Read Mayangna Jan 12 Bible Online

Jan 12 - Mayangna bible

Jan 12

¹Insal kaiwi bayakna mani kidika kaiwi kawas tanitkauh ma tiaskauas yakat, Jisas Betania yakat kiuna, Lázaro yalahwa pāni yakat, dawak witing yaklauwi dauna kaupak dulauna dai kidika.

²Kidika yakat kasnin alasnina as yayamna dai Jisas risnipik kau; Marta laih kasnin dini balna lakwalikdai, dawak Lázaro laih tibil yakat Jisas karak di kaswaraudai.

³Mery laih dia walapni gramos andat bās duwi kiuna, kidika laih minitdai, bahang kidika kau Jisas kalni yakat utuhna, dawi basni kau uswi buhna. Ū pas kidika bitik walapni manah danadai.

⁴kaput dawak Judas Iscariote, Jisas yakat daunin yakat āwarangdai kidika, yulna:

⁵—¿Amput dawak adika diani walapni wauhwi bakakanwas dai, ma andat bu muih as wark kalahna kidika minit, dawak kidika lalahni kau muih balna miniknakunni yakat dina atnin?

⁶Kaunah Judas witing yulwas dai, muih miniknakunni yakat dalani talwa kidika yulni, kaunah witing laih di malyang dai bahang, dawak bik witing lalah ūni kidika duwalikbahang, lalah ūni yakat āwa kidika kaupak witing malwādai.

⁷Jisas yaklauwi kalyulna: —Datah, witing apakna duwasakdai, yanunuwarang kidika dini mani.

⁸Muih miniknakunni kidika laih manna ban dutanama ki, kaunah yang laih ban yadutas awanama.

⁹Ju balna manas dakakana Jisas kidika Betania yakat sakki atwakat, dawak kidika yakat uina, Jisas yakat talna manah uiwasdai, kaunah Lázaro yakat bik talna uina, Jisas yaklauwi dauna kaupak dulauna dai kidika.

¹⁰Kaput laih sumalyang balna taninatuna kidika yaklauwi Lázaro yakat bik īnin yayamna,

¹¹kat witing yulni Ju balna manas witingna kaupak dakkalahwi uiwi Jisas yakat kukulwa kidika yulni.

¹²Muih manas Jerusalén yakat uina, insal kaiwi bayakna kidika alasnina yakat. Kidika mani payahwakat, dakakana, Jisas laih tawan nuhni yakat kiwi kawarang ki.

¹³Kaput laih kuku satni balna basni kidika dadakna, dawak kalalahna kalpakna atnin, dawak bik sarahwi aput yuyulna: —¡Alasna yaksihni![18] ¡Dawan ayangni kau duwi kaiwa kidika laih ayangni nuhni yamna karang! ¡Israel kingni kidika laih ayangni nuhni yamna karang!

¹⁴Jisas biriku as kau kilwi kiuna, Ulna yakat yulwa kaput:

¹⁵“Yamaduwinih, Sayan tawanni nuhni; talah, man Kingma kaiwi biriku almuk bik as kau kilwi.”

¹⁶Tatuna laih disainipil balna amanglalawas dai, kaunah usnit dawak, Jisas kidika alasnina yaksihni yamna usnit kat, witing yakat kalyayamna balna bitik kidika wauhtaya yakat ulna dai witing yulni.

¹⁷Jisas yaklauwi Lázaro yakat kalahnin kalyulna dai kidika sau-ū kaupak, bahang kidika mani witing karak muih balna bangdai kidika, yuyulna dai, witing di balna yamwak tatalna dai kidika.

¹⁸Kidika bahang, muih balna kidika Jisas niningkau kalahwi uina dai kalpakna atnin, kat witingna dakakana dai bahang sain yamna kidika.

¹⁹Kaunah parisi balna laih biri biri yuyulna: —Manna talamana, kaput laih mayang di as bik yamdas karang. Talnauh, ¡muih bitik witing karak uiwi!

²⁰Jerusalén yakat muih balna uina dai kidika alasnina yakat, grik balna bik bangdai.

²¹Kidika balna Pilip yaihnit yakat uina, Betsaida kaupak dai kidika, Galilea kau tawan as dai kidika kaupak, witing yakat kalyulwi dakakana: —Dawan, Jisas kidika talkih yanawi.

²²Pilip kiwi Andru yakat kalyulna, dawak albu kalpakwi uiwi Jisas yakat kalyuyulna.

²³Kaput laih Jisas yaklauwi diyulna: —Awarni kaiwi kana, muih Walanibis al kidika alasnina yaksihni kidika yamna karang.

²⁴Yang rahm manayultayang, plawar minik kidika sau yakat bukwak dauwas karang kat, witing alas watwarang; kaunah dauwarang kat, minik mahni yakwarang.

²⁵Wais kat sangnika dalani talwarang kidika diswarang, kaunah sangnika kidika dalani talwas karang kat adika sauni akat, sangka ban atnin yakat apakna karang.

