Read Mayangna Jan 7 Bible Online

Jan 7 - Mayangna bible

Jan 7

¹Adika usnit kat, Jisas witing Galilea sauni yakat kiuna dai. Judea yakat sak atnin kidika dukih kalawasdai, kidika yakat Ju balna yaklauwi kalwawalwādai īna atnin.

²Kauna ū lababanni alasnina yayamwa kidika ulisna bahang, Ju balna alasna yayamwa mani kidika,

³wirahni ahal balna kidika kalyuyulna: —Akat watwinih; Judea yakat yawah, kaput laih man usmat uhuiwa balna kidika tatalwarang man ais yamtaman kidika.

⁴Muih as kat kaltalyang kalahnin kulwa kidika, di kidika malni yakat yamwaski. Adika di balna yamtaman kat, muih balna bitik muhnina yakat yamtah.

⁵Dawak witing wirahni ahal balna palni bik rahm kalkukulwasdai.

⁶Jisas yaklauwi diyulna: —Baisa awarki kaiwi kawas ki, kaunah manna namangna yakat laih angdika awar karang bik yamni ki.

⁷Sau muihni balna kidika laih manna yakat sip dutni manakukulwas karang, kaunah yang akat laih dutni yatatalwi, kat yang lawik lāih niningnakatayang bahang, witingna yayamwa kidika dutni kidik.

⁸Manna kidika alasnina yakat yawanauh; yang laih yawasyang,[11] kat baisa awarki kidika kaiwi kawas bahang.

⁹Adika diyulwi dawi, witing laih Galilea yakat watna dai.

¹⁰Kaunah witing wirahni ahal balna kidika uidadawak, Jisas bik kidika alasnina yakat kiuna dai, kaunah lāih kiwasdai muih muhnina yakat, yakmaldi kiuna.

¹¹Ju balna kalwawalna kidika alasnina yakat, dawak yuyulwadai: —¿Kidika alni angkat laih sakyah?

¹²Muih balna pasyakat witing yulni manas palni laih yuyulna dai. Buas yuyulna: “Witing laih muih al as yamni ki”; dawak ūk balna kidika yuyulna: “Yamni laih awaski, muih balna yakat alas diyulwi.”

¹³Kaput kaunah, muih as bik laih witing yulni kidika lāih yuyulwasdai, Ju balna yamaniduduwa kidika yulni.

¹⁴Alasna kidika papus dawakat, Jisas laih makatyulnin ūni yakat kawi sumalna dai muih balna yakat.

¹⁵Ju balna kidika laih yamni talwi aput yuyulna: —¿Amput witing di manas amanglawih, skul kawas bik?

¹⁶Jisas yaklauwi nangnitnalana: —Yasumalna kidik laih yang diki awaski, kaunah yasihna muihni kidika dini.

¹⁷Muih as kat Papang kulnin lani yamkih kalawak, sip ki amanglanin sumaltayang kidika Papang kaupak kaiwapa kidika awaskat, yang alas kulnik lani yultayang pa.

¹⁸Wais kat silp kulnin kaupak yakwi yulwa kidika laih, witing alas alasnina yaksihni kidika walwi; kaunah wais kat kalsihna kidika alasnina yaksihni walwa kidika laih, kidika muihni rahm yulwi, dawak witing yakat la kat awas kidika laih diski.

¹⁹“¿Rahm awasyah, manna yakat Moses yaklauwi lā manana kidika? Kaput kaunah, manna kaupak as bik lāni yakat yamtasmana. ¿Ais yulni yaīnin kultamanah?”

²⁰Muih balna yaklauwi nangnitlalana: —¡Sitan malaihna! ¿Wais maīnin yamwih?

²¹Jisas yaklauwi diyulna: —Manna bitik, yakurupdinin mani di as yamnayang kidika, di taldas dini kapat talamana.

²²Kaput kaunah, Moses yaklauwi Papang sainni kidika yamnin manapakna (kaunah kidika laih Moses kaupak kaiwas ki, kaunah manna mamuihkibararak balna kaupak kaiwi), dawak manna muih as kau Papang sainni kalatamana urupdinin mani[12] karang bik.

²³Moses lani yakat tala yamtas data, urupdinin mani karang bik muih al bin kidika Papang sainni kalatamana, ¿kaput kat ais yulni manna kulnamna daukaltamanah yang karak, yang urupnin mani kat muih muihni nuhni sikninis kaupak dulaunayang kidika yulni?

²⁴Manna muih muhni yakat tala lani yayamwinih. Muih lani laihta yamtamana kat, lani kidika barangni yamtanauh.

²⁵Jerusalén yakat yalalahwa muihni balna as as kidika yaklauwi kalyulwi dakakana: —¿Adika awasyah īnin walwabangdai kidika?

²⁶Yakat sakki, muih balna yakat yuldibauwi, muih as bik di as kalyulwas ki. ¿Lā muihni balna kidika kukulwakatpah, kidika alni laih Mesías?

