Read Mayangna Deuteronomio 22 Bible Online

Deuteronomio 22 - Mayangna bible

Deuteronomio 22

¹“Manna paskaupak muih as talwak, witingna pa aslah muihni tuniruh almuk, kidika awaskat sīpni karangpa disna kat witing kidika amanglawas kapat yamnin-awaski, kaunah nawatkauh laih witingna karak pa aslah muihni yakat uiwi kalana karang.

²Kaunah di dawan kidika, ūni yaihnit yakat yalahwas, dawak bik witing karak kaltalyang bik awaskat, tinglau kidika witing ūni yakat duwi kiwarang, bahang mampat mani kat witing karak pa aslah muihni kidika yaklauwi kiwi kalyulwarang kat; kalana karang.

³Biriku bik sihm kaput yamna karang, asna karang, di ūk karang bik, muih as kat witing dispamna kat manna lawa yaktanama kat. Manna amanglatasmana kapat laih yayamwinih.

⁴“Manna paskaupak muih as talwak witing karak pa aslah muihni tingnilau, biriku karangpa, kidika awaskat turuh almuk karangpa ta pasyakat bukna karang kat, witing amanglawas kapat laih yamnin-awaski, nawatkauh laih ilp kalawi laihwi dulauwarang.

⁵“Muih yal kidika muih al asnina balna kanin-awas ki, dawak al bik muih yal prakni balna kidika kanin-awaski, kat Papang laih dutni talwa bahang kidika dini balna bitik yayamwa kidika.

⁶“Muih as kat ta pasyakat talwak uhubin ūni as pan mayakat kidika awaskat sau yakat sakkat talwak, ūni bin kidika pasyakat uhu binina, kidika awaskat sumani bik bangkarang, dawak nanangni kidika kana duwatuskarang kat, sip-awas karang walanibis balna dawak nanangni kidika bitik laihwi dukiunin;

⁷walanibis binina kamanah duwi kiunin sipki, dawak nanangni kidika dapamwak kiunin karang. Kaput laih alasna ismanglak karang dawak bik sangmaka naini karang.

⁸“Manna paskaupak muih as ū wisam as yamwarangkat, yaihnit awaih was tahwa yakat kidika itikwi daklana karang; kaput laih witing walanibis balna kidika pātdis karang muih as ū makaupak bukwi dauwarang kat.

⁹“Wain yanimak yakat di minik satni aslah dahtanama, kaput laih yusyamnin kidika manalaihwatwas[6] karang minik dahna mana kidika yusyamnin.

¹⁰“Di dahnin pāni sauni kidika sahnin-awas ki, turuh almuk as dawak biriku as karak libitwi sitwak.

¹¹“Manna asna kakawinih sīp butuni dawak linin karak banawi yamna asnina kidika.

¹²“Manna kalsurumhtamana asnina kidika sutni arungkapak kungni yakat mamasni atanauh.

¹³“Muih al askat yal duwarang, dawak yal yakarak payayahwak usnit kat witing yal yakat dalani talwas dawarang

¹⁴dawak al kidika yulwarang, yal kidika di dutni as yamna ti, ayangni daukalwi aput yulwarang: ‘Yang adika yalni karak marid alahwanayang, kaunah yang witing karak payahtingkat witing kidika al karak kalpakwas awasdai’,

¹⁵kaput yulwarang mani yal dini almuk balna kidika tawan pasyakat muih bararak lā amanglayang balna yakat duwi kiuna karang dawak

¹⁶aput di yulwarang: ‘Yang walakibis yal kidika adika alni yakat yulni kalanayang, kaunah waralaih walakibis yakat dalani talwaski alasni yulwi,

¹⁷walakibis yal kidika siraubin awas dai ti alasni yulwi kaunah manna yakat namangnakatayang.’ Dawi dangni rina payayahna kidika muih barak lā tanka talyang balna yakat niningna kana karang.

¹⁸Kaput laih muih al yakat laihwi silak awi

¹⁹dawi papakwarang tunan minit launin lalah andat as launin karang, adika lalahni kidika yal papangni balna yakat diana karang, tanka laih Israel walanbis siraubin as ayangni daukalna yulni kidika minit yakat sirau kidika ban yalni duna karang dawi bik sangnika bitik yakat dawas karang dakwi kalahnin sip-awas karang.

²⁰“Kaunah rahm yal kidika siraubin awas dai kat

²¹yal kidika papangni uni kawa dūr yakat, yakwi tawan paskau muih balna bang bitik kidika yaklauwi kipala kau bahwi ihina karang, tanka laih Israel tawanni pas yakat adika sat di dutni yamna dawi papangni ūnipas kat bik asalni yakna yulni. Kaput manah laih manna pasmangna yakat di dutni bahang kidika disna karang.

²²“Muih al as kidika, muih ūk yalni karang payahwa bangkat lalaihna karang kat, bupak daunin karang. Kaput manah laih Isabel tawanni pasyakat di dutni bahang kidika disna karang.

²³“Yal sirau bin as kidika al as karak marid kalahnin yulna kat, kaunah al ūk as kaiwi yalni bin yakarak kalalangna karang kat,

²⁴bupak laihwi la muhni yakat duwi uina karang, bahang bupak laih kipala kau bahrwi inin karang: yal kidika tawan pas yakat sak dai kaunah muih yakat sarahni yulwas dana yulni al kidika laih wanaihni yalni yakat risnipik disna yulni kaput laih manna pasmangna yakat didutni bitik kidika disna karang.

²⁵“Kaput kaunah muih al as kidika, muih ūk yalni marid kalahwarang kidika tawan kaupak ahni yakat likkat laihwi taihwi kalyamwa kat witing karak payayahna karang kat, kidika lani kamanah daunakarang,

²⁶yal siraubin yakat laih di as bik kalyayamwas karang kat, witing di as bik dutni yamwas bahang sip awas karang daunin, kat adika lani kidika ulna ki sihm muih al as dawi, al ūk yakat iwa kapat;

²⁷kat adika siraubin kidika alas lik kat muih al kidika laihna dawi bik yal kidika sarahna dai bik muih as witing yakat ilp kalawasdai bahang

²⁸“Siraubin as kidika pramis as bik dis dawi tawan pas yakat sakkat muih al kalahwi witing yakat laihwi kalyamna yulni witing karak payayahwakat muih tatalna karang kat,

²⁹al kidika yaklauwi sirau papangni yakat lalah 50 kalana karang, duwi bik yal sirau asalni yakna yulni witing karak marid kalahna karang dawi, dawak sip awas karang kaldakkalahnin kidika yal karak, sangnika bitik yakat.

³⁰“Muih as bik papangni yalni karak payahnin la diski, kat wais kaput yamwa kidika, papangni asalni yakwi dawi ayangni bik daukalwarang bahang.