Read Mayangna Jan 15 Bible Online

Jan 15 - Mayangna bible

Jan 15

¹“Yang kuduh wain panan rahm palni kidika, dawak Papangki kuduh dahwa kidika.

²Yang tingki rahni balna kidika wain minik yakwas karang kat, dakwi; kaunah wain minik yakwa kat, tingni rahni balna kau di laihna balna kidika bitik tukwi yakwi, kaput laih minik kidika manas laihna atnin yulni.

³Manna laih uman klin mana yul balna manayulnayang kidika karak.

⁴Yang karak aslah awanauh, yang manna karak aslahyang kapat. Tingni rahni as kidika sip minikyakwaski witing silp, panan nuhni karak aslah awaskat; sihm kaput bik laih, manna sip minik yaktasmana, yang karak aslah awasmana kat.

⁵“Yang kuduh wain panan nuhni, dawak manna laih tingni rahnimanah. Wais kat yang karak aslah kidika, dawak yang witing karak aslahyang kidika, minik mahni kalahwi; yang karak awasmana kat manna di as yamtasmana.

⁶Wais kat yangkarak aslah awaskat, ahni yakat ruhmna karang dawak buhlawarang, pan tingni balna buhlalana kat uduhwi kuhkau buswa kapat bubusna karang.

⁷“Manna yang karak aslah awanama kat, dawak bik sumalnayang balna kidika kat barangni yamtanama kat, ais dukih manawa kidika yultanauh, manana karang.

⁸Yang Papangki laih risnipik kidika duwi manna minik manas yaktamana mani kat dawak kaput karak rahm palni yang disaikipil balna kaltamana.

⁹Yang manna yakat dalani manatalayang, Papangki dalani yatalwa kapat; yang dalani manatalayang yakat ban awanauh.

¹⁰Yang laki balna yakat daka yamtanama kat, yang dalani talayang yakat awanama, yang Papangki lani balna yakat dakik yamtayang, dawak witing dalani talwa yakat banyang kaput.

¹¹“Kaput manayultayang yang karak alasna atnamna yulni, dawak alasna alahwamana kidika bitik palni atnin.

¹²Yang laki balna laih adika ki: Biri biri dalani katalnin, manna yakat dalani manatalayang kapat.

¹³Dalani talnin tanit nuhni kidika laih, sangnika kalanin kaltalyang yamni balna kidika yulnina.

¹⁴Manna laih yang karak kaltalyang yamni mana, yang yamnin yultayang kidika yamtanama kat.

¹⁵Muih dini yamyang balna manatisyang, kat muih dini yamyang kidika laih amanglawas ki, daniwan di yamwa kidika. Manayultayang kaltalyang yamni mayang, kat Papangki yayulna balna kidika bitik namangnakanayang bahang.

¹⁶Manna lawa yawalta yaktasmana, kaunah yang lawik manawaltik yaknayang, dawak manapaknayang yawa minik manas yaknin, dawak kidika minik balna kidika ban atnin. Kaput laih Papang yaklauwi manawarang, yang ayangki kau yakta yultanama kat.

¹⁷Adika kuduh yamnin manayulna kidika: Biri biri dalani kaltalnauh.

¹⁸“Sau muihni kidika manna yakat dutni manatalwa, amanglatanauh tatuna yang akat dutni yatatalwi.

¹⁹Manna kidika sau akaupakmana katlaih, sau muihni balna adika dalani manatatalwitdai, witingna balna aslah dalani kaldakakawa kapat. Kaunah yang lawik sau muihni balna paskaupak manawaltik yaknayang, kidika bahang sau muihni balna dutni manatatalwi, kat uman sau kaupak awasmana bahang.

²⁰Ismangna kattanama manayultayang adika: ‘Dini yamyang kidika kauh nuhni awaski, daniwan karak dawakat.’ Yang akat yauhuina kat, manna yakat bik manauhuiwarang; yang yulki yakat daka yamtamana kat, manna yulmana kidika bik dakawi yayamna karang.

²¹Kidika bitik laih yang yulki kaput kalahwarang, kat yasihna muihni kidika amangnilalawas bahang.

²²“Witingna pāt as bik diskarang, yang aiwik yuldibautasyang dai katlaih. Kaunah waralaih witingna dutnina kidika dawak disnin sip awaski;

²³yang akat dutni yakukulwa kidika, Papangki yakat bik dutni tatalwi.

²⁴Witingna pāt as bik diskarang, witingna pasyakat, muih ūk yamwas kidika yamnayang kidika; kaunah adika dini balna uman tatalna, kaput kaunah, yang akat dutni yatatalwi, dawak Papangki yakat bik dutni tatalwi.

²⁵Adika kaput kalahwi, kat kaput kalahnin dai bahang yulni balna ulna kidika, witingna lānina yakat: ‘Pini kaupak dutni yatatalwi.’

²⁶“Kaunah Tanitdakyang kidika kaiwarang kat, yang lawik sihki kidika Papangki kaupak, rahm Spiritni kidika Papang kaupak kaiwi, bahang witing witkinis karang.

²⁷Manna bik yang witkinis awanama, kat tatuna kaupak yangkarakmana dai bahang.