Read Mayangna Deuteronomio 4 Bible Online

Deuteronomio 4 - Mayangna bible

Deuteronomio 4

¹“Israel walanbis balna manna bitik yamni dakanauh, lā balna manasumalnayang kidika, dawak kidika lani balna bik duta yamtanauh, kaput karak yalahta bang awanauh, dawak Dawan dawi muihmanabararak balna Papangnina yaklauwi sau manawarang kidika bik awa dutanauh.

²Yang lawik yamnin manayultayang kidika minit yakat baisa lalakwinih dawak bik yayakwinih; Dawan manna Papangmana lani balna kidika kat laihta yamtanauh, yang lawik yamnin manayultayang kidika.

³Manna palni mamaknapa kau talnamana dai Dawan yaklauwi Baal-peor yakat ais kalyamwadai kidika, dawak manna pasmangna kaupak amput imukwadai kidika kidika pāni daniwan dauh yakat ayangni tanit nuhni yayamna balna dai kidika yakat;

⁴Kaunah kidika muihni balna bitik Dawan kau barangni kulnamana dai kidika, warmani kat ban sangka bang mana

⁵Yang lawik manna kau lā balna kidika mana sumalna yang dawi muih bitik yamnin lani balna ulwi yakna kidika bik yang Dawan yaklauwi manna kau mana sumalnik anidar yana bitik kidika dawakat manna lawa adika lani balna laihta yamnamna sau manawarang pasyakat adika lani balna bitik kidika yamnamna yulni.

⁶Adika lani balna kat yamtanauh data laihta bik yamta amanglatanauh, kat kaput kaupak sau bitik yaklauwi, manakukulna karang manna pasmangna yakat sins lani kidika sakki dawi di amanglanin kidika bik manna pasmangna yakat sak kidika tanka, kidika bang adika lani balna bitik amanglatanama mani sau bitik kidika aput yuyulna karang: ‘¡Sins lani dawi di amanglanin lani kidika bik adika sauni yakat sakki atwarang!’

⁷Ampadawak kaput karang ¿yah angdika sauni nuhni wayani dauh mahni kidika yaklauwi yaihnit yakat di duwih, sihm mayang Mapapangki Dawan yakat sarahdi yulda bani mayaihkit yakat duda kapat?

⁸¿Angdika ninisan kidika nuhni la balna bararangni duwih warmani yul balna manasumalnayang kaput?

⁹Kaput bahang yamni ismangna aitanauh di balna talnamana kidika datanang damatnakahnin awaski, sinsmana kaupak bik datanang kalahnin awaski; nawatkauh laih walamanabis balna data mamana balna kau bik sumaltanauh.

¹⁰“Horeb asangni yakat manna Papangmana Dawan muhni yakat bangmana dai mani, Dawan yaklau aput yayulna: ‘Tawan muihni balna kidika aslah uduhtangkat yang yulki balna kidika dakakawang dawak bik rispik yayawang sangninaka bitik yakat, dawak walaninabis balna yakat bik sihm disumamalwang.’

¹¹Bahang manna bitik asang sar yakat kaluduhna mana dai, dawakat adika asangni kaupak kuhpau dahlwi ma yakat kilwi mukus sani kalwadai

¹²bahang kidika mani Dawan manna yakat kuh dahlwa paskaupak yul manabauwadai. Manna witing yulni balna kidika dakanamana, kaunah muhni laih talasmana dai, kaunah yulni yulwa kamanah dakanamana dai.

¹³Dawan yaklauwi manna kau, witing pranimis balna yamna kidika mana yulwa dai, kidika kuduh lā salap dai kidika, kipala labanni bu kau ulwi lan kalnin manayulna dai kidika.

¹⁴Yang kau adar yana manna yakat adika lani balna dawi muih bitik yamnin yulni lā balna ulwi yakna kidika bik mana sumalna atnik, kat adika lani balna kidika kuduh sau dutanama kidika pasyakat yamtanama kidika.

