Read Mayangna Deuteronomio 24 Bible Online

Deuteronomio 24 - Mayangna bible

Deuteronomio 24

¹“Muih al as kidika yal as karak marid kalahwarang usnit kat yal kidika lani balna dutni duwa yulni dalani talwas dawarang kat, dakwi kalahnin wauhnitaya as kalawi dawi ūni kaupak yakpamwakat kiwarang.

²Kidika yalni al ūni kaupak kalahwi kiwarang usnit kat sip karang al ūk karak marid kalahnin;

³kaunah adika al ūk duwarang kidika bik, duwarang usnit kat lani ban dutni duwa yulni dalani talwas dawi, watwi dakwi kalahnin wauhnitaya kalawi dawi ūni kaupak sihwarang kidika awas kat adika alni usnit kidika dauwarang kat,

⁴maridni tatuna dai karak sip awas karang watwi marid kalahnin, tanka laih yal yakat dutni kalkulna karang bahang; kidika laih Dawan niningkauh dutni kulna bahang, kidika bahang manna Dawan Papangmana sau manana kidika risnipik dis laih yayamwinih.

⁵“Muih al as wisam palni marid kalahna kidika war yakat sihnin sip-awas ki dawak wark ūk balna bik pakwas karang yamna atnin, kidika laih kurih as kaput karang; bahang witing ūni yakat di as bik yamwas karang, witing yalni alasnina kidika yulni.

⁶“Muih as kau bik witing kiniwatak kidika yulwinih di minit as kapat, kidika laih witing palni sangnika kau minit kalyultaman kapat karang.

⁷“Israel paskaupak muih as kalahwi witingna pa aslah muihni kat malwi laihwi dukiwarang kat, witing dini yamyang dunin yulni, kidika muihni laih daunin yakat wirlana karang, kaput laih manna pasmangna kau dutni sakkidika dis kalna karang.

⁸“Lipar siknis niningkauh libait balna ais manayuyulwarang yakat yamtanama’ Witingna bik yang lawik ais yamnin pakki kidika yakat yayamna karang.

⁹Mana yamni ismangnakatwang, Egipto sauni kaupak alahwa tapas yakat aiwanang kat Mery yakat ais kalyamna dai kidika Dawan Papangmana yaklauwi.

¹⁰“Manna wanaihmana as kau lalah karang awas kat di ūk as kalatanama kat, uni yakat awa dini as bik dunin awas ki, angkat mani trasma kidika lauwi mawakat kalanam yulni.

¹¹Ahni yakat tani atah witing yakluwi uni pas kaupak ais yakwi mawarang kidika duma.

¹²Muih minikunni as kat, man yakat di as duaiwi lalah yakna karang kat, dini kidika laihwatnin awaski pukta yakat,

¹³mahka nawatta kalanamki, ma kidika kakiwak, kaput laih man tingma kau putma mahka amama yakat. Bahang kaput laih blismanayamna karang dawak dawan niningyakat di yamni yamtanama.

¹⁴“Muih minikunni kidika taihwi dini mamalwinih, lauwi kalanin kidika bik laihwawatwinih, pa aslah awanama, kidika awaskat pa ūk muihni karang bik, manna tawanmana nuhni yakat yalahtamana kidika.

¹⁵Witing warkma as yamna kat kidika mani baisa ma kakiwas yakat lauta kalama, kat witing kidika minikunni dawi wark yamna yakaupak witing sangka atnin bahang. Manna kaput yamtas awanama kat, Dawan yaklauwi mana yakat yulwi dakana karang, dawi bik, manna dutmana nuhni palni yamna awana.

¹⁶“Papang as kidika, walanbis as yaklauwi di dutni yamna yulni witing dauwas karang; dawi walabis as kidika papangni di dutni yamna yulni dauwas karang, kaunah muih buni dutni yamwa kidika muihni dauna karang.

¹⁷“Manna muih tringsar balna niningna kau la minit bayayakwinih, warau balna niningna kauh bik, kaput bik tingmak as kau, di wayaki as yulwi duna kidika yulni bik dini dakyaknamna awaski.

¹⁸Manna damatna kahnin awaski Egipto sauni yakat manna waraumana dai kidika, dawa kat manna Dawan Papangmana yaklauwi mana yakna kidika, kaput babang ais mana yultayang yakat yamtanama.

¹⁹“Manna yamak di dana mana yakat, minik dakta lik kaunah damat kalwa kat plawar dakna buas damatkahwak dulautas aiwanaman usnit kat, ismangkatwak kat, watta nawatta yawa dulaukuhti kulnam awas ki, datang kat muih tringsar tawanmana paskau tulu tulu kidika as dulauwi yusyamwarang, kidika awas kat warau as karang kidika awas kat tingmak karang bik dulauwi yusyamwarang; kaput laih Dawan yaklauwi di yamtamana bitik yakat yamni yamna karang.

²⁰“Manna olib minik balna kidika daktanama kat, tingni rahni balna kidika yakat watta wawalwinih, minik balna wawatwa kidika laih pa ūk muihni balna, warau, dawak tingmak balna kidika dinina karang.

²¹“Manna wainmana minik daktanama kat tingni sutni bitik kaupak dadakwinih, datanauh buas watwa kidika kaupak, pa ūk muihni balna, warau duwi tingmak balna kidika bik ilpnina dunin yulni.

²²Manna yamnin ismangna aitanauh. Egipto sauni yakat muih dini yamyang mana dai; kidika bahang manayultayang adika balna bitik yamtanauh.