Read Mayangna Jan 4 Bible Online

Jan 4 - Mayangna bible

Jan 4

¹Parisi balna dakakana, Jisas kauh disaipil mahni duwi dawak bik muih mahni was utuhwi yakwi, Jan karak dawakat

²(di rahm kidika laih, Jisas muih was utuhwi yakwas dai, kaunah disainipil balna yayamwādai).

³Jisas kidika yulni dakawi, Judea kaupak kalahwi Galilea yakat nawatwi kiuna.

⁴Witing kiuna kidika laih Samaria munah bayakwi kiunin dai.

⁵Kaput laih Samaria sauni yakat tawan as pakdai ayangni laih Sicar,[6] kidika laih Jacob yaklauwi walanibis José yakat sau as kalana kidika yaihnit yakat dai.

⁶Kidika yakat Jacob pāni kuhrna kidika sakdai. Jisas, witing lapakwi kiuna kidika kalsuhdana bahang kidika pāni kuhrna yakat kiwi yalahna dai. Kidika laih matunak dai.

⁷Disainipil balna kidika laih tawan yakat uina dai, kasnin dini bakanna. Kidika yakat, Samaria yal as kiuna was yakna atnin pa kuhrna kidika kaupak, dawak Jisas yaklauwi kalyulna: —Was apis yatah.

⁸

⁹Kauna Ju balna kidika yamni awas dai,[7] Samaria muihni balna karak yulbabauwas bahang, yal kidika yaklauwi nangnitlana: —¿Amput man, Ju man kidika, yang akat was yayultamahn, yang laih Samaria yal yang adika?

¹⁰Jisas yaklauwi nangnitlana: —Papang yaklauwi di yuwa kidika amanglataman kat laih, dawak wais yaklauwi man yakat was mayulwa kidika, man lawa kalatitimdai witing yakat, dawak witing yaklauwi sangka wasni kidika mawitdai.

¹¹Yal kidika yaklauwi kalyulna: —Dawan, was yaknin dini diski, pāni kuhrna adika tuhni palni ki: ¿angkaupak sangka wasni kidika yāmayah?

¹²Yangna muihkinabarak Jacob adika pāni kuhrna yanana, witing palni adika wasni kaupak diwādai, walanibis balna dawak tingnilau balna bik didiwadai. ¿Witing karak dawak man kauh tanitman katpah?

¹³Jisas yaklauwi nangnitlana: —Muih bitik adika wasni didiwarang kidika laih watwi was dikih diawarang ki;

¹⁴kaunah yang lawik was kalaki kidika diwarang laih, watwi was dikih kalawas karang ki. Kat yang was kalaki kidika laih, witing muihni yakat wastuna as kapat buhrwarang, dawak ban sangka atnin kidika kalawarang.

¹⁵Yal kidika yaklauwi kalyulna: —Dawan, kidika wasni yatah, kaput laih wattik was dikih yawas karang, dawak bik wattik adika pāni akat aiwik was butnik awas.

¹⁶Jisas yaklauwi kalyulna: —Yawa alma kalyultang kaiwang, dawak man bik aiwah akat.

¹⁷Yal kidika yaklauwi nangnitlana: —Al disyang. Jisas yaklauwi kalyulna: —Yamni yultaman al disyang timan kidika;

¹⁸kat ahal singka dunaman, dawak waradika dutaman kidika bik man alma awaski. Man yultaman kidika laih rahm ki.

¹⁹Kidika dakwi, yal kidika yaklauwi kalyulna: —Dawan, yang talayang man laih prapit asman.

²⁰Yangna muihkina bararak balna, Samaria muihni balna, akat Papang kau ayangni nuhni yayamna, adika asangni akat,[8] kaunah manna Ju muihni balna manna kidika yultamana, Jerusalén pāni yakat ki, Papang kau ayangni nuhni yamnin kidika.

²¹Jisas yaklauwi nangnitlana: —Yultayang kidika rahm yakultah, yal, awarni kaiwi kawi, manna Dawan yakat ayangni nuhni yamtanama kidika, adika asangni akat aiwas dawak Jerusalén yakat bik yawas.

²²Manna amanglatasmana, wais yakat ayangni nuhni yamtamana kidika, laihwi yaknin kidika laih Ju balna munah kaiwi.

²³Kaunah awarni kaiwi kawi, dawak adika awarni palni kuduh, Papang yakat ayangni nuhni yayamwa kidika rahm palni yayamwarang ki, Papang Spiritni yaklau diyulwarang kidika kaput. Kat Papang laih dukih kalawi, muih balna kidika kaput yayamna atnin ayangni nuhni yayamwa kidika.

²⁴Papang laih Spirit, witing yakat ayangni nuhni yayamwa kidika laih rahm palni yamnin ki, Papang Spiritni kaput.

²⁵Yal kidika yaklauwi kalyulna: —Yang amanglatayang Mesías kaiwarang kidika (yuldarangkat Krais); dawak witing kaiwarang kat, kidika bitik lāih yanayulwarang bitik palni.

²⁶Jisas yaklauwi kalyulna: —Kidika kuduh yang, man karak yulbauwa kidika.

²⁷Kidika minitni yakat disaipil balna uiwi kakana, dawak witingna yamni kapat laih tatalwasdai, Jisas yal as karak yulbauwasak kidika. Kaunah witingna as bik kalyulwi dakakawas dai, yal kidika ais walwadaipa, kidika awas bik ais yulbabauna kidika.