¹⁵“Dawan yaklau kuh paskaupak manna yakat yul manabauna mani, Horeb asangni yakat, di wayani as bik talasmana dai. Bahang amung talnauh

¹⁶wayani dauh balna yamnamna kidika kulnamna awaski muih al karang, muih yal wayani karang bik yamnamna awaski,

¹⁷di ūk wayani kat bik yamnamna awaski, di lawani kaput,

¹⁸bil balna kidik awaskat waspa dini balna bik.

¹⁹Manna ma yakat muhta talnama mani, ma waiku, yala balna mahni talnama mani, kidika balna yakat ayangni tanit nuhni laih yamnamna awaski, kat man Papangma Dawan kidika yaklau kisang dini balna kidika yamna sau akat tawan balna kidika bitik dinina.

²⁰Manna namangnakauh laih, Dawan yaklau manalaihwi yakna kidika ayan busnin pāni kidika kaupak, kidika laih Egipto, dawak manayamna warmani amput mana kidika kaput: witing tawanni.

²¹Kaput ki kaunah, Dawan yang kau kulnin daukalna manna pātmana yamtanang kaupak, dawi witing pramis kalahna, yang yadawak Jordán wasni daklawana awaki dawi pramis sauni yamni kidika bik yadawak āwas awaki, adika sauni kidika kuduh manna didawan mana yamna karang.

²²Kaput bahang, yang adika sulani akat daki dawak Jordán wasni daklawas awaki bik, manna laih daklawanama dawak sau yamni kidika bik awa dutanama.

²³Kaunah manna amangtalnauh damatnakahnin awaski Papangmana Dawan yaklau manna karak pramis yamna kidika. Manna wayani dauh balna yayamwinih, manna Papangmana Dawan yaklau yamnin awas mana yulna kidika,

²⁴kat manna Papangmana Dawan kidika papang as minit anyang palniki ¡kuhpau as lakwarang kidika bitik kamana busna karang!

²⁵“Manna walamanabis balna dawi mamana balna bik dutanama mani dawi bik witingna adika sauni akat muih bararak kalwi, kalnina lakwi wayani dauh balna yamwi, Papangma Dawan muhni yakat dawi niningkauh bik dutni yayamwarang yulni kalnin daukalwarang,

²⁶kidika bahang yang warmani, makau kisang dawi sau adika bik witnis kapat ātasyang kidika yamtanama mani Jordán wasni nahas yakat sau yamni manawarang yakaupak mana dispamwarang, kidika sauni yakat kurih mahni babang awas awanama, kaunah sirihni palni mana disnakarang.

²⁷Dawan yaklauwi mana sahyakwi, king sauni balna bitik yakat manaruhwi disna karang, bulah kidika saunina yakat wawatna karang.

²⁸Witingna balna muih yaklauwi wayani dauh pan kau dawi kipala satni kau yayamna balna yakat papangnina duduna karang, kaunah adika wayani dauh balna kidika tatalwas, dakakawas, di kakaswas dawi ururupwas balna yakat papangnina duduna karang.

²⁹Kaunah kidika pāni yakat manna Papangmana Dawan kau kulnamna bitik karak data sangmanaka bitik karang waltanama kat yaktanama.

³⁰Witni kat, manna adika panisni balna wauhta kulnamana wirlata Dawan yakat nawatta aiwa, yulni dakanama kat,

³¹witing laih kulnin yamni palni ki, kidika bahang manaruhmwi dawas karang manna kau bik mana daukalwas karang, witing muihninabarak balna karak ais pramis yamna dai kidika bik dinitkahwas karang ki dawi bik pranimis kat yamna karang.

³²“Manna mamana balna bayakna yakat waltanauh, dawak mamana balna sara palni kau bayakna kidika bik, Papang muih al dawi sau bik yamna mani kau manna sau bitik yakat yawa yulta dakanauh ma as kat witingna tatalna pa kidika awas kat yuyulwakat dakakanapa di as nuhni kalahwakat.

