Read Mayangna Jan 6 Bible Online

Jan 6 - Mayangna bible

Jan 6

¹Adika usnit kat, Jisas witing kiuna Galilea lakunni nakas yakat, kidika laih sihm ki Tiberias lakunni kidika.

²Muih manas usnit uiwi uina, kat sain manas yamwak tatalna kidika, muih siknis balna kaupak dulauna, bahang kidika yulni usnit uiwi uina dai.

³Jisas asang as kau kilwi kiuna, dawi disainipil balna karak yalalahna.

⁴Insal kaiwi bayakna mani kidika ulis danadai, Ju balna alasna yayamwa kidika.

⁵Jisas witing talwak muih manas usnit uiwi uiwak, dawak Pilip yakat kalyulna: —¿Angkaupak di kasnin bakandarangyah adika muihni balna bitik bayahnin?

⁶Pilip ais yulwak dakanin manah kalyulwi dakana, kat Jisas witing yamni amanglawadai ais amput yamnin kidika.

⁷Pilip yaklauwi nangnitlana: —Ma andat bu wark kalahna minit kidika kau kasnin dini kidika bakandarang bik sip dilawas karang ki.

⁸Kaput laih Andru, disaipil ūk dai kidika Saiman Pita wirahni, witing kalyulna:

⁹—Akat muihbin as duwalikki plawar busna singka, dawak waspa dini bu, kaunah, ¿aisyah, adika dini muih mahni niningyakat?

¹⁰Jisas yaklauwi yulna: —Diyultanang kat muih bitik yalalahwang. Kidika pāni yakat sihrsihr yamni pakdai, dawak yalalahna. Muih balna kidika tausin singka praisni dai.

¹¹Jisas, witing plawar busna balna kidika duwi Papang kau minityulwi tingkih yulwi dawi, muih yalahna balna bangkidika bitik yakat diana. Waspa dini balna kidika bik sihm kaput yamna, witingna kaskih diawa kidika balna bitik yakat diana.

¹²Kaswi aitani dibahngna kat, Jisas witing disainipil balna yakat diyulna: —Sutni bayakna balna kidika uduhtanauh, as bik dauh pini disnin awaski.

¹³Witingna ududuhna, dawak uslun kapatnah kau pupuna 12, plawar busna singka dai kidika kaupak.

¹⁴Jisas adika sainni yamwak muih balna talwi yuyulna: —Rahm palni ki prapit as kaiwarang dai kidika kuduh witing.

¹⁵Kaunah Jisas witing amanglana, witingna parasni kau laihwi duwi uiwi king ānin yayamwa kidika, bahang, witing baisa asang mayakat kilwi kiuna disainipil balna karak.

¹⁶Puklakwakat, Jisas disainipil balna dai kidika lakun yakat yaklakwi uina,

¹⁷kuring as kau kawi lakun kidika dakyaklalana Capernaum yakat kiunin. Puksani palni dai, dawak Jisas kidika baisa nawatwi kaiwasdai.

¹⁸Kidika dakyaklalawakat, wing parasni wauhwak was kidika lalamna.

¹⁹Kilómetro singka, kidika awaskat tiaskauas uman kalahwi uina dai, dawak witingna tatalwak Jisas kidika lapakwi kiuna was minit munah, kuring yakat, dawak yamaduduna.

²⁰Witing yaklauwi diyulna: —¡Yang, yamaduduwinih!

²¹Dawak witingna kuring yakat ahana, dawak sirihni kat uiwi kikilna angkat uiwa yakat.

²²Kidika kaupak payahwak, muih balna lakun nakas yakat bangdai kidika witingna amanglalana, Jisas disainipil balna kidika kuring aslah witdai kidika kau uina dai kidika, dawak Jisas kidika laih witingna karak kiwasdai kidika witingna karak.

²³Dawak, kuring ūk balna kidika laih uina dai Tiberias tawanni nuhni kaupak, Dawan yaklauwi plawar busna kidika blisyamwak kakasna kidika pāni yaihnit yakat.

²⁴Kaput bahang witingna tatalwak Jisas dawak disainipil balna kidika bik disdai kidika pāni yakat, dawak muih balna kidika kuring yakat kawi Capernaum yakat uina, walwi.

²⁵Witingna lakun nakas yakat uiwak, Jisas kalpapakna dawak kalyulwi dakakana: —Maestro, ¿mampat akat aiwanamahn?

