Read Mayangna Deuteronomio 19 Bible Online

Deuteronomio 19 - Mayangna bible

Deuteronomio 19

¹“Manna Dawan Papangmana yaklauwi kidika muihni balna bitik iwi dis yamwi, saunina kidika manna yakat manana karang kat, manna tawannina nunuhni balna dawak ūnina balna kidika bik dutanama,

²tawan nunuhni kidika bās yaktanama manna Dawan Papangmana yaklauwi manawa kidika,

³dawak kidika yakat kiwa tani balna kidika bitik watta laihta dulauta yamna mana karang. Baisa kidika minit yakat, manna Papangmana sau manana kidika bās sahyaktanama, kaput laih wais wais muih iwarang kat kidika sauni pāni balna yakat kawi yakmaldinin.

⁴Muih ina muihni kidika yakat kāwi yakmaldi sangnika laihwi yaknin, witing yamna kidika lāih yakwarangkat ting yamwas kidika, dawak bik kidika muihni karak kalwaihla awasdai kidika.

⁵Tanka baisa laih mana yulnik kat; muih as kidika muih ūk karak kalpakwi asangpas yakat uiwi kuh walwatulu kaunah as, kidika, ki kalni dutwi bauwi ina karang kat, as sangka kidika sip karang kidika tawanni, yakat kiri yakmaldi yaklaunin.

⁶Kaunah tawan ūk kau lana mana kidika tani naini karang kat, sip karang muih dauna kidika wanaihni kulnin dutni palni kulwi muih al ūk ban ting iwas dai yakat uiwi laihwi inin sip karang, kaunah muih alas kidika daunin laih la awas dai, kat ting iwas dai babang.

⁷Kidika bang manna kau mana yulta yang, tawan bās kidika silp yakat latanama,

⁸kaput bik manna Papangmana yaklauwi, muih mana bararak balna duduwa dai kidika baisa nuhni mananin pramis yamna yakat yamwi,

⁹saumana kidika baisa nuhwarang mani, manna bik yakmaldi yaklaunin tawanni kidika bik baisa bās minit laktanama (angdika mani adika lāni yakat yamtanama kat, yuldarang kat Papang kulnin lani kat yamta, tamatna yakat yawanama.)

¹⁰Kaput laih manna Papangmana sau manawarang pasyakat ā as dauh laih sau yakat utuhwaskarang, kaput bik manna tunamana yakat, muih as ban pini daunin putni kidika kilwas karang.

¹¹“Kaunah muih as kidika waihnila as duwa dai babang tani awa likkauna sangni duwi iwi dawi kidika yakmaldinin tawanni bas kaupak dis yakat kiri kiwarang kat,

¹²tawanni pas yakat muih bararak balna bangkidika yaklauwi adar ahana karang, muihni kidika laihwi dauna wanaihni balna tingnina yakat āwakat witingna yaklauwi alni yakat ina atnin.

¹³Manna kidika muih ina yakat minikunni talnamna awas ki, kaput laih Israel sauni yakat ā pini utuhwaskarang, kaput laih di bitik kidika yamni manah karang.

¹⁴“Manna Dawan Papangmana sau manawarang pasyakat, yaihmatna kau muih ūk lainni balna kidika rispik kalatanama sara muihmana bararak mani kau dakwi lana dai kaput.

¹⁵“Muih aslah witnis kalahwarang kat, sip awas karang muih as yakat di dutni yamna, awas kat di malna awas kat di ūk dutni yamna kalatnin, Kaput laih muih as di dutni yamna kat yulni yaknin karangkat, witnis bu awas kat witnis bās kalahwarang kat sip karang, muih as yakat la ānin.

¹⁶“Muih as kidika muih ūk as di dutni yamna ti yulni yulwarang kidika bik alas karang kat,

¹⁷adika muih bupak papang muhni yakat uina karang, dawi sumalyang balna dawi wihta balna bik warknina yamwa bang, muhnina yakat uinakarang.

¹⁸Kaput laih wihta balna kidika yamni palni yul balna kidika dakakana karang, usnit kat adika muih witninis kalahna kidika muih alasni yulna karang kat,

¹⁹bahang adika alas yulna muihni yakat lā parasni minit yakat bukna karang muih as kidika dutni yamna dai kat lā minit yakat bukwarang dai lani kidika alas yulna minit yakat bukna karang bahang kaput laih manna pasmangna yakat di dutni bang kidika dis kalnakarang.

²⁰Adika tatalwarang mani muih balna kidika yamaduduwarang, kaput laih di dutni yayamwas karang.

²¹Manna minikun tatalwinih: sangnika dakwak sangnika kau minit launin, minikpa karang kat minikpa kau launin, anani kat anani kau launin, tingni kat tingni kau launin, kalni kat biri kalni kau launin.