Read Mayangna Jan 1 Bible Online

Jan 1 - Mayangna bible

Jan 1

¹Tatuna kaupak Yulni kidika laih ban sakdai, dawak kidika Yulni dai kidika laih Papang karak dai, dawak Papang dai.

²Witing kidika tatuna kaupak Papang karak dai.

³Witing munah, Papang di balna kidika bitik yamna; di balna bangkidika pasyakat as bik diski witing dis kat yamna dini kidika.

⁴Witing yakat sakdai sangnika kidika, dawak kidika sangnika kidika laih yaringni diana dai muih balna yakat.

⁵Adika yaringni laih puksani pasyakat ingni yaringwi, dawak puksani kidika yaklauwi sip piwas dana.

⁶Muih al as dai ayangni laih Jan, witing kidika Papang yaklauwi kalsihna dai

⁷witnis atnin, kaput laih yaringni kidika witninis atnin, dawak witing yulwa balna kidika yakat muih bitik kulna atnin.

⁸Yaringni kidika laih Jan awasdai, kaunah witing kidika laih sisihna dai yaringni kidika witnis yulna atnin.

⁹Yaringni rahm muih balna yakat yaringni diawa kidika sau akat kaina dai.

¹⁰Kidika Yul dai kidik laih sau akat sakdai; dawak, Papang yaklauwi witing munah sau adika yamna dai kaunah, sau muihni balna kidika amangnilawas dadana.

¹¹Witing palni sauni yakat kaina, kaunah witing dini balna kidika kalduwas dadana.

¹²Kaunah wais balna duwi dawak rahm kukulna balna kidika laih witing yakat, witingna yakat yamni dikulna Papang walanibis balna atninna kidika.

¹³Dawak witingna kidika laih Papang walanibis balna, muih balna muihnina nuhni dukih diawak walaninabis yayakwa kaput laih awaski, kaunah Papang yaklauwi diyakna bahang.

¹⁴Kidika Yul, muih kalna kidika, mayang mapasking yakat yalahna dalani lani nuhni dawak rahm karuk bik. Dawak alasnina yaksihni bik talnamayang, kidika alasnina yaksihni Papangni kaupak duna dai kidika, witing Walanibis aslah dai kaput.

¹⁵Jan yaklauwi kidika witninis yulwi aput yulna: “Witing adika kuduh yang yultayang dai kidika, yang uskit yakat kaiwi, kaunah tanit nuhni kulna ki, kat witing laih yang takit kaupak ban ki.”

¹⁶Witing di manas duwa kidika kaupak, witing blisinni kidika wat wat mayana.

¹⁷kat lā kidika laih Moses munah kalana dai, kaunah dalani lani, dawak di rahm kidika balna laih Jisas Krais munah kaiwi kalahna.

¹⁸Muih as bik Papang kidika talwas ki; Walanibis aslah kidika manah talna, kidika laih Papang,[1] dawak aslah palni yalahwa kidika Papang karak, bahang witing yaklauwi manikingkana.

¹⁹Jerusalén kaupak Ju muihni balna dawak sumalyang balna kauna sisihna dai Jan yakat witing yakat kalyulwi dakana atninna wais daipa.

²⁰Dawak witing lāih diyulna dai: —Yang laih Mesías awasyang.

²¹Dawak watwi kalyulwi dakakana: —¿Kaput kat waismahn? ¿Prapit Elías? Jan yulna: —Yang witing awasyang. Dawak witingna watwi yulwi dakakana: —Kaput kat, ¿prapit kaiwarang dai kidika manyah? Nangnitnalana: —Dikah.

²²Kalyuyulna: —¿Kaput kat waismahn? Yanasisihna muihni balna yakat yul as duyawinikna ki. ¿Man yulma kidika sipmahn yanayulnin?

²³Jan yaklauwi nangnitnalana: —Yang kuduh parasni sarahtik yultayang kauhmak wanilang yakat: ‘Dawan tani barangni yamtanauh’, prapit Isaías yulna kaput.

²⁴Parisi balna yaklauwi sisihna dai kidika Jan karak yulbaunin,

²⁵kalyulwi dakakana: —Mesías awasman, Elías bik awasman, prapit bik awasman kat, ¿ais yamta muih was utuhta yaktamahn?

²⁶Jan yaklauwi nangnitnalana: —Yang laih was kau utuhtik yaknayang; kaunah manna pasmangna yakat as likki kidika man amanglatasmana,

²⁷kidika laih uskit kaupak kaiwi. Kidika laih yang witing susni wahni bik sip awasyang uluhnik.

²⁸Adika dini laih Betania pāni yakat kalahna, Jordán wasni nakasyakau, kidika yakat Jan muih was utuhwi yakwasakdai kidika.

