Read Mayangna Jan 3 Bible Online

Jan 3 - Mayangna bible

Jan 3

¹Parisi as dai ayangni laih Nicodemo, Ju balna pasyakat muih nuhni as kalkulna dai.

²Adika muihni Jisas yakat pukta kiwi kaltalna, dawak aput kalyulna: —Maestro, amangladi Papang yaklauwi masihna yanasumalna atnam, kat muih as bik yamwaski man sain balna yamtaman kidika, Papang man karak awaskat.

³Jisas yaklauwi kalyulna: —Rahm mayultayang, angdika muihni watwi wisam[3] batahndawas kat, Papang kingni lani balna kidika sip talwas ki.

⁴Nicodemo yaklauwi nangnitlana: —¿Amput muih as muihbarak kalna kidika watwi batahndawarang yah? ¿Sip karang katpah watwi nanangni pasyakat kawi dawi watwi batahnin?

⁵Jisas yaklauwi nangnitlana: —Rahm mayultayang, angdika muihni watwi batahndawas kat, was karak dawak Spirit Holi karak, sip-awas karang, Papang kingni lani yakat kanin.

⁶Sau muihni papangni munah batahndawa kidika laih, muih, dawak Spirit kau batahndawa kidika laih spirit.[4]

⁷Mayultikda kidika laih di as amangladas dini kapat laih kulwinih: ‘Muih bitik laih watwi batahndanin ki.’

⁸Wing kidika wauhwi angkut wauhkih kalawa yakat, yulni dakaman kaunah, amanglatasman angkaupak kaiwapa, dawak bik angkat kiwapa. Sihm kaput ki Spirit kau batahndadawa kidika.

⁹Nicodemo watwi kalyulwi dakana: —¿Adika dini amput kaput atnin sipyah?

¹⁰Jisas yaklauwi nangnitlana: —¿Man, Israel pasyakat maestro man bik, adika dini amanglatasmahn?

¹¹Mayultayang, mayang di amanglada kidika yulbaudi, dawak mayang witnis mayang di talnamayang kidika, kaunah manna rahm kultasmana yulda balna kidika yakat.

¹²Adika sauni dini balna yulni manayulting rahm yakultasmana kat, ¿amput yakultanamayah makau kisang kidika yulni manayultingkat?

¹³“Muih as bik mayakat kilwaski, kaunah makau kisang kidika kaupak kaina kidika manah laih, yuldarangkat, muih Walanibis al.[5]

¹⁴Dawak Moses, witing kauhmak wanilang yakat bil wayani dulauna kaput bik laih, muih Walanibis al kidika dulauna karang,

¹⁵kaput laih wais kat kukulwarang balna bitik kidika sangka ban atnin kidika duduwarang.

¹⁶“Bahang Papang laih muih yakat dalani palni talna, bahang Walanibis al aslah kidika kalana, kidika balna witing yakat kukulwarang bitik kidika laih dauwas atnin, kaunah sangka ban atnin kidika dunin.

¹⁷Kat Papang laih Walanibis kidika sau akat sihwaski, muih balna kidika lanina yamwi dutni yakat ānin, kaunah nawatkauh laih witing munah laihwi yaknin kidika duna atnin.

¹⁸“Papang Walanibis yakat kulwa muihni kidika, dutni yakat kalwirlawaski ki, kaunah kalkulwas muihni kidika laih uman dutni yakat kalwirlana, Papang Walanbibis al aslah yakat kulwas kidika yulni.

¹⁹Kukulwas muihni balna kidika uman dutni yakat wirlana, kat dutni yayamwādai bahang, sau akat yaringni kaiwak puksani kidika wawalna, yaringni karak dawakat.

²⁰Di dutni yayamwa balna bitik kidika laih yaringni kidika dutni tatalwi, dawak yaihnit yakat uiwas ki, witingna ais yayamwa kidika lāih kalahnin awas yulni.

²¹Kaunah di rahm karak yalalahwa balna kidika laih yaringni yaihnit yakat aiwi, kaput laih witingna yayamwa kidika lāih talna atnin, kidika laih Papang kulnin lani.”

²²Adika usnit kat, Jisas witing disainipil balna karak uina Judea sauni yakat, kidika pāni yakat witingna karak kalpakwi ma as as muih was utuhwadai kidika.

²³Jan bik Enón yakat muih was utuhwa sakdai, Salim yaihnit yakat, kat kidika yakat laih was manas dai bahang, muih balna kidika yakat uiwak was utuhwi diyakwadai.

²⁴Adika kalahna dai, Jan kidika baisa silak yakat ahawas tanit yakat.

²⁵Kaunah Jan usnit uiyang balna kidika Ju muihni as karak kalbibilna dai, maisihni dis kalahnin kidika yulni,

²⁶dawak Jan yakat uiwi kalyuyulna: —Maestro, Jordán wasni nakaskau man karak sakdai kidika, dawak witing yulni yulnaman dai kidika, waralaih witing muih kau was utuhwi yakwi, dawak muih bitik usnit uhuiwi.

²⁷Jan yulna: —Muih as sip di as bik duwaski, Papang yaklauwi kalawas kat.

²⁸Manna palni yadakanamana, lāih palni yultingkat, yang laih Mesías awasyang, kaunah witing tanit yakat yasihna kidika as yang.

²⁹Marid alasnina pasyakat, al wahma kidika kuduh yal sirau yakat duwa kidika; dawak marid wahma kaltalyang yamni duwa kidika laih, yakat sakkauna, dawak yulbauwak dakawi alasna kalwi. Sihm kaput bik laih waradika yang alaskina laih bitik palni dutayang.

³⁰Witing kidika laih tanit nuhni kalnin ki, dawak yang laih parahkau lakwinik ki.

³¹“Makaupak kaiwa kidika laih di bitik minit yakat ki. Kaunah sau muihni kidika laih sau muihni, dawak sau dini balna kidika yulni yulbauwi. Kaunah makau kisang kidika kaupak kaiwa kidika laih, di bitik minit yakat ki,

³²dawak talna balna, dakana balna kidika yulni yulwi, kaunah muih as bik kidika yulni laihwi duwas ki.

³³Kaunah muih as kat laihwi duwarang kat, kidika karak yulwi Papang kidika di rahm yulwi;

³⁴Papang yaklauwi sihna kidika laih, Papang yulni kidika yulwi, kat Papang Spiritni kidika manas palni kalawa bahang.

³⁵Papangni kidika Walanibis yakat dalani talwi, bahang di bitik minit yakat parasni kidika kalana.

³⁶Wais kat Walanibis yakat kulwa kidika, sangka ban atnin kidika duwarang, kaunah angdika muihni kat Walanibis yakat kulwa kidika laih, kidika sangnika sip duwas karang, kaunah nawatkauh laih Papang wahni yamadahngni kidika duwarang.”