Read Mayangna Jan 14 Bible Online

Jan 14 - Mayangna bible

Jan 14

¹“Manna kulnamna kaidinin awaski. Papang yakat kultanauh, dawak yang akat bik yakultanauh.[19]

²Yang Papangki ūni yakat yalahnin ūni manas ki; kaput awas katlaih, yang manayultas awaki, pa ridi yamna yawayang.

³Dawak yang yawing usnit kat, pa balna kidika ridi yamtik datik wattik aiwik manadutik yawaki yangkarak, kaput laih yang angkat sak-awaki yakat manna bik bang-atnamna.

⁴Manna tani amanglataman, yang yawayang kidika.[20]

⁵Tomás yaklauwi Jisas yakat kalyulna: —Dawan, amanglatasyangna angkat yawaman pa, ¿ta kidika amput amanglatanakiyah?

⁶Jisas yaklauwi nangnitlana: —Yang kuduh ta, di rahm kidika, dawak sangka atnin kidika. Yang munah manah sipki Papang yakat kiunin kidika.

⁷Manna yang akat amangkilatamana kat, Papangki yakat bik amangnilatanama; warmani kaupak amanglatamana, kat talamana dai bahang.

⁸Kaput laih Pilip yaklauwi kalyulna: —Dawan, yanadatang kat Papang kidika talnakuh, dawak kidika manah aitani karang.

⁹Jisas yaklauwi nangnitlana: —Pilip, ma mahni mannakarak yang, ¿baisa amangkilatasmahn? Wais yang akat yatalna kidika laih Papang yakat talna; ¿kaunah amput dawak yayultamahn manadating kat Papang yakat talnin?

¹⁰¿Man kultasmahn, yang Papang karakyang, dawak Papang kidika yangkarak kidika? Adika di balna manayultayang adika, yang alas kulnin lani manayultasyang. Papang yang akat yalahwa kidika, witing silp warkni balna yamwi.

¹¹Yakultanauh, yang Papang yakat yang kidika, dawak Papang kidika yang karak kidika; kaput awaskat, warkni balna yakat tala kultanauh.

¹²Rahm manayultayang, wais yang akat yakulwa kidika, yang wark balna yamtayang kidika witing bik yamwarang, dawak baisa nuhni bik yamwarang, kat yang yawayang bahang Papang sakyakat.

¹³Manna di bitik yultanama kidika yang ayangki kau, yamna awaki, kaput laih Walanibis al kidika munah Papangni alasnina yaksihni kidika lāih kalahwarang.

¹⁴Ais ais karang bik yang ayangni kau yultanama kat, yamki.

¹⁵“Manna dalani yatalamana kat, yang laki balna kidika yamtanama.

¹⁶Dawak yang lawik Papang yakat yulki ki tamatna daknin kidika ūk manasihna atnin, rahm Spiritni kidika, kaput laih ban manna karak atnin kidika. Adika sauni muihni balna laih sip duduwas karang, kat tatalwaski dawak bik amanglalawas bahang; kaunah manna laih amanglatamana, kat witing laih manna karak bahang, dawak bik manna yakat karang bahang.

¹⁸“Warau manadatas awaki, yang nawattik aiwaki manna karak atnin.

¹⁹Tihndawak, sau muihni balna kidika yatatalwas karang; kaunah manna laih yatalnama, dawak sangka awanama, kat yang sangkayang bahang.

²⁰Kidika mani, manna amanglatanama yang Papang yakat yang kidika, dawak manna laih yang karak mana, dawak yang manna karak.

²¹Yang laki balna dakawi kaput yamwa kidika, yakat lāih kalahwi yang akat dalani yatalwa kidika. Dawak Papangki bik dalani kaltalwarang wais yang akat dalani yatalwa kidika, dawak yang bik dalani kaltalki, dawak witing yakat lāih alahwaki.

²²Judas (Iscariote awas kidika) kalyulwi dakana: —Dawan, ¿amput dawak yangna akat manah lāih alahwamayah, kaunah sau muihni balna yakat laih awas?

²³Jisas yaklauwi nangnitlana: —Wais dalani yatalwa kidika, yang yulki dakawi yamwi; bahang Papangki bik dalani kaltalwarang, yang dawak Papangki karak aiwik witing karak yalahdanaki.

²⁴Wais dalani yatalwas kidika, yang yulki balna kidika kulwas ki. Manna yul balna dakamana kidika laih yang yulki balna awaski, kidika laih Papangki kaupak ki, witing yaklauwi yasihna kidika.

²⁵“Adika yulni balna bitik manayultayang, yang manna karak sakyang bahang;

²⁶kaunah Tanitdakyang, Spirit Holi, Papang yaklauwi sihwarang kidika yang ayangki kau, di bitik manasumalwarang, dawak watwi ismangnapakwarang manayulnayang yulni balna bitik.

²⁷“Kulnin aslah manatayang. Kulnin aslah dutayang kidika manatayang, kaunah sau muihni balna yuyuwa kapat laih manatasyang. Kulnamna kaidinin awaski, dawak bik yamaduduwinih.

²⁸Uman yulting yadakanamana, dawak wattik aiwaki manna karak atnik. Manna rahm dalani yatalamana kat, manna alasna dutanama, yang Papang yakat yawayang kidika amanglatamana bahang, kat witing laih yang karak takit bahang.

²⁹Adika baisa tanitkauh manayultayang, kaput kaiwi kalahwakat, rahm kultanama.

³⁰“Yang yul mahni yultas awaki manna karak, kat adika sauni tunan muihni kidika kaiwa bahang. Kaput kaunah, yang mikityakat parasni as bik diski,

³¹kaput atnin ki, kaput laih sau muihni amanglawarang Papang yakat dalani talayang kidika, dawak yamtayang, witing yaklauwi yapakna kidika. “Lawanauh. Akaupak mahka mawanang.