²⁶Jisas yaklauwi diyulna: —Di rahm kidika laih, manna yawaltamana, di kastanang manabuhngdana bahang, kaunah sain kidika amanglanamana yulni laih awas ki.

²⁷Manna wark kalalahwinih kasnin dini dahnkalahwa kidika yulni, kaunah kasnin dini as dahnkalwas dawak sangka ban atnin mayawa kidika yulni wark yamtanauh. Kidika kasnin kuduh muih Walanibis al kidika yaklauwi manawarang kidika, kat Papang tampni kidika laih Walanibis al yakat kalana bahang.

²⁸Kalyulwi dakakana: —¿Ais yamniknayah, Papang warkni yamtiningkat talkih kalawa kidika?

²⁹Jisas yaklauwi nangnitnalana: —Papang dukih kalawa kidika, mayang yamna atnin, kidika laih, witing sihna muihni yakat kalkulnin.

³⁰Dawak kalyulwi dakakana: —¿Ais sainni sipyah nikingnakanam, kidika talik man yakat kasak makulnikna? ¿Man warkma balna kidika angdikayah?

³¹Yangna muihkinabararak balna maná kakasna kauhmak wanilang yakat, Wauhtaya yakat ulna kaput: ‘Makau kisang kidika kasnin kaupak diawak kakasna.’

³²Jisas yaklauwi nangnitnalana: —Yang rahm manayultayang, Moses yaklauwi makau kisang kidika kasnin kaupak manawasdai, kaunah yang Papangki kuduh yaklauwi makau kisang kasnin rahm palni yuwa kidika.

³³Kat kasnin dini Papang yaklauwi yuwa kidika laih, makau kisang kaupak kaiwi yaklakna kidika, dawak muih balna yakat sangninaka diawa kidika.

³⁴Witingna yaklauwi yuyulna duna atnin: —Dawan, kidika kasnin yanatah.

³⁵Dawak Jisas yaklauwi diyulna: —Yang kuduh kasnin dini kidika, dawak sangnika ban kalawa kidika. Wais yang akat kaiwa kidika yuh kalawas karang; dawak wais yang akat kulwa kidika, dikih bik kalawas karang.

³⁶Kaunah uman manayulnayang kaput, manna rahm kultasmana yatalnamana bik.

³⁷Papangki yawa bitik kidika, yang akat aiwi; dawak yang akat aiwa kidika, ahni yakat datas awaki.

³⁸Kat yang makau kisang kaupak aiwik lakwanayang kidika laih, yang kulnin lani yamna aiwasyang, kaunah Papangki kulnin lani yamna aiwanayang, witing yasihna kidika.

³⁹Dawak yasihna kulnin lani kidika laih, witing yana kidika as bik disnin awaski, kaunah mani witni yakat dauna kaupak dulauna atnin.

⁴⁰Kat Papangki kulnin lani kidika, Papang Walanibis al yakat tatalwa bitik kidika, witing yakat kulnin, dawak sangka ban atnin kidika dunin; dawak yang lawik mani witni yakat dauna kaupak dulauki.

⁴¹Kidika bahang Ju balna kidika Jisas niningyakat yuyulna, kat yulna bahang: “Yang kuduh kasnin dini as makau kisang kaupak kaina kidika.”

⁴²Dawak kalyuyulna: —¿Adika awasyah Jisas, José walanibis? Mayang amangladi papangni dawak nanangni bik. ¿Kaunah amput yulwi witing kidika makau kisang kidika kaupak kaina?

⁴³Jisas yaklauwi diyulna: —Manna ap yultamana kidika datanauh.

⁴⁴Muih as bik sip yang akat kaiwas ki, Papang yaklauwi duaiwas kat, yasihna muihni kidika; dawak yang dulauki dauna kaupak mani witni yakat.

⁴⁵Prapit balna uhulna yakat yulwi: ‘Papang yaklauwi muih bitik yakat sumalna karang.’ Kaput bahang muih bitik Papang yakat dakakawarang kidika, lan kakalwarang kidika witing kaupak, yang akat aiwarang ki.

⁴⁶“Muih as Papang yakat talna laih awaski; talna muihni kidika laih Papang kaupak kaiwi.

