Read Mayangna Jan 21 Bible Online

Jan 21 - Mayangna bible

Jan 21

¹Kidika usnit kat, Jisas watwi disainipil balna yakat lāih kalahna, Tiberias lakunni kungyakat. Aput kalahna dai:

²Aslah bangdai, Saiman Pita, Tomás, sūtki kalatwadai kidika, Natanael Galilea kau Caná tawanni kaupak dai kidika, Zebedeo walanibis balna, dawak Jisas disainipil balna ūk bu dai kidika.

³Saiman Pita kalyulna: —Dipamna yawayang. Witingna yaklauwi nangnitlalana: —Yangna bik man karak yawanaki. Uiwi kuring kau kawi uina, kaunah kidika puknita waspa dini as bik lalaihwas dai.

⁴Mahka payahlawak, Jisas waskung yakat lāih kalahna, kaunah disainipil balna kidika amanglalawasdai Jisas kidika.

⁵Jisas yaklauwi diyulwi dakana: —Walabis, ¿waspa dini dismanah? Witingna yaklauwi nangnitlalana: —Dikah.

⁶Jisas yaklauwi diyulna: —Waspa dini laihnin dini kidika tingmanapal niningyakat ruhm-atanauh, kaput laih laihtanama. Kaput yayamna, bahang witingna sip-awasdai laihwi dulaunin dini kidika kat waspa dini mahni palni kidika pasyakat kakanadai bahang.

⁷Kaput dawak, disaipil as Jisas yaklauwi dalani talwadai kidika yaklauwi Pita yakat kalyulna: —¡Kidika laih Dawan! Saiman Pita dakawak Dawan atwak, prakni balna kana kat wahdis sakdai bahang, dawak was yakat ruhmwi kana.

⁸Dawak disaipil ūk balna kidika laih kauhmak yakat uiwi kikilna kuring kau, waspa laihnin dini kidika waspa dini manah buhng kat murwi uina, kat waskung kaupak metro 100 manah kalahwi uinadai bahang.

⁹Sau yakat yaklalakwak, kuh biwi minit yakat waspa dini as ihilna tusdai, dawak plawar busna bik.

¹⁰Jisas yaklauwi diyulna: —Waspa dini wisam palni yaknamana kidika duaitanauh.

¹¹Saiman Pita kuring yakat kawi waspa dini laihnin dini kidika murwi kiuna, waspa dini nunuhni manah buhngdai kidika 153, mahni dai kaunah sip biswasdai.

¹²Jisas yaklauwi diyulna: —Aiwa mapiris dini kastanauh. Disaipil balna as bik kalyulwi dakakawasdai witing kidika waispa, kat amanglalana dai bahang witing kidika laih Dawan.

¹³Kidika usnit kat, Jisas witing plawar busna kidika dulauwi diana, dawak waspa dini kidika sihm kaput diana.

¹⁴Adika kat Jisas watbās disainipil balna yakat lāih kalahna, dauna kaupak yaklauna dai kidika kaupak.

¹⁵Dikaswi dahn dadawak, Jisas yaklauwi Saiman Pita yakat kalyulwi dakana: —Saiman, Jan walanibis, ¿dalani yatalamahn, adika balna karak tanit? Pita yaklauwi nangnitlana: —Agha, Dawan, man amanglataman dalani matalayang. Jisas yaklauwi kalyulna: —Sīpki balna maintalah.

¹⁶Watwi kalyulwi dakana: —Saiman, Jan walanibis, ¿dalani yatalamahn? Pita yaklauwi nangnitlana: —Agha, Dawan, man amanglataman dalani matalayang. Jisas kalyulna: —Sīpki balna maintalah.

¹⁷Watbās kalyulwi dakana: —Saiman, Jan walanibis, ¿dalani yatalamahn? Pita, kulnin bukna kat watbās kalyulwi dakawa bahang, dalani kaltalwapa, nangnitlana: —Dawan, man di bitik amanglataman: yang dalani matalayang. Jisas kalyulna: —Sīpki balna maintalah.

¹⁸Rahm mayultayang, wahmaman mani balna dai yakat, prakma awa angkat yawinin kidika yawaman dai; kaunah muihbarak kalma kat, tingma dulautang muih ūk prakma ma-ahawarang, yawakih mawas pāni yakat maduwi uiwarang.

¹⁹Kidika yulna Jisas, Pita amput dauwarang kidika tanka kalyulna, dawak witing dauwarang kidika munah Papang alasnina yaksihni yamwarang kidika. Kidika usnit kat kalyulna: —¡Uskit uitah!

²⁰Pita wiryaklawi talna, dangnit yakat disaipil as Jisas yaklauwi dalani talwadai kidika kaiwalikkat, masan dini kakasna mani yaihnit palni yakat sakkauna kalyulwi dakana dai kidika: “Dawan, ¿wais yaklauwi dutni yakat mahawarangyah?”

²¹Pita talwi, Jisas yakat kalyulwi dakana: —Dawan, witing yakat laih, ¿ais kalkalahwarangyah?

²²Jisas yaklauwi nangnitlana: —Dukih yawi, witing laih ban karang, yang aiwaki kat, ¿man kidika ais kultamahn? Uskit uitah.

²³Kidika yulni, witingna kalwirah balna pasyakat yuyulna dai, kidika disaipil laih dauwas karang ki. Kaunah Jisas yulwas dai dauwas karang ki. Yulna kidika laih: “Dukih yawi, witing ban atnin yang aiwaki kat, ¿man kidika ais kultamahn?”

²⁴Sihm kidika disainipil kuduh, adika witnis yulwa kidika, dawak bik ulna kidika. Dawak amangladi rahm yulwa kidika.

²⁵Jisas di ūk manas yamna; manas palni ki, kaunah bitik uhulwarang kat, sau bitik sip laihwas karang uba mahni wauhtaya manah.