Read Mayangna Deuteronomio 25 Bible Online

Deuteronomio 25 - Mayangna bible

Deuteronomio 25

¹“Manna pasmangna kaupak, muih bu karang pa kalahwi kalbibilwarang kat, bupak la muihni yakat uiwarang, lanina yamnin yulni, wais pāt dis kidika yamni kalahwarang, kaunah pāt duwa kidika laih dutni yakat bukwarang.

²Angdika muihni minit yakat la bukna karang kat dawi bik wahkau wisnin karang kat, wiwisna karang

³Wah wisnin kidika bik, muih as yakat sip awas karang, wah 20 wisnin, tanka laih man wanaihma tawanma muihni kidika uba muihni yakat dalani dunin awas dawi man muhna yakat minikunni kaldakanin awas yulni.

⁴“Turuh almuk wark kalahwa lik mani di kaswas atnin yulni nangnitak yakat di utak kauh sitnin awaski.

⁵“Kalwirah bu kidika sihm ū aslah kakawa dai kat, wirahni yal duwa kidika dauwarang, kaunah walanbis as bik yakwas dauwarang kat, tingnimak yal kidika la ūk karak sip awas karang marid kalahnin. Wirahni alni kidika yaklauwi witing yakat yulni dunakarang, bahang kaput laih yal kidika wirahni alni kalkulna lani kat yamnakarang.[7]

⁶Adika yalni duwarang usnit kat walanbis tatuna yakwarangkat, maridni tatuna dai kidika ayangni pakna karang, tanka laih maridni tatuna dauna ayangni kidika Israel tawanni pas yakat disnin awas yulni.

⁷Kaunah al kidika, wirahni al dauna tingnimak karak dunin kulwas karang kat, yal kidika la muhni yakat kiwarang, dawak muihbararak balna yakat diyulwarang: ‘Alki dauna ayangni kidika, Israel pasyakat ban dunin kidika dukih kalawas ki; yang wirahni yalni yang dai kidika kat yamnin kulwas ki.’

⁸Kaput yulwak muihbararak la amanglayang balna kidika, al yakat yuyulwakat kiwak yulbabauna karang, kaput ki kaunah al kidika ban dunin yulwaskarang kat,

⁹tingnimak yal kidika yaihnit yakat kiwi muihbararak balna muhnina yakat tingnimak al yakat susni āna kidika yakwi dawi, muhni yakat susuih tuhna karang dawi kalyulwarang: ‘¡Kaput kalyayamwi muih al as wirahni al dauna kidika sulani kalanin yulwas kidika!’

¹⁰Bahang kaput laih Israel tawanni bitik pas yakat di kukulna karang, ‘muih yaklauwi susnina dudutna’.

¹¹“Muih ahal bu ting kau kalbabauwarang kat, as kidika yalni, kawi alni yakat ilpni kawi alni waihnila suman'minik yakat laihwarang kat,

¹²manna yal yakat minikunni talnin awaski, kaunah tingni kidika dakna awanama.

¹³“Manna muih yakat di bakannamna yulni paun ānin satni karak muih yakat taihta alas di yulnamna awaski,

¹⁵kaunah muih yakat di kalbakannamna kidika rahm yakat, paun āta bakantanama, kaput laih Dawan Papangmana sau manawarang yakat yamni dawak ma mahni bik yalahtanama.

¹⁶Kat Dawan laih adika dini dutni balna bitik dutni talwa bahang, la kat yayamwas kidika.

¹⁷“Manna Egipto kaupak alahwa aiwanamana tapas yakat Amalec ais manayamna kidika ismangna katwang,

¹⁸manna ismangna katnin ki, witing papang kau yamaduwas palni tapas yakat manasuhna bangmana kat namangnakauh manakalbauwadai kidika kamanah bik awas ki ismangnakatwang manasuhna bangmana kat dangmatna kaupak manakalbauwadai kidika.

¹⁹Kaput bahang, angkat mani, manna Dawan Papangmana yaklauwi waihmanala kaupak bitik manalaihwi yakwarang kat, sau manawarang yulna yaihnit kau awaih balna kidika, Amalec kulnin kidika bitik laih uswi yakna karang, ¡Damatna kahnin awaski!