³³¿Tawan as sihm manna kapat, Papang yulni kuh dahlwa kaupak yulwak dakakana yah, sihm manna dakana mana kaput dawi muih sangnika as bik diswas dana yah?

³⁴¿Dawan ūk as sihm tawanni as yakwi yah tawan balna paskaupak, nining kanin satni sain balna dawi was yamwi minit bayakwi tawanni kaput duna yah parasni nuhni karak muih balna yakat niningna kawi yamadangni kapat di yamna mana yulmana Dawan Egipto kau yamwadai kaput?

³⁵Adika nining kanin kidika kuduh papang yaklauwi yamna muih bitik amanglanin witing kidika rahm Dawan palni, witing kaupak papang ūk dis kidika tanka.

³⁶witing makau kisang kaupak, manayulna manna tanmanaka talwi barangni manayamnin yulni, dawi sau yakat laih kuhnipau kidika niningnakana, dawi bik witing yulni balna kidika kuhpau dahlwa pas kaupak yulwakat dakana mana

³⁷witing yaklauwi muihmana bararak balna yakat dalani talna dawi sulani balna kidika walwi yakna dawi Egipto sauni kaupak parasni nuhni karak pri yakna.

³⁸Manna muhmana kat, nisan balna tanit mahni dawak baisa pararasni bik ruhmwi dana, kaput laih witingna panina kidika manna dunamna yulni, waradika kaiwi kalahwa kaput.

³⁹“Kaput bahang manna yamni palni tunamana yakat āta dutanauh, Dawan kidika laih Papang, makau kisang yakat dawak sau akat bik, dawak witing kaupak baisa ūk nuhni laih diski.

⁴⁰Kidika bahang witing lani balna yana kat warmani manna kau manatayang yakat palni yamtanauh kaput laih manna tamatna yakat yamni yawanama dawi sulamana balna kau bik yamni uina karang, kidika minit yakat manna Papangmana Dawan yaklau sau manawarang yakat bik kurih mahni palni yalahtanama.”

⁴¹Bahang Moses yaklauwi Jordán wasni ma kilwa nining yakat tawan bās walwi yakna dai,

⁴²pini kaupak muih iwarang kat, muhnilau kau waihla awasdai karang bik, kidika tawanni as kau kawi yakmaldinin sipki.

⁴³Kidika tawanni balna kidika adika dai Beser adika tawanni kidika kauhmak wanilang king yakat pakdai dawakat adika tawanni yakat Rubén sulani balna mana uinin pāni diana dai; Galaad sauni pas kau Ramot tawanni kidika laih Gad sulani manah uinin pāni diayana dai dawi Basán sauni kau Golán tawanni kidika laih Manasés sulani balna manah tawannina diana dai.

⁴⁴Adika yul balna kidika kuduh Moses yaklauwi Israel walanbis balna yakat diana,

⁴⁵lā salap diana dai kidika Egipto kaupak kalalahna usnit kat,

⁴⁶kau Bet-peor muhnit kau asang balna bang walsah yakat di yulwadai Sehón kidika Hesbón tawanni yakat sak dai dawa kat Moses yaklauwi war kalbauwi minit bayakwadai, Israel walanbis balna Egipto kaupak yakwi duaiwadai mani.

⁴⁷Bahang Israel walanbis balna adika sauni kawi duduwa dai, kaputbik Basán king Og sauni dawi amorreo balna kingnina ba sauni balna bik kawi duduwa dai, kidika sauni balna kuduh Jordán wasni ma kilwa nining yakat bang dai.

⁴⁸Adika sauni balna kidika nuhni tani duwa dai Aroer sauni kaupak Arnón wasni naini bitik, dawak Sirión[2] asangni kat, adika asangni kidika ayangni ūk bik duwa dai kidika ayangni ūk bik duwa dai kidika kuduh Hermón,

⁴⁹kidika kaupak bayakwi Jordán wasni ma kilwa niningyakat, Arabá sauni kaupak Kuma dauna kat, dawak Pisga asangni sarkat duwa dai.