²⁶Muih as yang diki yamnin kulwakat, uskit uiwang; yang angkat sakyangkat, diki yamwa kidika bik kidika yakat sakkarang. Muih as yang diki yamwarang kat, Papangki yaklauwi risnipik kalana karang.

²⁷“¡Adika minitni akat kulnin bukna parasni yalaihwi! ¿Dawak ais yulkiyah? ¿Yulkiyah: ‘Kulnik bukna akaupak Papang yalaihta yaktah’? ¡Kauna kidika yulni kuduh aiwanayang kidika!

²⁸Papang, man ayangma kidika yaringni yaksihni yamtah. Kaput dawak yulni as makau kisang kidika kaupak dakana, aput yulwak: “Uman yaringni yaksihni kidika yamnayang, kaunah wattik yamki ki.”

²⁹Muih balna yakat bangkauna dakakana kidika, yuyulna kidika laih alwana as dai; kaunah muih ūk balna kidika yuyulna: —Insal as yulkalbauna.

³⁰Jisas yaklauwi diyulna: —Yang yulki laih awaski, kidika yulwak dakanda kidika, kaunah manna yulmana yulna.

³¹Adika minitni adika kuduh muih balna lanina kidika yamna karang kidika, dawak bik waradika, adika sauni akat king kawa kidika kangwi yakna karang.

³²Kaunah yang adika sau akaupak yadulauwarang kat, muih bitik kidika yang akat duaiki.

³³Adika yulni balna munah diyulnin yamna, witing amput dauwarang kidika.

³⁴Muih balna yaklauwi nangnitlalana: —Lā munah amanglatayangna Mesías laih dauwas ban karang ki. ¿Amput man yultaman, muih Walanibis al kidika laih dulauna karang ki? ¿Waisyah muih Walanibis al kidika?

³⁵Jisas yaklauwi diyulna: —Baisa manna pasmangna yakat yaringni kidika sakkarang, kaunah ma parahni manah karang. Manna lapaktanauh, yaringni dutamana bahang, kaput laih pukta kidika manalaihwas karang; kat puksani yakat likkidika laih, angkat kiwa kidika amanglawas ki.

³⁶Yaringni kidika yakat kalkultanauh, dutamana bahang, kaput laih yaringni muihni awanama. Adika yulni balna yulna usnit kat, Jisas kiwi yakmaldana.

³⁷Jisas kidika sain nunuhni balna yamnadai kaunah witingna muhnina yakat, witing yakat rahm kalkukulwasdai;

³⁸kat prapit Isaías ulna yakat kaiwi kalahnin dai bahang: “Dawan, ¿mayang yulnamayang kidikawais kulnayah? ¿Dawan parasni kidika wais yakatniningkanayah?”

³⁹Kaput bahang sip kukulwasdai, kaput bahang Isaías ulna dai kidika:

⁴⁰“Papang yaklauwi miniknapa putna dawak sinsnina bik dutni yammukna, witingna tatalwas atninna dawak bik amanglawas atninna; kaput laih yang akat yang akat ainin awas, dawak yang lawik muihnina nuhni kidikayamni diyamnik awas.”

⁴¹Isaías witing kaput yulna, kat Jisas alasnina yaksihni kidika talna dia bahang, dawak bik witing yulni yulna dai.

⁴²Kaput kaunah, Ju balna manas kalkukulna dai Jisas yakat, dawak bik Ju balna tanit nunuhni balna bik. Kaunah witingna lāih laih yuyulwasdai parisi balna yamanina duduwa kidika yulni, sumalnin ūni kaupak diyakmuknin awas yulni.

⁴³Witingna kau yamni kukulna alasna yaksihni muih yaklauwi kalawa kidika, dawak Papang yaklauwi alasna yaksihni diawa kidika karak.

⁴⁴Jisas yulni parasni yulwi yulna: “Wais yang akat kulwa kidika, yang akat manah laih yakulwas ki, kaunah Papang yakat bik kulwi, witing yasihna kidika.

⁴⁵Dawak wais yang akat yatalwa kidika, yasihna muihni yakat bik talwi.

⁴⁶Yang, yaringniyang adika, adika sauni akat aiwanayang, yang akat yakukulwa balna kidika puksani yakat watnin awas yulni.

⁴⁷Kaunah angdika muihni yulki dakawi kulwas kidika; yang lawik daunin yakat kalwirlatasyang; kat yang aiwanayang adika sau muihni balna adika daunin yakat diwirlanik aiwasyang, kaunah solnina laihtik yaknin aiwanayang.

⁴⁸Wais kat dauh yakulwi, yulki balna yakat dakawas kidika laih, uman duwi wais yaklauwi daunin yakat kalwirlana kidika: yang yul balna yulnayang kidika yaklauwi laih witni mani yakat daunin yakat kalwirlana karang.

⁴⁹Kat yang alas kulnik lani yultasyang; Papang witing yasihna kidika, yaklauwi yapakna yang ais yulnik kidika, dawak ais sumalnik kidika bik.

⁵⁰Dawak yang amanglatayang Papangki yulni balna kidika laih sangka ban atnin yulni balna. Kaput bahang yang yultayang kidika, Papangki yapakna kaput yultayang.”