Read Mayangna Deuteronomio 9 Bible Online

Deuteronomio 9 - Mayangna bible

Deuteronomio 9

¹“Israel walanbis balna yamni dakanauh: waralaih mani balna kaikana Jordán wasni kidika dakta lawanamna, data tawan nunuhni dawak manna karak baisa pararasni kidika bik kalbauta minitbayakta tingmana yakat dunin awasni kidika kaikana, adika tawanni balna bik kipala kau yaihnit balna kidika itikwilana;

²tawanni muihni balna kidika bik nanaini dawi bik ahal nunuhni palni ki sihm muih al nuhni Enoc sulani balna kaput, manna bik uman yamni amanglatamana yul as yuyulwa dai kidika: ‘¿Wais sip yah muih al nuhni Anac sulani balna niningna yakat yaklaunin?’

³“Manna waralaih yamnin amanglanamna ki, manna Papangmana Dawan kidika manna tamatna yakat kiwi tamatna yakat sihm kuh nuhni dahlwi buswa kapat, kidika king sauni balna yakat daukalwi taihlakna karang manna lawa kidika tawanni muihni balna kidika usta yaktanama data bik daukaltanama sihm muih as sipik sahmuh dawa kapat kat uman tingmana dinit yakat bubukna karang, bahang kaput laih Dawan pranimis yakat yamna karang.

⁴Manna muhmana kaupak Papangmana Dawan yaklauwi kangwi yakwarang mani kat, manna aput yuyulwinih: ‘Tingki palnih mayang madiki, Dawan yaklau adika sauni mayana’; Dawan yaklau kangwi yakwa kat, kidika laih witingna dutnina yulni.

⁵Manna kaput kulnamna yamni mana kidika yulni sau kidika awa dunamna laih awaski, witing dutni yayamna kidika yulni manna muhmana kaupak ruhmwi yakwi, muihmanabararak balna kau pramis yamna dai yakat yamna atnin yulni, Abraham, Isaac dawak Jacob, balna yakat.

⁶Manna amanglanamna ki, di yamni yamtamana yulni adika sauni yamni manawaski, manna laih tawan as dutni mana.

⁷“Manna damatna kahnin awaski, kauhmak wanilang yakat manna papang nining kauh lawana mana dai kidika. Egipto sauni data alahwanamana kaupak adika sauni laihna mana kat, manna ma bani Papang niningkauh lawana mana,

⁸kaunah Horeb asangni kau yamna mana kidika laih papang kulnin uba daukalna mana kulnin daukalna kidika bik manna yakat manadismuknin kat bik kulwa dai.

⁹Yang asang ma yakat ilwik yawana yang dai, kipala labanni kau la balna ulwi manna karak pramis yamwa dai kidika duna ilwik yawanayang, bahang asang mayakat ma 40 dawakat pukta 40 sakyang dai,

¹⁰bahang Papang yaklauwi kipala labanni bu kidika yang akat yana, adika kinipala yakat witing palni ulna dai, adika kipala labanni kau ulna yulni balna kidika kuduh mayang asangsar kau kaluduhna mayang mani kuh dahlwa pas kaupak yulwa dai yulni balna kidika ulna ki.

¹¹Ma 40 dawak pukta 40 bayakna usnit kat adika kipala labanni bu kidika yāwadai Papang yaklauwi,

¹²dawi yang kau yayulna: ‘Man adika kaupak sirihni palni lakwa yawah, tawan as Egipto sauni kaupak yakta dai kidika ta didisna kat yang kaupak naikau kalahwi uina witingna yakat ais yamnin paknayang dai kidika dapamwi dawan dauh wayani yayamna di kau arwi.’

¹³“Kaput bik Dawan yang kau yayulna: ‘Yang uman talnayang adika tawanni kidika tapanina dadasni palni ki.

¹⁴Taki kaupak lawah, kulnin balna kidika bitik sau akaupak ustik yakpamki ki, kaunah man laih tawan as parasni mayamki dawak bik mahni, witingna kapat awas.’

¹⁵“Asang kaupak lakwik aiwanayang mani tawan muihni kidika daihni palni sakdai, bahang tingki yaka pramis kinipala labanni bu duainayang.

¹⁶Kauna talingkat manna dai kidika Dawan niningkauh dutmana balna yamna mana data bik gol kau arta turuh wayani as yamta dulaunamana kaput kaupak manna Dawan kaupak naikau alahwana mana, ais yamnin manayulna yang dai bitik kidika ruhmnamana dai,

¹⁷kidika yulni manna muhmana kat, kipala lababanni bu tingki yakat duaita likyang dai kidika ruhmtik bahtik pis manah yamna yang.

¹⁸Kidika usnit kat Dawan muhni yakat limbabahna yang sihm ma balna ūk yamna yang dai kapat sihm madah 40 dawak puhta bik 40 limbabahna yang dai kaput manna dutmana yamtamana kidika yulni data bik Dawan muhni kau dutni yamta kulnin daukalnamana bitik yulni limbabahna yang dai.

¹⁹Yang kasak palni yamadunayang dai papang mana namangna yakat kulnin daukalwi manadismuknin kulna dai kidika yulni, kaunah baisa wat as yang witing kau yulna yang kidika ya dakawa dai.

²⁰Kaput bik Dawan kulnin parasni palni daukalwa dai Aarón niningkauh, witing yakat bik daukalpamnin kulna dai, kaunah yanglawik witing minikunni kidika yulni yulna yang dai.

²¹Kidika usnit kat manna turuh wayani yamta kidika karak dutni yamnamana kidika laihtik kuh pas yakat ruhmnayang, dawak tiktik lungni yamtik was asang kaupak kalahwa kidika wasni yakat ruhm'ānayang.

²²“Kaput bik Tabera yakat, Masah yakat dawak Kibrot-hataava yakat bik, manna Dawan kulnin daukalnamana.

²³Dawak Dawan yaklauwi manapakna mahka alahwa yawanamna atnin Cades- barnea kaupak, witing yaklauwi sau manana yakat āwa dunamna, dawak kasak kultasmana dai, dawak yulni bik dakasmana dai.

²⁴¡Yang manna kau manatalnayang, mani kaupak, Dawan niningkauh dutmana balna yamta mana!

²⁵Dawan yaklauwi manna yakat mana disnin kulna kidika yulni, witing muhni yakat madah 40 dawak pukta bik 40 limbabahtik,

²⁶aput witing yakat sarahtik kalyulna yang: ‘Dawan, man lawa adika tawanni yakat daukalwinih kat adika tawanni adika man dima bahang, man lawa laihta yaknaman parasma nuhni karuk, Egipto sauni kaupak yakna man.

²⁷Ismang katwang man warauma balna Abraham, Isaac dawak Jacob kidika balna. Adika tawan dutni yayamna balna kidika kulwinih.

²⁸Kaput laih bangyangna dai sauni kaupak yanatatalwadai muihni balna dai kidika ban bik yayulwarang: Dawan yaklauwi sip diawak kawas dadana pramis sauni yakat, akaupak diyamwak kalalahna kauhmak wanilang yakat dauna atnin yulni.

²⁹Kaunah witingna kidika laih man tawanma, man dima, man lawa Egipto sauni kaupak parasma nuhni karak yaknaman.’