²⁹Kidika kaupak payahwak, Jan talna Jisas, witing yakat kiwak, dawak yulna: “¡Talnauh, kidika kuduh Papang sīpni, muih balna dutnina uswi yakwa kidika!

³⁰Witing yakat kuduh yulnayang dai kidika: ‘Yang kaupak uskit yakat as kaiwi, witing kauh tanit nuhni kalkulna ki, kat witing laih yang takit kaupak ban bahang.’

³¹Yang palni bik amanglatasyang dai wais daipa; kaunah yang laihwas kau utuhtik yaktik aiwanayang, kaput laih Israel muihni balna kidika amanglana atnin yulni.”

³²Jan bik adika lāih yulna: “Yang talnayang, Spirit Holi kidika makau kisang kidika kaupak kaiwi bukwak buhtuku kapat, witing minit yakat.

³³Yang bik baisa amanglatasyang dai, wais daipa; kaunah was kau utuhtik yaknin yulni yasihna muihni kidika yayulna: ‘Kidika muihni minit yakat Spirit Holi kidika kiwi watwarang kat, kidika muihni kuduh Spirit Holi kau was utuhwi yakwa kidika.’

³⁴Yang uman talnayang, dawak bik witnisyang witing laih Papang Walanibis al.”

³⁵Kidika kaupak ma payahwak, Jan kidika witing usnit uiyang balna bu kidika karak bangdai.

³⁶Witing talwak Jisas kidika bayakkiwak, Jan yulna: —¡Talnauh, kidika kuduh Papang sīpni!

³⁷Jan usnit uiyang balna bu kidika, Jan yulwa dakakana, dawak Jisas usnit yakat uina.

³⁸Jisas wiryaklawi talwak usnit yakat uiwak, diyulwi dakana: —¿Ais waltamanah? Witingna kalyuyulna: —Maestro, ¿man angkat yalahtamahn?

³⁹Jisas yaklauwi nangnitnalana: —Aiwa talnauh. Uiwi tatalna, witing angkat yalahwa kidika, dawak kidika mani bitik laih witing karak bayayakna, kat uman maulahu awar arungka kapat dai bahang.

⁴⁰Jan yulwak dakawi Jisas usnit uiwi uina balna bu kidika kaupak as, kidika laih Andru dai, Saiman Pita wirahni.

⁴¹Andru witing tatuna kalpakna kidika laih witing wirahni Saiman dai, dawak kalyulna: —Mesías karak kalpaknayangna (kidika tanka laih: Krais.)

⁴²Kidika usnit kat Saiman dai kidika Andru yaklauwi dukiuna, Jisas sakdai yakat, dawak Jisas kaltalwi kalyulna: —Man laih Saiman man, Jan walanibis,[2] kaunah man ayangma laih Cefas karang (kidika tanka laih Pita).

⁴³Kidika kaupak payahwak, Jisas Galilea yakat kiunin kulna. Pilip karak kalpakwi kalyulna: —Uskit uitah.

⁴⁴Pilip kidika laih Betsaida tawanni kaupak dai, kaput bik laih Andru dawak Pita bik laih sihm kidika pāni kaupak dai.

⁴⁵Pilip, witing Natanael yakat walwi kiwi kalpakwi kalyulna: —Yangna kalpaknayangna kidika muihni yulni Moses lā wauhnitaya yakat ulna dai kidika, dawak sihm kidika muihni yulni prapit balna bik uhulna dai kidika. Kidika laih Jisas, José walanibis, Nazaret kaupak dai kidika.

⁴⁶Natanael yulna: —¿Nazaret kaupak di yamni as kalahnin sip katpah? Pilip yaklauwi nangnitlana: —Man aiwa laktatalah.

⁴⁷Jisas witing talwak Natanael kidika witing yakat kiwalik kat, yulna: —Akat kaiwi, rahm Israel palni kidika, witing yakat alas as bik diski.

⁴⁸Natanael yaklauwi kalyulwi dakana: —¿Man amput amangkilatamahn? Jisas yaklauwi nangnitlana: —Pilip mayulwa tanit kau matalnayang, ani damni panan dinit yakat sakman kat.

⁴⁹Natanael yaklauwi kalyulna: —Maestro, ¡man kuduh Papang Walanibisman, dawak Israel Kingni bik!

⁵⁰Jisas yaklauwi nangnitlana: —¿Yang akat rahm kultaman, kat yang lawik mayultikda bahang, ani damni panani dinit yakat sakman kat matalnayang? Man di tanit nunuhni talma, adika karak dawakat.

⁵¹Dawak adika yulni bik Jisas kalyulna: —Yang rahm palni mayultayang, makau kisang kidika bik apahwak talma, dawak Papang innisal balna kidika muih Walanibis al minit yakat yaklakaiwi, dawak kilwi kiwi ahawak.