Read Mayangna Deuteronomio 3 Bible Online

Deuteronomio 3 - Mayangna bible

Deuteronomio 3

¹“Kidika usnitkat mayang ta ūk laihdi Basán tawanni niningyakat mawanadai. Kaunah king Og yaklauwi kalbauyang balna bitik karak kalpakwi maniking yakat kaina dai Edrei sauni yakat maikalbauna atnin yulni.

²“Bahang Dawan yaklauwi aput yayulna: ‘Man witing yakat yamaniduwinih, kat yang lawik witing, kalbauyang muihni balna dawak tawanni muihni balna bitik kidika man tingma yakat ānayang, man lauwa sihm Hesbón sauni yakat amorreo balna kingnina Sehón kau kalyamnaman kaput kalyamnam yulni.’

³“Bahang kaput laih mapapangki Dawan yaklauwi yamwakat king Og dawak kalbauyang muihni balna bitik kidika mayang matingki yakat bubukna dai, as bik sangka dadas bitik imuknamayang dai.

⁴Kaput bik tawannina balna bitik bahdi dis yamnamayang; tawan as bik matingki dinit yakat bukwas laih awasdai. Tawan balna bitik kat 60 dai, kidika tawanni balna matingki dinit yakat bubukna dai, yuldarangkat Basán kingni sauni, king Og duwasakdai kidika bitik Argob sauni kau.

⁵Adika tawanni nunuhni balna bitik kidika yaihnit balna kidika kipala kau itikwi lanadai dawak dūr kāwa balna bitik kidika ayan kau manah awi lanadai, kaput bik tawan mahni palni daklawas balna dai kidika laih pasyakat adi kuldasdai.

⁶Tawan balna bitik kidika bahdi disnamayang dai, sihm Hesbón kingni Sehón kau kalyamnamayang dai kaput, bahang kaput laih muih ahal, yayal dawak walabis balna bitik laihdi idi disyamnamayang,

⁷tinglau balna dawi mawaihkila balna dinina minit nunuhni duduwadai kidika manah dunamayang.

⁸“Kaput laih, kidika mani balna yakat, amorreo balna kingnina sauni bu kidika mayang matingki dinit yakat bubukna dai, witingna laih Jordán wasni ma kilwa niningkauh yakat yalalahwadai, Amón wasni kaupak Hermón asangni kat.

⁹(Adika asangni kidika sidonio muihni balna laih Sirión asangni atwi, dawakat amorreo muihni balna laih Senir asangni atwi.)

¹⁰Tawan mahni palni sau langnikau bangdai kidika, Galaad dawi Basán sauni kat, kidika kaupak Salca dawi Edrei sauni kat, adika tawanni nunuhni balna king Og tingni dinit yakat duwadai kidika, Basán sauni yakat, mayang matingki dinit yakat bubukna dai.

¹¹(King Og witing manah kuduh refaíta sulani kaupak sangka likdai kidika; witing payahwa pāni kidika laih ayan kau manahdai, naini niningkauh kidika yakat metro arungka duwadai dawakat pirihta niningkauh kidika laih metro bu kanin manah duwadai, waradika bik talnin sipki Rabá sauni amonita tawanni nuhni yakat.)

¹²“Kidika mani balna yakat sau dunamayang dai kidika laih Rubén sulani balna yakat dianayang dai dawak Gad sulani balna yakat laih dianayang dai Aroer kaupak sau kiwa kidika, Arnón wasni kung munah, Galaad asangni balna bamak kat, dawak tawanni nunuhni balna kauna.

¹³Galaad sauni papusdak kidika Basán kingni sauni pasyakat kalkulna ki bahang king Og tingni dinit yakat duwa sak dai, kidika kaupak Argob sauni, adika sauni kuduh refaíta balna saunina dai; bahang adika sauni bitik kidika Manasés sulani balna yakat dianayang.

¹⁴(Manasés sulani pas kaupak Jair, witing laihwi duwadai Argob sauni kaupak Gesur dawi maaca sauni balna kiwi watwa lainni kat, dawi Basán sauni dai kidika ayangni dapamwi witing ayangni kat Havot-jair pakwa dai, adika ayangni kidika warmani kat ban yuyulwi.)

¹⁵Galaad sauni kidika laih Maquir yakat kalana yang,

¹⁶dawakat Rubén dawi Gad sulani balna yakat laih dianayang Galaad sauni kaupak dawi Arnón wasni king kat adina sauni lainni balna sahwi yakna asang wakarhni balna papus niningyakat dawi Jaboc wasni king kat kidika amonita balna sauni karak sahwi yakna ki,

¹⁷tingpal nining yakat laih dianayang Arabá sauni, Pisga asangni dangnit yakat ki, adika sauni lainni sahwi yakna ki Jordán wasni kidika, dawak Cineret lakunni kaupak Arabá kumani kat, kidika laih Kuma Dauna kidika.

¹⁸“Kidika mani balna yakat manna kau adika yamnin mananayang dai: ‘Papangmana Dawan yaklau adika sauni manna dimana manawi. Kalbaunin sip balna kidika bitik, kalbaunin dini balna kidika duta wanaihmana Israel muihni balna tanitna yakat lawa lapaktanauh.

¹⁹Tawan balna manna kau manana yang kamanah wawatna karang, yayal, walabis dawi tingmanalau mahni dutamana kidika manah wawatna karang.

²⁰Dawak yang Dawan yang adika lawik, manna wanaihmana balna yakat isningnalak diatasyang kat sihm manna ismangnalak mananayang kaput, dawak bik Jordán wasni nakas kau sau diaki kidika baisa duduwas kat, manna bik sip nawatta yawas awanama ki sau mananayang yakat.’

²¹“Josué yakat adika yamnin kalanayang: ‘Man palni mamakpa karak talna man, papangma Dawan yaklauwi kidika king bu yakat ais di yamna dai kidika dawi bik man bayakma munah sauni kingni balna yakat bik kaput diyamna karang.

²²Witingna yakat bik yamaninaduwinih, kat man Papangma Dawan yaklauwi manna mamatna kalbauna karang.’

²³“Sihm kidika mani yakat yang Dawan kau aidik aput kalyulna yang:

²⁴‘Dawan, man warauma akat waralaihtakat, man parasma balna dutaman kidika niningkataman. Papang ūk diski kisang dawa yakat sau akat bik ūk diski sihm man parasma balna kau di yamtaman kaput yamnin

²⁵Kaput bahang man kau aidik ma yultayang yadatang kat, Jordán wasni nahas yakat daklawakuh, bahang kidika sauni yamni, sau nuhni asang balna manas kidika dawak Líbano kidika bik talkih yawi.’

²⁶kaunah Dawan yang kau kulnin daukalna, manna dutmana yamtamana kidika yalni, duwakat yulna yang kidika bik yawas dai, kaunah nawatkauh aput yayulna: ‘¡Yakat datah! Adika yulni baisa yayulwinih.

²⁷Pisga asangni nuhni tuna yakat ilwa yawah, dawak yakaupak tingpal dawak wadah niningyakat talah, ma kilwa dawak ma kāwa nining yakat bik talah, kaunah Jordán wasni laih dakta lawas awama.

²⁸Josué yakat yul balna sumaltah dawak kulnin dadasni kalatah, kat witing kuduh tawan tunan kawarang kidika dawak kawi sau duduwarang kidika warmani talma kaput.’

²⁹“Dawak asang sar yakat watnamayang dai, Bet-peor muhnityakat.