²⁸Yal kidika, was butnin dini duwalik kidika dasakwi tawan yakat kiuna, muih balna yakat diyulna:

²⁹—Aiwa talnauh, muih al as ki, yang di yamnayang balna kidika bitik laih yayulna. ¿Kidika Mesías awasyah?

³⁰Kaput laih tawan kaupak kalahwi uina muih balna kidika Jisas sakyakat.

³¹Dawak disainipil balna laih kalni dinit yakat bukwi yuyulna: —Maestro, di apis kastah.

³²Kaunah witing yaklauwi diyulna: —Yang di kasnin as dutayang, kidika laih manna amanglatasmana.

³³Disainipil balna kidika as as kalyulwi dakakana: —¿Kasnin dini duaiwi kalalana kat awasyah?

³⁴Kaunah Jisas yaklauwi diyulna: —Yang kasnik kidika laih yasihna muihni kulnin lani yamnik, dawak warkni balna bitik yamtik dahn danik.

³⁵Manna yultamana: ‘Baisa waiku arungka ki di minik balna bahnin’; kaunah yang manayultayang, dahna balna yakat talnauh, uman minik balna pihna bahnin mani ki.

³⁶Di minik bahnin warkni yamwa kidika muihni laih minit duwi, dawak di minik balna uduhwa kidika laih sangka ban atnin kidika ki, dahwa muihni dawak bik minik bahwa muihni kidika balna albupak alasna duduwarang.

³⁷Yamni yuyulwi yul as yuyulwa kidika: ‘Muih buas dadahwi, dawak uk balna kidika laih minik babahwi.’

³⁸Dawak yang manna yakat manasihnayang minik bahna atnin, wark as bik manataihwasdai kidika, muih ūk balna wark yayamna, dawak manna kuduh dunamana witingna wark yayamna dai kidika.

³⁹Samaria kau kidika tawanni muihni balna kidika, Jisas yakat kalkukulna, yal yulna dai kidika kaput kalahna bahang: “Yayulna, yang di yamnayang balna bitik kidika.”

⁴⁰Kaput bahang, Samaria muihni balna kidika uiwi kawi, Jisas kalni dinit yakat bukwi kalyuyulna, kidika karak watna atnin. Kaput laih witing ma bu watna dai kidika yakat witingna karak,

⁴¹muih manas witing yakat rahm kalkukulna, witing yulwa kidika dakawi.

⁴²Dawak yal yakat kalyuyulna: —Waradika laih rahm kuldi, man yanayulnaman kidika manah laih awaski, kat yangna palni yulwak dakanayangna bahang, dawak amangladi, witing kidika kuduh muih Laihwi Yakyang.

⁴³Kidika ma bu bayakwak, Jisas Samaria kaupak kalahwi kiuna Galilea yakat.

⁴⁴Kat, witing yulna kaput, prapit as kidika witing sauni yakat laih risnipik kalalawaski.

⁴⁵Galilea yakat kiwi kāwak, kidika muihni balna yamni kalduduna, kat witingna bik Jerusalén yakat uina dai bahang insal kaiwi bayakna alasnina yakat, kaput laih Jisas di yamna balna kidika bitik tatalna dai.

⁴⁶Jisas nawatwi kaina Galilea sauni kau Caná tawanni yakat, kidika yakat kuduh was kau wain yamwadai kidika. Dawak king, kalbauyang muihni balna taninatuna as duwa dai, bahang kidika lani walanibis al as siknis duwasakdai Capernaum yakat.

⁴⁷Kalbauyang balna taninatuna kidika dakana Jisas kidika Judea kaupak Galilea yakat kiuna atwak, dawak kiwi kaltalwi, kalni dinit yakat bukwi kalyulna witing ūni yakat kiuna atnin, dawak walanibis siknis kidika kaupak dulauwi kalana atnin, bahang walanibis kidika laih daunin manah dai.

⁴⁸Jisas yaklauwi nangnitlana: —Manna kasak kultasmana, sain as bik talasmana kat.

⁴⁹Kaunah kalbauyang balna taninatuna kidika kalyulna: —Dawan, sirihni aiwah, walakibis al kidika dauwas tanitkauh.

⁵⁰Jisas yaklauwi kalyulna: —Ūma yakat nawatta yawah, man walamabis sangka ki. Kidika alni rahm kulna, Jisas kalyulna kidika, bahang mahka kiuna.

⁵¹Witing ūni yakat kiwak, dini yamyang balna kidika niningkauh uiwi kalyuyulna: —¡Walamabis sangka ki!

⁵²Witing yaklauwi diyulwi dakana, ais awarni kaupak walanibis al kidika yamni kaldakana daih, dawak nangnitlalana: —Damai mani maulahu awar as praisni yakat yamahni kidika kaldana dai.

⁵³Muih al bin papangni kidika kulwi talwak sihm kidika awarni Jisas kalyulna dai: “Man walamabis al kidika sangka ki”; witing dawak ūnipas kau walanibis balna bitik laih Jisas yakat kalkukulna dai.

⁵⁴Adika kat, Jisas sain bu yamna dai, Judea kaupak Galilea yakat kiuna yakat.