Read Mayangna Deuteronomio 7 Bible Online

Deuteronomio 7 - Mayangna bible

Deuteronomio 7

¹“Dawan, manna Papangmana kidika, witing yaklau yamwakat sau as āwa dunamna kidika yakat āwanama ki, dawak nisan nunuhni dawak pararasni balna tiaskaubu kidika manna muhmana kaupak kangwi yakwarangki: hitita, gergeseo, heveo, amorreo, cananeo, ferezeo dawi jebuseo kauna.

²Dawan, Papangmana kidika yaklau yamwakat adika nisan balna manna tingmana yakat bubukwarang mani, dawak kalbauta minit bayaktanama mani, adika muihni balna dismuktanama, witingna balna karak pramis as bik yamtas dawak miniknakun bik dakanamna awaski.

³Kaput bik witingna karak kalpaktas awanama, data bik walamanabis balna bik biri biri kidika muihni balna walaninabis balna karak kalduduwas karang.

⁴Kat kidika muihni balna yaklauwi yayamwak walamanabis balna kidika Dawan kaupak naikau kalalahwarang, dawak dawan dauh balna yakat minitna yuyulwarang; kaput laih Dawan kulnin kidika dahlwarang namangna yakat, dawak mamaknapa sipikta sahmuhtamana kapat kat manadismukwarang.

⁵Yamnamna kidika laih sakripais bubuswa pāni balna kidika bahnamna ki, dawak kipala balna pan sarani balna yaihnit yakat prias yayamwa kidika bahta disyamnamna ki, dawak daninawan dauh kidika bik bustanama.

⁶Kat manna kuduh tawan as, Papangmana Dawan tawanni manakulna bahang; Dawan yaklauwi tawan balna mahni paskaupak manna kidika manawalwi yakna bahang, kaput karak manna kidika tawan as yamni palni manakulna ki.

⁷“Dawan manna kau yamni manatalwi tawan balna bitik paskaupak manna kau manawalwi yakna kidika tanka laih, tawan bitik pasyakat manna kidika tawan balna pasyakat tanit nuhni manakulnin laih awaski, rahm kidika laih, manna laih bubin mana.

⁸Dawan yaklauwi Egipto kaupak yakna, muih dinina yayamwa dai kidika kaupak, parasni nuhni karuk laihwi yakna, Fero tingni kaupak, kat dalani ditalwi dawak muihninabararak balna kau bik pramis diyamna yakat yamwi.

⁹Amanglatayang, Dawan, Papangmana kidika laih Papang as rahmki, witing pranimis kat yamwi sulani balna kaiwi bayakwa bitik yakat, ani kat dakawi yayamwa muihni balna yakat;

¹⁰kaunah witing yakat dutni kalkukulwa balna yakat laih bahwidis yamwi. ¡Laihwatwas minit diayawi witing yakat dutni kalkukulwa balna yakat!

¹¹Lā kidika kat yamtanauh, warmani manapaktayang yamna atnamna.

¹²“Adika lani balna dakanamana usnitkat, ais yulwa kaput yamtanama, kaput laih Dawan kidika pranimis yamna kidika kat yamwarang, manna muihmanabararak balna kau yamna dai kaput.

¹³Manna yakat dalani manatalwarang, manna yakat witing prisantni manautuhwi yakna karang, dawak bik manayamwakat mahni kaltanama, manna walamanabis balna kau bik blisin diana karang, dinina dahwa balna kidika minik mahna yayakwarang pan muih balna satni dadahwarang kidika turuh, balna dawak sip balna bik mahni diana karang, sihm manna muih mana bararak balna kau diana pramis kalahwadai yakat yamna karang.

¹⁴Manna mamatna yakat baisa blisin dana karang tawan ūk balna karak manna pasmangna yakat yal as bik bani bina dis karang dawi muih alas bik walanbis yaknin sip awas lani dis karang dawak manna tingmanalau balna pas kat bik, almuk karang yal karang bik sip walanbis yakwas atnin lani diskarang, kaunah bitik kidika walanibis yakyang munah karang,

¹⁵Dawan yaklauwi manna pasmangna kaupak siknis satni balna dawi siknis dutni bik manna pasmangna kaupak yakna karang, kat manna palni talna mana Egipto sauni minit kau yamwa dai kidika nawatkauh laih sihwa kat panis, wawauhna karang.

¹⁶Kaunah Dawan yaklauwi angdika tawanni manna tingmana yakat awa kidika, manna bahta dis yamna awanama, kidika tawanni muihni balna yakat bik miniknakunni tatalwinih data wayani dauh yayamna yakat bik mamatna yuyulwinih, kat kidika kuduh manna yakat manadidiswarang bahang.

¹⁷“Ban bik manna aput kulnamna sipkarang: ‘Adika nisan balna laih mayang karak witingna kauh mahni ki; ¿amput yakmukdarang yah?’

¹⁸¡Bahang manna witingna yamaniduduwinih! Manna yamni ismangna aitanauh, manna Papangmana Dawan yaklauwi Fero dawi Egipto tawanni muihni balna kau bik ais diyamwa dai kidika;

¹⁹manna palni mamaknapa kau talnamana, traini talnin nuhni yamwadai kidika dawi sainni balna muih yamwas dini bik yamwi, manna Papangmana Dawan yaklau Egipto sauni kaupak manayakna dai kidika. Dawan yaklau kaput yamwarang ki angdika tawanni balna manna yamanidutamana kidika balna yakat.

²⁰Kidika manah bik awaski kaunah Dawan yaklauwi yamadunin nuhni as kidika tawanni minit yakat sihna karang, bahang kaput laih kidika tawanni pas yakat muih baisa as as sangka wawatna dawi yakmamaldana bitik yakat iwi dis yamna karang.

²¹Kaput bahang manna witingna balna niningna yakat yamaduduwinih, kat manna Papangmana Dawan, Papang nuhni dawak yamadangni kidika, manna karak sakki.

²²Dawan yaklauwi tani tani adika tawanni balna yakat uswi yakna karang, manna sip awas awanama sirihni palni kidika tawanni balna yakat dauh yamnamna, kat kidika muih dutni, wail balna kidika mahni kalwi yaihmatna balna yakat awaih dahwi, namangnakauh manakalbabauna karang.

²³Kaput ki kaunah Dawan yaklauwi, adika tawanni balna kidika manna tingmana yakat ana karang bahang kaput laih tani tani dauh yamta daukalta dis yamtanama kat,

²⁴kidika kingni balna bik manna tingmana dinit yakat taihta dutanama, dawakat manna yamtanangkat, kidika kingni balna bik king sauni ūk balna bik witingna yakat dinitna kahna karang, kidika kingni balna asbik manna muhmana yakat yaklauwas karang, manna lawa niningna yakat kalbautanama mani kaput bahang manna lawa witingna yakat ita dis yamtamana.

²⁵Witingna daninawan dauh wayani yamna duduwa kidika bik busta disyamtanama kaunah manna kidika sauni pas yakat lalah pauni, lalah pihni duduwa kidika dunamana laih kukulwinih manna kidika tani talnin nuhni yakat bubukwinih, kat manna kidika yamtanama kat Dawan nining kauh dutni palni yamtanama bahang.

²⁶Kaput bahang manna di as bik ūmana yakat di yawanamna awaski Papang dutni talwa dini bitik kidika duiyāwas awanama kaput laih manna yakat bik papang yaklauwi mana daukalwas karang, Kat kidika sauni pasyakat di duduwa bitik kidika dutni kulna ki bahang manna bik dutni talnamnaki.