bik walnin-awaski, dawak dadauna balna yakat bik walnin-awaski.

¹²Kat Dawan laih dutni talwa bahang kidika dini yayamwa kidika. Dawan Papangmana yaklauwi kidika muihni balna manna muhmana tani yakat ruhmwi dawa kidika tanka laih kidika lani dutni duduwa bahang.

¹³Kidika bahang manna laih barangni atnamna ki Papang karak.

¹⁴Kidika muihni balna sauni kidika manna dutanama, kat baisa di kaiwi kalahwas kau yakwi yuyulwa muihni balna yakat yulnina dakakawa bahang, kaunah manna laih Dawan Papangmana yaklauwi kidika yamnin manawas ki.

¹⁵“Manna Dawan Papangmana yaklauwi yamwak manna pasmangna kaupak prapit as kalahwarang, sihm yang kapat, bahang witing yulni daka yamtanama.

¹⁶Adika kuduh manna palni lawa Dawan Papangmana yakat yulnamana dai kidika Horeb asangni yakat, manna bitik kaluduhnamana dai mani aput yulnamana dai: ‘Watdi dakakih mayawaski mapapangki dinit, dawak bik kuh nuhni dahlwa kidika bik talkih mayawaski, daunin-awas yulni.’

¹⁷Kaput laih Papang yang akat yayulna: ‘Yamniki manna yultanda kidika.

¹⁸Yang lawik yamtingkat witingna pas kaupak prapit as kalahwarang sihm man kapat, sihm witingna aslah balna kidika paskaupak atnin karang, kaput laih yang lawik yul balna yulnin kalyultayang kidika bitik laih wirlawi diyulna karang, dawak bik watwi lamwi yulnin pakki kidika bik yulna karang.

¹⁹Adika prapit yang ayangki kau yul balna yulwa yakat dakakawas karang kidika balna bitik laih witingna yakat dilaihna awaki.

²⁰Kaunah prapit as kalahwi yang ayangki kau duwi yulwarangkat, kaunah yang lawik yul as bik kalyultasyang dai kat, kidika-awas bik dawan dauh ayangni kau duwi yulwarang kat, kidika laih daunin yakat wirlana karang.’

²¹Dawak manna kultamana kat: ‘¿Amput amangladarangyah, yul balna yulwa kidika Papang yulni awaskat?’, adika manna amanglanamna ki:

²²Adika prapit yulna balna kidika yakat kalahwas karang kat, kidika sainni laih Papang yulni-awas ki, kaunah prapit witing alas kulnin kaupak yulni; kidika bahang yamaniduduwinih.