Read Mayangna Jan 11 Bible Online

Jan 11 - Mayangna bible

Jan 11

¹Muih al as siknis dai kidika ayangni laih Lázaro, witing laih Betania kaupak dai, Mery dawak wirahni Marta karak tawannina dai kidika.

²Mery kidika laih Lázaro wirahni yal dai, bahang witing kuduh dia walapni Jisas kalni yakat utuhna dai kidika, dawak basni kau uswi buhna dai kidik.

³Kaput bahang, wirahni yayal balna bu dai kidika yaklauwi yul kalsisihna dai Jisas yakat: —Dawan, man karak kaltalyang yamni dai kidika siknis ki.

⁴Jisas, kidika dakawi yulna: —Kidika sikninis yaklauwi kalyamwak dauwas karangki; kaunah kidika munah Papang alasnina yaksihni kidika niningkana karang, dawak Papang Walanibis al alasnina yaksihni kidika bik.

⁵Jisas yaklauwi Marta yakat dalani talwadai, wirahni yal, dawak Lázaro yakat bik,

⁶Lázaro siknis kidika kalyuyulna kaunah baisa ma bu walna dai, witing sakdai kidika pāni yakat.

⁷Kidika usnit kat disainipil balna yakat diyulna: —Judea yakat watdi mawanang.

⁸Disainipil balna yaklauwi kalyuyulna: —Maestro, wisam palni, kidika pāni kau Ju balna bangkidika kipala kau mabahrwi mainin yayamna, ¿kaunah watta kiunin kultamahn kidika pāni yakat?

⁹Jisas yaklauwi diyulna: —¿Rahm awasyah, ma as kidika awar 12 duwi? Kaput kat muih as madah yakat likkidika, kalni bauwi bukwas ki, kat adika sauni akat yaringni duwa kidika talwa bahang;

¹⁰kaunah pukta liklaih, kalni bauwi, kat yaringni dis kidika yulni.

¹¹Kidika usnit kat baisa minit yakat yulna: —Lázaro karak kaltalyang yamni mayang dai kidika kamana, kaunah yawaki ki ustik sahmuna.

¹²Disainipil balna yaklauwi kalyuyulna: —Dawan, witing kamana kat, kidika tanka laih kalyamwarang ki.

¹³Kauna Jisas diyulna kidika laih, Lázaro laih uman dauna, kaunah disainipil balna kukulna kidika laih rahm kaminin kidika kukulna.

¹⁴Kaput laih Jisas yaklauwi lāih diyulna: —Lázaro dauna.

¹⁵Yang alasnayang kat kidika yakat sak-awasyang dai bahang, kat kaput laih manna namangna yakat yamni ki, kasak kulnamna kidika. Kaunah talna mawang.

¹⁶Kaput laih Tomás, sūtki kalatwadai kidika, disaipil ūk balna yakat diyulna: —Mayang bik mawanang, witing karak kalpakdi daunin.

¹⁷Jisas kiwakat, Lázaro dauwak nununa kidika laih uman ma arungka duwadai.

¹⁸Betania kidika laih Jerusalén yaihnit yakat dai; kilómetro bās kapat dai;

¹⁹dawak Ju balna kidika manas palni uina dai Marta dawak Mery yakat kaltalna atnin, dawak bik walanina ānin, witingna wirahnina al dauna kidika yulni.

²⁰Marta dakana, Jisas kidika mahka kiwi kawi atwak, kalahwi kiuna kalpakna atnin, kaunah Mery laih ū yakat watna dai.

²¹Marta yaklauwi Jisas yakat kalyulna: —Dawan, man akat sakman dai katlaih, yang wirahki al kidika daunin awasdai.

²²Kaunah yang amanglatayang, man Papang yakat ais yulma kidika mawarang.

²³Jisas yaklauwi nangnitlana: —Man wirahma kidika watwi sangka kalwarang ki.

²⁴Marta yaklauwi kalyulna: —Agha, yang amanglatayang watwi sangka kalwarang kidika, dauna balna yaklalauwarang mani yakat, mani witni yakat.

²⁵Jisas yaklauwi kalyulna: —Dauna kaupak yaklaunin kidika kuduh yang, dawak bik sangka kidika bik. Wais yang akat yakulwarang kat, dauwarang kaunah watwi sangnika duwarang;

²⁶muih bitik baisa sangka balna kidika, yang akat yakukulwarang kat, sip dadauwas karang. ¿Kidika rahm kultamahn?

²⁷Yal kidika yaklauwi kalyulna: —Agha Dawan, yang kultayang man laih Mesías man, Papang Walanibis al kidika, sau akat kainin dai kidika.

²⁸Kidika yulna usnit kat, Marta kiwi wirahni Mery yakat kalyulna kiuna atnin, dawak malni kau kalyulna: —Maestro akat sakki, mayulwi yawanam.

²⁹Witing dakawa minitni yakat, Mery yaklauwi kiuna, Jisas yakat talna atnin.

³⁰Jisas kidika baisa tawan yakat kiwi kawasdai; Marta karak kalpakna kidika pāni yakat sakdai.

