Read Mayangna Deuteronomio 33 Bible Online

Deuteronomio 33 - Mayangna bible

Deuteronomio 33

¹Moses baisa dauwas tanitkauh, Papang alni, Israel muihni balna yakat blis diyamna dai

²aput yamwīnah: “Dawan laih Sayan kaupak kaiwi; Seir kaupak yaringni mayana. Parán asangni balna kaupak yaringni kalana dawak Meriba-cades[12] kaupak kiwi; tingnipal niningyakat lā kuhnipau kidika duaiwi mayawi.[13]

³Dawan laih witing tawanni kidika dalani talwi, witing dini kakalwa balna kidika witing tingni dinityakat āwi duwi; witingna laih kalni dinityakat bubukwi dawak witing ais yamnin yulwa kidika yayamwi.

⁴Moses yaklau lā kidika mayana dipahni as kapat Jacob tawanni kaupak,

⁵dawak Jesurún yakat laih king sakdai tawan tanituna balna kidika kalududuhna mani kat, Israel sulani balna kidika kalbahahana mani kat.”

⁶Rubén niningkauh laih aput yulna dai:[14] “¡Rubén laih sangka ki! ¡Dauwas kawang, witing ahalni balna kidika bulah karang bik!”

⁷Judá yulni laih aput yulna dai: “Dawan, Judá yulni kidika dakah; man lawa yamtang man tawanma karak kalududuhwang. Parasma karak tanit daktah;[15] witing niningkauh yaklalauwa balna kidika niningyakat ilpni āwah.”

⁸Leví niningkauh laih aput yulna dai: “Dawan, man dima balna ki, Tumim kidika dawak Urim kidika bik; man dima balna dawak muih al man yakat barangni kidika bik dini,[16] Masá yakat wauhnin ānaman dai kidika, Meriba wasni yakat witing karak kalbaunaman dai kidika,

⁹papangni balna yakat aput diyulwadai kidika: ‘Wat as bik talasyang’, dawak wirahni balna yakat laih aput diyulwadai kidika: ‘Amangninalatasyang’, dawak walanibis balna yakat laih aput diyulwadai kidika: ‘Wais balnapa amanglatasyang.’ Witingna laih man yulma kidika kat yayamwi, man pramamis yakat barang kakana.

¹⁰Jacob yakat dawak Israel yakat bik sumamalwi, lāma balna yakat; sakripais busnin pāni man dima yakat dawak muhmat yakat bik lalakwi, busnin dini walapni yamni kidika dawak minitdis kalanin dini didauh balna kidika bik.

¹¹Dawan man lawa witingna muihnina ihiwa kidika blis diyamtah, dawak warknina kidika yamni tala dutah. Witingna niningnakauh yaklalauwa balna dangnina kidika bistah, dawak man yakat dutni makukulwa balna kidika watwi yaklauninna awaski.”

¹²Benjamín niningkauh laih aput yulna dai: “Dawan dalani talwa muihni kidika laih alasna yalahwi; makau sakkidika yaklau ban kaput tingni dinityak āwi duna karang. ¡Tanitdakwa dinityak yalahna karang!”

¹³José niningkauh laih aput yulna dai: “Dawan yaklau witing sauni kidika blis yamna karang makau kisang kaupak yalawas yamni kidika karak dawak sau paskau wasni kidika karak bik,

¹⁴kurih pasyakat di minik balna yayamni kalahwa kidika karak dawak waiku balna pasyakat di minik balna yayamni kalahwa kidika karak bik,

¹⁵muhnilau kau asangni balna kidika karak, makau ban kaput atnin yayamni balna kidika karak bik,

¹⁶sau yakat di minik balna yayamni kalahwi mahwa kidika karak dawak kulnin yamni pan wakal pasyakat yalahwa kidika kauna. Adika dini balna bitik José minityak aiwah, wirahni balna pasyakat walwi yakna kidika.

¹⁷Nuhni yaksihni ki sihm turuh almuk walanibis as kapat, parasni sihm turuh bul as kapat, dawak tawan balna bitik yakat tamni kau dipana karang sau sutni balna kat. Efraín sulani balna mahni kidika yakat; Manasés sulani balna milian, milian yakat.”

¹⁸Zabulón dawak Isacar niningkauh laih aput yulna dai: “Zabulón alasna alahwah, alahwanam tani balna kidika yulni, dawak Isacar man laih, ūma lababanni balna kidika yulni.

¹⁹Nisan balna kidika asang yakat diyulwak uiwarang, dawak kidika yakat sakripais busnin balna kidika bubusna karang; kuma ritsni balna kidika duwi alasna duduwarang dawak kauhmak yakat di minit nunuhni balna malni kau bang kidika bik duwi alasna duduna karang.”

²⁰Gad niningkauh laih aput yulna dai: “¡Sau nunuhni manawa kidika muihni laih ayangni nuhni yamna karang! Gad laih sihm layan yal di tahawa kapat tahawi, dawak tingni balna kidika dawak tunani kidika bik kaswi dakwi.

²¹Gad laih sau yamni kidika duna dai sau as yamni kalbauyang taninatuna balna dinina. Tawan muihni balna taninatuna duwi kana dai, Dawan yaklau yamnin yulwa kaput yamna dai dawak Israel yakat la kat kidika yamna dai.”

²²Dan niningkauh laih aput yulna dai: “Dan laih layan walanibis as kapat ki Basán kaupak sutwi.”

²³Neftalí niningkauh laih aput yulna dai: “Neftalí laih Dawan yaklau yamni kaltalwi, witing blinisin mahni palni duwi, ¡witing laih lakun daniwan wadah niningkauh sutni nakas kat!”

²⁴Aser niningkauh laih aput yulna dai: “Aser laih ayangni nuhni yamna karang Jacob walanibis balna pasyakat, dawak wirahni balna bik dalani kaltatalwarang. Kalni balna kidika disala kau kahna karang;

²⁵dūrni balna kidika ayan dawak bras lākni balna kau duwa karang, dawak parasni kidika ma mahni duwarang dawak sangnika bik sihm kaput.

²⁶“Jesurún Papangni kidika laih di as karak bik libitnin sipawas ki, makau kisang balna minityak aras kau kilwi king kawa kidika man yakat ilp mana atnin yulni.

²⁷Papang ban kaput atnin kidika laih man maldanam pāni, parasni ban kaput atnin kidika laih man ilpma; witing yaklau yamwakat man muhma kaupak man namangkauh yaklauwa kidika kirana dawak man yakat mayulna daukalpamna atnam.

²⁸Israel laih yamni kulwi yalahna karang, sulani balna kidika laih kulnin aslah lani karak yalalahna karang. Saunina yakat plawar minik dawak wain bik bangkarang, dawak makau kisang kaupak was lauwak duduna karang.

²⁹Israel man laih alasna yamni awama, ¿wais kidika malibitnin sipyah? Dawan witing palni malaihwi yakna; witing tingni dinityak mahawi maduwi dawak bik ilp mawi, ¡witing kuduh man ismaparah minitbayakyang kidika! Man namangkauh yaklalauwa balna kidika laih man namangyakat bubukna karang, dawak witingna manah kapat kaldakakawa kidika laih man lawa taihta dunaman karang.”