⁴⁷Rahm manayultayang wais kasak kulwakidika laih, sangka ban atnin duwi.

⁴⁸Yang kuduh kasnin dini as sangnika kalawa kidika.

⁴⁹Manna muihmanabararak balna maná kakasna kauhmak wanilang yakat, kaunah witingna dadauna;

⁵⁰kaunah yang manayultayang, kasnin dini as makau kisang kaupak kaina kidika; wais kat kidika kaupak kaswarang kat, dauwas karang.

⁵¹Yang kuduh kasnin dini as makau kisang kidika kaupak kaina kidika; wais kat adika kaupak kaswarang kat, sang ban kaput karang. Kasnin dini yang kalaki kidika kuduh yang muihki. Muih balna bitik sangninaka yulni diana awaki ki.

⁵²Ju balna biri biri yuyulna: —¿Amput sipyah witing muihni palni kidika mayawak kasnin?

⁵³Jisas yaklauwi diyulna: —Rahm manayultayang, muih Walanibis al muihni kidika kastasmana kat, dawak āni bik ditasmana kat, sangmanaka dutasmana.

⁵⁴Wais kat muihki kaswi, āki diwi, witing sangka ban atnin duwi; dawak mani witni yakat yang dulauna awaki dauna kaupak.

⁵⁵Kat yang muihki kidika laih kasnin dini rahmpalni ki, dawak āki kidika bik dini rahm palni ki.

⁵⁶Wais kat yang muihki kaswi, āki diwi, kidika laih yang karak aslah ki, dawak yang bik witing karak aslahyang.

⁵⁷Papang, yasihna kidika laih witing sangnika duwi, bahang yang sangkayang witing munah, sihm kaput bik laih, yang kaupak di kaswa kidika, yang munah sangka karang.

⁵⁸Kasnin dini as makau kisang kaupak kaina kidika yultayang. Dawak adika kasnin laih sihm awaski, manna muihmana bararak balna maná kakasna kidika kauhmak wanilang kau, witingna kakasna dai kaunah dadauna; kaunah wais kat adika kasnin dini kaswarang kat sangka ban karang ki.

⁵⁹Jisas adika sumalna, Capernaum kau sumamalwa ūni yakat.

⁶⁰Kidika sumalwak dakawi, Jisas usnit uiyang balna manas yuyulna: —Adika yulwa kidika laih dadasni mayang yamnin; ¿wais sipyah adika yulni dakawi yamnin?

⁶¹Tani yuyulwa kidika Jisas dakawi diyulwi dakana: —¿Adika yulni dutni dakamanah?

⁶²¿Ais kalahwarang, talanangkat muih Walanibis al kidika kilkiwarang kat muhnilau sakdai yakat?

⁶³Spirit kidika yaklauwi sangnika kalawi; muihni nuhni kidika laih dauh ki. Yang di balna manayultikda kidika laih spirit dawak bik sangnika.

⁶⁴Kaunah manna pasyakat buas kukulwas ki. Kat Jisas laih uman amanglana dai tatuna kaupak wais balna kidika kukulwas karang kidika, dawak wais balna daunin tingni yakat ahawarang kidika.

⁶⁵Dawak baisa minit yakat lakwi yulna: —Yang akat muih as bik kainin sip-awas ki atnayang kidika laih Papang yaklauwi kalawas karang kat.

⁶⁶Kidika kaupak, muih manas Jisas usnit uhuiwa balna kidika usnit uiwas dadana dai.

⁶⁷Dawak Jisas yaklauwi disainipil 12 yakat diyulwi dakana: —¿Manna bik mahka yawakih manawih?

⁶⁸Saiman Pita yaklauwi nangnitlana: —Dawan, ¿wais yakat sipyah yawinikna? Yulma balna kidika laih sangka ban atnin yulni.

⁶⁹Yangna laih uman kulnayangna, yangna amanglatayangna, man laih Papang holi kidika man.

⁷⁰Jisas yaklauwi nangnitnalana: —¿Yang lawik manayaknayang awasyah manna 12 mana kidika? Kaput kaunah manna pasyakat as kidika laih muih alasni yulyang ki.

⁷¹Kidika Jisas yulna kidika laih Judas yakat kalyulna, Saiman Iscariote walanibis kidika, kat Judas yaklauwi dutni yakat āwarang bahang, disaipil 12 kidika paskaupak kaunah.