³¹Mery kidika sirihni yaklauwi kalahkiwak, Ju balna witingna karak bangdai kidika walani āwi, witingna bik usnit uiwi uina, witingna kukulna laih, sau-ū yakat kaidana kiwi.

³²Mery witing Jisas sakyakat kiwi, kalni dinit yakat limbabahwi, yulna: —Dawan man sakmandai katlaih, yang wirahki al kidika daunin awasdai.

³³Jisas witing Mery kaidak talwi, dawak Ju balna bik witing karak uina kidika balna bitik talwak, parasni palni kulnin kidika kalitikna, dawak bik kalyukna,

³⁴dawak diyulwi dakana: —¿Angkat uita nunamanah? Kalyuyulna: —Dawan, aiwatalah.

³⁵Dawak Jisas kaidana.

³⁶Kaput dawak Ju balna yuyulna: —¡Talnauh, ampus dalani kaltalwādai kidika!

³⁷Kaunah buas yuyulna: —Adika, muih miniknapa dis kidika yakat miniknapa diana, ¿bahang sip di as bik yamwasdaih Lázaro dauwas atnin yulni?

³⁸Jisas, watwi kulnin kidika kasak palni kalitikna, dawak sau-ū yaihnit yakat kiuna. Kidika laih pasulihni as dai, panikungmak kidika laih kipala kau putna dai.

³⁹Jisas diyulna: —Kinipala kidika yaktanauh. Marta, dauna kidika wirahni yal kidika yulna: —Dawan, uman wayani kalna, kat dauna kidika ma arungka dawabahang.

⁴⁰Jisas yaklauwi nangnitlana: —¿Mayulnayang awasyah, kasak kulmakat, Papang alasnina yaksihni kidika talma?

⁴¹Kipala kidika yakwi lalana, dawak Jisas, witing makau kisang yakat talwi yulna: —Papang, tingkih mayultayang, kat yadakanaman bahang.

⁴²Yang amanglatayang, man nining yadakaman, kaunah yultayang akat muih bang-adika yamnina kidika yulni, kaput laih witingna rahm kulninna, man lawa yasihnaman kidika.

⁴³Kidika yulwak usnit kat sarahna: —¡Lázaro kidika kaupak alahwah!

⁴⁴Dauna dai kidika kaupak kalahna, tingni balna, kalni balna bik sitna dai asna kungni kapatnah kau, dawak muhni laih asna baini kau wadatna dai. Jisas yaklauwi diyulna: —Uluhtanang kat mahka kiwang.

⁴⁵Kidika yulni muih manas kukulna, Ju balna Mery karak uina dai kidika balna bik, kat witing ais yamna balna kidika bitik tatalna dai bahang.

⁴⁶Kaunah buas parisi balna yakat uina, dawak Jisas di yamna kidika yuyulna.

⁴⁷Kaput laih parisi balna sumalyang taninatuna balna kidika, kaluduhna tanit nuhni kidika karak kalududuhna, dawak yuyulna: —¿Ais yamdarangyah? Adika alni sain manas palni yamwi.

⁴⁸Dadarang kat, muih manas palni laih witing yakat kukulwarang, dawak Roma kaupak lā muihni balna kidika aiwi makatyulnin ūni duda kidika dawak mayang nisan balna bik daukalmumukwarang.

⁴⁹Kaunah kidika balna pasyakat as ayangni Caifás, witing laih sumalyang nuhni as dai, kidika kurihni yakat, bahang diyulna: —Manna laih di amanglatasmana,

⁵⁰ismangna aitasmanah, manna namangna yakat tanit yamni karang awasyah, muih aslah dauwarang kidika tawan yulni, dawak tawan bitik muih dadauwarang karak dawakat.

⁵¹Kaunah, Caifás kidika witing silp kulnin yulwasdai, kaunah witing kidika sumalyang nuhni dai bahang kidika kurihni yakat, bahang prapit yulni kidika yulna, Jisas laih Ju ninisan yulni dauwarang ki;

⁵²kaunah kidika ninisan manah yulni awaski, kaunah Papang walanibis balna kidika bitik uduhnin yulni, rani bangkidika kaupak.

⁵³Kaput bahang kidika mani kaupak Ju lā muihni balna kidika kukulna Jisas kidika īna atnin.

⁵⁴Kidika bahang Jisas kidika Ju balna muhnina yakat lāih lik-awasdai, kaunah Judea sauni kaupak kalahwi kiuna, kauhmak wanilang yaihnit yakat kiuna, tawan as ayangni Efraín yakat. Kidika yakat witing disainipil balna karak wawatna.

⁵⁵Insal kaiwi bayakna kidika mani Ju balna alasna yayamwa kidika ulisdana dai, bahang tawan muihni balna kidika manas palni laih Jerusalén yakat uina, maisihnidis kalahna atnin, insal kaiwi bayakna mani kidika kaiwi kawas tanit kauh.

⁵⁶Jisas yakat wawalna, dawak biri biri yulwi dakakana, makatyulnin ūni yakat: —¿Ampat talamanah? ¿Alasna akat kaiwarang pah?

⁵⁷Parisi balna, dawak sumalyang balna taninatuna balna bik yaklauwi papakna dai, Jisas kidika angkat sakkat tatalna kat isningna papakwarang, kaput laih laihwi sitna atnin.