²⁷Kaunah mayang amangladi angkaupak kidika; kaunah, Mesías kaiwarangkat muih as bik amanglawas karang ki angkaupak kaiwarang kidika.

²⁸Jisas, kidika dakwi, witing makatyulnin ūni yakat sumalwa sakkauna, yulna yulni parasni karak: —¡Kaput bahang manna amangkilatamanah angkaupak aiwayang kidika! Kaunah yang alas kulnik lani aiwasyang, kaunah as ki witing kidika yakat laih rahm palni kalkulnin ki, bahang witing kuduh yasihna kidika, manna laih amangnilatas mana.

²⁹Yang laih amangnilatayang, kat witing kaupak aiwayang bahang, dawak witing yaklauwi yasihna kidika.

³⁰Witingna laihwi balaknin kukulna kaunah, witingna as bik tingnina dulalauwas dai, kat awarni kidika kai'kawas bahang.

³¹Muih manas witing yakat kukulna, dawak yuyulwadai: —Mesías kaiwarang kat, ¿sain balna kau tanit yamwarang katpah, adika alni yamwa karak dawakat?

³²Parisi balna dakakana, muih balna yuyulwa kidika Jisas yulni; witingna dawak sumalyang balna taninatuna karak kalpakwi sisihna, kalbauyang balna makat yulnin ūni maintatalwa muihni balna kidika, Jisas yakat laihwi sitna atnin.

³³Dawak Jisas yaklauwi yulna: —Manna karak ma parahni sak awaki ki, dawak nawattik yawaki ki, yasihna muihni yakat.

³⁴Manna yawaltanama, kaunah yayaktas awanama, kat yang sak awaki yakat manna sip yawas awanama bahang.

³⁵Kaput laih Ju balna biri biri yulwi dakakana: —¿Witing angkat kiwarangyah, mayang sip yakdas mawarang kidika? ¿Ju balna pa ūk kau pini ruhna balna yakat kiwarang katpah, dawak Papang kulwas balna yakat bik sumalna atnin?

³⁶¿Ais yulkuhti yulwih ‘Yawawalwarang, kaunah yāyayakwas karang, kat angkat sak awaki yakat yawanamna sip-awas bahang’?

³⁷Kidika alasnina ma witni palni kidika kauh tanit nuhni kulna dai. Kidika mani Jisas yaklauwi, yulni parasni yulwi yulna: —Wais kat dikih kalawakat, yang akat kaiwi diwang.

³⁸Ulna yakat yulwa kaput, kidika muihni pasyakat was sangka kirarang.

³⁹Adika laih Jisas aput yulnin kulwi yulna, wais witing yakat kulwarang kat Spirit duwarang ki; kat Spirit kidika baisa disdai bahang, dawak bik Jisas yakat baisa alasnina yaksihni kidika yamwasdai bahang.

⁴⁰Muih balna pasyakat muih as as adika yulni dakawi yuyulna: —Rahm palni laih adika lani laih prapit.

⁴¹Ūk balna laih yuyulna: —Adika laih Mesías. Kaunah ūk balna kidika yuyulna: —Dikah, Mesías laih sip Galilea kaupak kaiwas karang.

⁴²Ulna yakat yulwi, Mesías laih king Devid sulani kaupak kaiwarang ki, dawak Belén kaupak kaiwarang ki, Devid tawanni dai kidika kaupak.

⁴³Kaput laih muih balna kidika Jisas yulni kalwayahwi kalalahna.

⁴⁴Buas laih silak ānin kukulna, kaunah muih as bik yamwasdai.

⁴⁵Makatyulnin ūni maintalyang balna dai kidika nawatwi uina parisi balna bangdai yakat, dawak sumalyang balna taninatuna balna yakat bik, dawak diyulwi dakakana: —¿Ais yamta duaitasmana daih?

⁴⁶Kalbauyang muihni makatyulnin ūni maintalyang balna yuyulna: —¡Muih al as bik witing yulbauwa kapat yulwas ki!

⁴⁷Kaput laih parisi balna yaklauwi diyuyulna: —¿Manna bik datanangkat alas manayulnayah?

⁴⁸¿Mayang matakituna balna as as witing yakat rahm kalkukulwa katpah, kidika awaskat parisi balna bik kukulwih?

⁴⁹Kaunah adika muihni balna lā amanglalawas kidika laih, witingna dutni palni ki.

⁵⁰Nicodemo, parisi as, witing ma as kat kiwi kaltalna dai kidika Jisas yakat, witing diyulna:

⁵¹—Mayang malaki yakat, sip daunin yakat wirladaski muih al as, witing kaupak yul as bik dakadas, dawak bik ais yamna kidika balna bik.

⁵²Witingna yaklauwi nangnitlalana: —¿Man bik Galilea kaupak mahn? Ulna balna kidika lan alahwa talah, Galilea kidika wat as bik kidika kaupak prapit as bik kalahwas ki.

⁵³[Witingna mahka ūnina kau uiyamna.