Read Mayangna Deuteronomio 6 Bible Online

Deuteronomio 6 - Mayangna bible

Deuteronomio 6

¹“Adika kuduh lā balna dawi muih bitik yamnin lani balna ulwi yakna kidika, mana Papangmana Dawan yang kau adar yana manna yakat namangnakatik manasumalna atnik, kaput karak sau manawarang pasyakat yawa adika lani balna kidika laihta yamna atnamna.

²Kaput karak manna Papangmana Dawan ayangni kidika nuhni dulautanama, dawakat manna sangmanaka bitik yakat walamanabis balna dawi mamana balna bitik yakat bik, adika lani balna mana Sumaltayang kidika laihta yamna awanama, kaput karak kurih mahni sangka atnamna yulni.

³Kaput bahang Israel walanbis balna, adika lani balna kidika laihta yamtanauh, kaput laih tamatna yakat yamni yawanama dawi tawan bik nuhni kaltanama, kidika sauni manawarang pas yakat amak dawi tāwas kidika bik sihm was kapat kira kidika, manna muihmanabararak balna Daninawan dawak Papangnina yaklau pramis diyamna dai kaput.

⁴“Israel dakah: Dawan Papang kidika laih, witing manah aslah ki Dawan.[4],

⁵“Man Papangma Dawan yakat dalani talna kulnam bitik karak sangmaka bitik karak dawi parasma bitik karak bik dalani talna.

⁶“Man tunama yakat warmani yul mayultayang bitik kidika āta dutah,

⁷data man walanbis balna yakat bik ma bitik yakat adika yulni balna di yulta awah, uma pas yakat sak awama, tapas yakat likawama, alangwama data lawa bik adika yulni balna kidika di yultah,

⁸adika lani balna kidika tingma yakat sitta dutah data sapama yakat bik mark as kapat āta dutah,

⁹data ūma rahni balna yakat ulta datah dūr kawa yakat bik.

¹⁰“Manna Papangmana Dawan yaklauwi mana yamwa kat, muihmana bararak balna Abraham, Isaac dawi Jacob balna kau sau dianin pramis kalahwadai sauni yakat manaāna karang. Adika sauni pasyakat tawan nunuhni dawak tawan yamni bik bangki, dawa kat adika tawanni balna bik manna yamtasmana dai;

¹¹ū yayamni pasyakat di puwi bahngna bangkidika, manna puta bangtasmana; was dunin pāni kuhrna balna kidika bik manna kuhrtasmana dai, dawak wain yamak, olib kidika bik manna dahtasmana dai, kaunah kidika balna kaupak ismangnalak dawarang.

¹²Kaput kastanama mani manna Dawan kidika datanang kat damatna kahnin awas ki, witing kuduh Egipto sanni yakat muih dini yamyang bangmana dai kaupak mana yakwa dai.

¹³Manna Papangma Dawan yakat ayangni tanit nuhni yamtanauh dawak witing manah dini yamtanauh, dawakat pramis as yamnamna karang kat, Dawan ayangni yakat manah yamtanauh.

¹⁴Manna yaihmatna kau tawan ūk balna, wayani dauh kau ayangni dulalauwa yakat usnitna uhuiwinih,

¹⁵kat manna Papangma Dawan, manna karak kidika, Papang as minit anyang ki, dawak manna namangnakauh kulnin daukalwi manaimuknin sip ki.

¹⁶“Kidika bahang manna Papangmana Dawan yakat traini tatalwinih, Masah sauni kau yamtadai kapat.

¹⁷Manna Papangmana Dawan lani balna kidika kat yamtanauh witing yaklau yamnin manayulna kaput.

¹⁸Di barangni yakat yamtanauh dawak Dawan minikpa yakat yamni talwa kidika dini yamtanauh, kaput karak manna Papangmana Dawan yaklauwi muihmanabararak balna kau sau dianin pramis kalahna dai sauni yakat āwanamna yulni,

¹⁹dawak bik Dawan yaklauwi manna waihmanala balna manna namangna yakat yaklalauwarang mani diyamwak kikirarang, witing pramis yamna kaput.

²⁰“Ma as mani manna walamanabis balna yaklau aput manayulwi dakakawarang: ‘¿Adika lani balna ais tanka yah, mayang Mapapangki Dawan yaklauwi yamnin maiyulna kidika?’,

²¹mana nangnitnalatanama: ‘Yangna laih Fero dini yamyang yangna dai, Egipto yakat, kaunah Dawan parasni nuhni kau yanalaihwi yakna.

²²Mayang palni mamikpa kau di balna mahni yamwa kat talnamayang, dawak Dawan parasni nuhni karak di balna yamwa talnayangna Egipto yakat, dawak Fero niningyakat bik,

²³kaunah mayang laih kidika kaupak maiyakna, dawak maiduwi kiuna, mamuihkibararak balna kau sau dianin pramis yamna dai yakat.

²⁴Kidika usnit kat Dawan Mapapangki yaklauwi maipakna lāni balna kidika yulwa kaput yamnikna, dawak bik risnipik kalanin, kaput laih sangkinaka kidika witing yaklauwi maintalna karang, warmani yamwa kaput.

²⁵Dawak lakat yamnin kidika dudarang, adika lāni balna yulwa yakat yamdarang kat, Dawan Mapapangki muhni yakat, witing yaklauwi yamnin maipakna kaput.’