Read Mayangna Jan 5 Bible Online

Jan 5 - Mayangna bible

Jan 5

¹Ma buas bayakwak usnit kat, Ju balna alasna yayamna, dawak Jisas kidika Jerusalén yakat nawatwi kiuna.

²Jerusalén yakat, sīp balna dūrnina atwa yakat, was as pakki, hibru kau laih yuyulwi Betzata. Kidika laih dūrni singka duwi,

³kidika yakat siknis muihni balna manas bangdai, miniknapa dis, yamni lapapakwas, kalnina kusulana kidika balna laih sau yakat kalangna bangdai.[9]

⁴

⁵Kidika balna pasyakat muih al as siknis tusdai kurih 38 praisni.

⁶Jisas witing talna, kidika yakat kalangna tuskat, dawak bik amanglana kidika alni mamahni kidika yakat tusdai kidika, dawak kalyulwi dakana: —¿Man watta muihma yamni dukih mawih?

⁷Siknis muihni kidika nangnitlana: —Dawan, muih as bik diski was yakat yahanin, was kidika lumakwak. Awakuhtingkat, muih ūk balna kidika tatuna kakawi.

⁸Jisas yaklauwi kalyulna: —Lawah, payahtaman pāni kidika trukta yawah.

⁹Kidika minitni yakat muih al dai kidika muihni yamni kalahna, dawak kalangwa pāni kidika trukwi kiuna. Kidika mani laih urupnin mani[10] dai bahang,

¹⁰Ju balna yaklauwi kalyuyulwadai, sikninis kaupak yamni kalyamna muihni yakat: —Warmani laih urupnin mani; sip-awas ki alangwaman pāni kidika trukta yawanam.

¹¹Kidika alni yaklauwi diyulna: —Muihki yamni yayamna muihni kidika yaklauwi yayulna: ‘Alangwaman pāni trukta yawah.’

¹²Dawak witingna yaklauwi kalyulwi dakakana: —¿Wais yaklauwi mayulnayah: ‘Pama trukta yawah’?

¹³Kaunah al kidika amanglawasdai wais yaklauwi muihni yamni kalyamnapa, dawak Jisas muih mahni bangkidika pasyakat kawi disna dai.

¹⁴Kidika usnitkat Jisas witing kalpakna dai kidika alni karak, makatyulnin ūni yakat, dawak kalyulna: —Talah, waradika laih yamni kalnaman bahang, watwi dutni yamwinih, baisa di dutni kidika makalahnin awas yulni.

¹⁵Kidika alni dai kidik kiwi Ju balna yakat diyulna, Jisas yaklauwi witing muihni kidika yamni kalyamna.

¹⁶Kidika yulni, Ju balna kidika Jisas yakat laihwi wawalna, kat yakurupdinin mani kat kidika dini balna yamwa bahang.

¹⁷Kaunah Jisas yaklauwi diyulna: —Yang Papangki laih ban wark kalahna, kidika bahang yang bik wark alahwayang.

¹⁸Kidika bahang, Ju balna yaklauwi baisa īnin kukulna, kat urupnin mani kidika manah kulwas laih awasdai, kaunah witing kidika laih Papang kapat kaldakawadai kidika bahang, kat witing yulwadai kidika: “Papang kidika laih yang palni Papangki.”

¹⁹Jisas yaklauwi diyulna: “Yang manayultayang, Papang Walanibis al kidika witing alas sip di balna kidika yamwas ki; Papangni yamwa kidika yakat talwi yamwi witing bik. Papangni yamwa bitik kidika, Walanibis bik yamwi.

²⁰Kat Papangni kidika Walanibis al yakat dalani talwi, bahang ais yamwa balna kidika bitik niningkawi; di tanit nuhni bik niningkawarang ki, manna namangna yakat di taldas dini talnama.

²¹Kat sihm kaput bik Papangni kidika muih dauna kaupak dulauwi sangninaka diawakat, Walanibis al bik sangninaka diawi wais yakat kalanin kulwa kidika.

²²Dawak Papangni kidika muih as bik lanina laihwi yamwas ki, kaunah Walanibis al yakat parasni kidika kalana, muih lanina yamnin,

²³kaput laih muih bitik Walanibis al yakat risnipik kalanin, sihm Papangni kau kalalawa kapat. Wais kat Walanibis al sihna yakat rispik kalawas kidika, Papangni yakat bik risnipik kalawas ki.

