Read Mayangna Deuteronomio 20 Bible Online

Deuteronomio 20 - Mayangna bible

Deuteronomio 20

¹“Manna waihmanala balna yakat kalbaunin alahwa yawa talnangkat witingna laih aras kilyang balna duduwi dawak kalbaunin kārni balna bik duduwa karangkat, dawak bik kalbauyang muihni balna kidika tanit mahni duduwa karang kat manna karak dawakat, kaunah yamaniduduwinih manna, kat manna laih Papang yakat kulnamna āta dutamana bahang, Egipto kaupak manayakna Papangni yakat.

²Dawak kalbaunin awarni kiwi kawakat, sumalyang kidika yaklauwi kalbaunin kidika tunan dunakarang

³dawak yulwarang: ‘Dakanauh Israel muihni balna, warmani waihmanala niningyakat kalbautanama ki. Kulnamna sau yakat buknin-awaski dawak bik yamadunin-awaski, manayuknin bik awaski, muihsak daunamna bik awaski,

⁴kat manna Papangmana kidika manna karak bahang; witing kalbauna karang manna waihmanala balna niningna yakat, dawak minit bayaknin kidika manna yakat manana karang.’

⁵“Usnit kat tunan muihni balna kidika yulbabauwarang, dawak yuyulwarang: ‘Manna pasyakat muih as ū wisam pakna kaunah baisa kidika pasyakat kawas kat, mahka ūni kau kiwang, war yakat kalbauwi dauwarang kat bik witing ūni kidika kawas dauwak muih ūk witing tatuna kawarang.

⁶Manna pasyakat muih as wain dahna dai kat, kaunah kidika kaupak witing apis bik diwasdai kat, witing mahka ūni yakat kiwang, kidika awaskarang kat war yakat dauwarang kat, muih kidika wain minik balna kidika bahna karang.

⁷Dawak muih as kat witing yal dunin pramis yamna dai kat, kaunah witing baisa yal kidika duwasdai kat, witing mahka ūni yakat kiwang, kidika-awaskat witing war yakat dauwarang kat yal kidika muih ūk duwarang.’

⁸“Usnit kat tunan duwa muihni balna kidika watwi kalbauyang muihni balna yakat diyuyulwarang: ‘Muih as yamaduwakat, kulnin dadasni duwas kat, mahka ūni yakat kiwang, kidika awaskat kalbauyang as balna yakat diyamwak yamaduduwarang.’

⁹Tunan duyang balna kidika yulbauwi dahn dadawakat, kalbauyang muihni balna uduhna taninatuna kidika tunan kawarang.

¹⁰“Manna tawan nunuhni balna kidika yaihnit yakat yawanama kat kalbauna atnin, tatuna laih kulnin aslah lani kidika yultanama kidika muihni balna niningna yakat.

¹¹Kidika tawanni nuhni muihni balna kidika witingna kulnin aslah lani kidika dudang atwarang kat mana dadawak awanama, dawak kaput laih manna kidika muihni dini yamyang kapat manaduduwarang dawak wark pararasni yakat manapapakwarang.

¹²Kaunah witingna kulnin aslah lani dunin kidika manna karak, witingna dukih diawas karang kat, kaunah nawatkauh laih namangna yakat wār kalbaunin yayamwarang kat, manna tawanni nuhni kidika awaihta dakta niningna yakat kalbautanama.

¹³Manna Papangmana yaklauwi yamwak, manna tingmana yakat bubukna karang, dawak manna lauwa isparah kau itanama kidika muihni balna bitik.

¹⁴Yayal balna, walabis balna, tinglau balna dawak kidika tawanni nuhni pasyakat di balna bangkidika bitik laih manna dimana karang; bahang alasna dutanama Papangmana yaklauwi waihmanala balna tingnina kaupak dakyakwi manawa kidika.

¹⁵Kaput manna yamtanama, manna yalahtanama pāni kaupak naikau tawan nunuhni balna bang bang kidika, kidika balna laih adika ninisan balna pasyakat-awas kidika.

¹⁶Kaunah kidika ninisan tawannina nunuhni balna kidika Papang yaklauwi manna dimana manawa kidika, sangnika duwa balna kidika asbik danin-awas karang,

¹⁷kaunah bitik laih inin karang, Papang kau sakripais yamnin as kapat, hitita, amorreo, cananeo, ferezeo, heveo dawak jebuseo kidika balna bitik, witing yaklauwi yulna kaput,

¹⁸kaput laih witingna yaklauwi manna yakat manasumalnin awas, di dutni yamadangni kidika yamnin, witingna di dutni yamadangni yayamwa kapat daninawan dauh kidika yakat, dawak kaput manayayamwak Papangmana nining yakat dutni yamnin- awas.

¹⁹“Manna tawan nuhni as awa dunamna kat awaihta dakta mahni bang-atnamna ki, dawak pananina balna kidika ki kau pipihwinih, kat minik balna kidika manna duta kastanama bahang; baisa minit yakat kidika laih pan manahki, muih bik awaski witingna nanitna daknin manna niningna kauh yamtamana kidika yulni.

²⁰Kaput kaunah, pan minik yakwas balna kidika laih sipki dakna atnin, kat kidika kau duta awaihta daktanama bahang, manna tingmana yakat bubukwarang kat.