²⁴“Rahm manayultayang, wais kat yang yultayang balna yakat tapayuwi dakawi rahm kulwakat yasihna muihni yakat, sangka ban atnin kidika duwarang; kaput laih daunin yakat wirlawaskarang, kidika laih daunin kaupak bayakna sangka atnin yakat.

²⁵Rahm manayultayang awarni kaiwi, bahang kidika laih waradika ki, dadauna balna kidika Walanibis al yulwa kidika dakakawarang; dawak dakakawarang balna kidika, sangka karang.

²⁶Kaput bik Papangni witing silp sangnika duwa kidika, sihm kaput kalyamna Walanibis al yakat bik silp sangnika duna atnin,

²⁷dawak bik parasni kalana muih lanina yamna atnin, kat witing laih muih Walanibis al bahang.

²⁸Adika manna di wisam as kapat laih dakakawinih, kat awarni kaiwi kawarang ki, dauna muihni balna bik witing dinit yulwa kidika dakakawarang ki

²⁹dawak sau-ū kaupak kalalahwarang. Yamni yayamna balna kidika laih, dauna kaupak yaklalauna karang, sangka ban atnin yakat, kaunah dutni yayamna balna kidika laih, dauna kaupak yaklalauwarang kaunah daunin yakat diwirlana karang.

³⁰“Yang alas sip di yamtasyang. Muih lani yamtayang Papang yaklauwi yapakwa kidika kat, kidika bahang yang la yamtayang kidika laih barangni ki, yang kulnik lani yamtasyang kaunah Papang kulnin lani kidika yamtayang, witing yaklauwi yasihna kidika.

³¹Yang alas witkinis yulki kat, yang witnis yultayang kidika laih parasni dis karang.

³²Kaunah ūk ki yang witkinis yulwa kidika, bahang kidika witnis yulwa kidika laih rahmki.

³³Manna muih sihtanangkat Jan yakat kalyulwi dakakana, dawak witing witnis yulna kidika laih di rahm kidika witninis yulna.

³⁴Kaunah yang laih muih al as bik witkinis yulwas ki. Yang kidika yultayang manna laihwi yaknin kidika dunamna yulni.

³⁵Jan laih awas as dahlwi yaringni yamwa kapatdai, dawak manna kidika yaringni alasnina dunaman ma balna parahni.

³⁶Kaunah yang nikingyakat witnis yulwa tanit yamni as dutayang, Jan witnis yulwa kidika karak dawakat. Yang yamtayang kidika laih, Papang yaklauwi yamnin yapakna kidika yamtayang, laihwi talna ki kidika laih rahm Papang yaklauwi yasihna.

³⁷Dawak bik Papang yasihna kidika, yang witkinis yulwi, manna dinit yulwa kidika dakasmana, dawak talasmana kaunah,

³⁸dawak datanangkat witing yulni balna kidika manna yakat watwas ki, kat Papang sihna yakat kultasmana bahang.

³⁹Manna laih Ulna balna kidika yamni laihta tala lan alahwamana, kidika yakat sangka ban atnin kidika waltamana bahang; kaput kaunah, Ulna balna kidika yang witkinis yuyulwa kaunah,

⁴⁰manna yang akat aiwinin kultasmana, kidika sangnika dunin.

⁴¹“Yang dutasyang alasna yaksihni muih kaupak kaiwa kidika.

⁴²Baisa kidika minityakat, manna amangmanalatayang, dawak amanglatayang, Papang dalani kidika dismana.

⁴³Yang laih Papangki ayangni kau aiwanayang, bahang manna kidika kultasmana; kaput kaunah, ūk kat witing alas ayangni kau kaiwarang laih, kidika yakat rahm kalkultanama.

⁴⁴¿Manna amput kultanamayah, manna silp biri biri alasmana yaksihni yakat kultamana kidika, alasna yaksihni Papang kaupak kaiwa yakat waltasmana kidika?

⁴⁵Manna kukulwinih, yang Papangki yakat yulmana yakki; manna yulmana yulwa kidika laih Moses, manna witing yakat kasak kultamana kidika.

⁴⁶Kaunah manna Moses yakat kultamana katlaih, yang akat bik yakultanama, kat Moses ulna kidika yang yulki balna kidika ulna.

⁴⁷Kaunah manna kultasmana kat witing ulna balna kidika, ¿manna amput kultanamayah yang manayulki kidika?”