Read Mayangna Jan 8 Bible Online

Jan 8 - Mayangna bible

Jan 8

¹Jisas laih witing Olib asangni yakat kilwi kiuna,

²dawak ma payahlawak, baisa puksani kau makatyulnin ūni yakat kiuna. Muih balna kidika witing yaihnit yakat uina, dawak witing yalahwi disumalna.

³Lā sumamalwa muihni balna, parisi balna, witingna yal as duwi uina, yal kidika marid lani bahwasakkat lalaihna. Dawak muih balna bangkidika papusyakat duwi uiwi dulausasakna,

⁴dawak Jisas yakat kalyuyulna: —Maestro, adika yalni marid lani bahwasakkat lalaihna.

⁵Lā yakat, Moses yaklauwi yanapakna kipala kau bahrwi īna atnin adika satni yalni laih. ¿Man laih ais yultamahn?

⁶Witingna adika yulwi dakakana kidika laih traini tatalna, kaput laih witing misnitik yakna atnin yulni. Kaunah Jisas witing abukwi sau yakat tingni kau ulna.

⁷Kidika usnit kat, witingna ban ban kalyulwi dakakawa bahang, wauhyaklauwi diyulna: —Manna kaupak wais kat dutni as bik yamwas kidika, kipala tatuna kidika dulauwi ruhmwang.

⁸Dawak watwi abukwi sau yakat tingni kau ulna.

⁹Kidika dakawi, mahka kalahwi uina as as, muihbararak balna kidika tatuna kalahwi uina. Jisas dawak yal kidika karak manah wawatna kat, kidika pāni yakat,

¹⁰wauhyaklauwi kalyulwi dakana: —Yal, ¿angkat bangyah? ¿Muih as bik daunin yakat mawirlawasdaih?

¹¹Yal kidika yaklauwi nangnitlana: —Muih as bik, Dawan. Jisas yaklauwi kalyulna: —Yang bik daunin yakat mawirlatasyang; waradika yawah, kaunah watta dutni yamwinih.][13]

¹²Jisas watwi muih balna yakat kiwi diyulna: —Yang kuduh muih balna yaringnina; wais uskit uiwakat, yaringni as sangka duwa kidika duna karang, dawak watwi laih puksani yakat lik-awas karang.

¹³Parisi balna yaklauwi kalyuyulna: —Man silp witmanis yultaman: kidika witnis laih dauh ki.

¹⁴Jisas yaklauwi nangnitnalana: —Yang witkinis kidika laih minit nuhni ki, yang alas witkinis yulki karang bik. Yang amanglatayang angkaupak aiwanayang kidika dawak bik angkat yawayang kidika; kaunah manna laih amanglatasmana.

¹⁵Manna laih amput muih as, muih ūk lani laihwi yamwa kaput yamtamana. Kaunah yang laih muih as bik lani laihtik yamtasyang;

¹⁶kaunah muih lani laihtik yamtayang kat, di rahm kidika karak laihtik yamtayang, dawak bik yang alas laihtik yamtasyang, kaunah Papang yasihna kidika karak laihtik yamtayangna.

¹⁷Manna lamana yakat ulna ki, muih bu witnis kakawarang kat kidika laih rahm ki.

¹⁸Kaput kat, yang witnis as yang, yang alas witkinis, dawak Papang yasihna kidika witnis ūk ki.

¹⁹Kalyulwi dakakana: —¿Papangma angkat sakyah? Jisas yaklauwi nangnitnalana: —Manna amangkilatasmana, dawak Papangki yakat bik amangnilatasmana; yang akat amangkilatamana kat laih, Papangki yakat bik amangnilatanama.

²⁰Jisas adika yulni balna yulna makatyulnin ūni yakat sumalwa sakkauna, kalik yakwi ahawa baksni balna bangkidika pāni yakat sakkauna yulna. Kauna muih as bik witing yakat laihwi sitwasdai, kat witing awarni kidika kiwi kawas dai bahang.

²¹Jisas watwi diyulna: —Yang yawayang, dawak manna yawaltanama, kaunah dutmana yakat dautanama. Yang yawayang pāni yakat manna sip yawasmana.

²²Ju balna yuyulna: —¿Witing alas kalinin kulwakatpah, kidika bahang yulwa kidika witing kiwa yakat mayang sip mawaski?

²³Jisas yaklau diyulna: —Manna laih sau akaupak mana, kaunah yang laih makaupak yang; manna laih adika sauni kaupak mana, kaunah yang laih adika sauni kaupak awasyang.

²⁴Kidika bahang manayulnayang manna dutmana yakat dautanama; kat manna kasak kultas awanama kat yang akat, dutmana yakat ban dautanama.

²⁵Kaput laih kalyulwi dakakana: —¿Man kidika waismahn? Jisas yaklauwi nangnitnalana: —Tatuna kidika, ¿ais yamtik manna karak yulbaunikyah?[14]

²⁶Di manas yulnik ki, dawak bik manna ais lamana yamkiyah, kaunah yasihna muihni kidika laih di rahm yulwi, dawak yang lawik muih balna yakat yultayang kidika laih sihm witing yulwak dakanayang kidika yultayang.

²⁷Kaunah witingna amanglalawas dai Papangni yulni kat yulwa kidika.

²⁸Kidika bahang diyulna: —Manna muih Walanibis al kidika mayakat dulautanama kat, yang adika amangkilatanama, yang alas kulnik lani yulbautasyang; Papang yaklauwi yasumalna kidika manah yultayang.

²⁹Yasihna muihni kidika laih yang karak ki, Papangki kidika yang alas yadawaski, kat yang laih nining yamtayang witing dukih kalawa kidika.

³⁰Jisas kidika yulwak, muih manas witing yakat kukulna.

³¹Jisas yaklauwi Ju balna witing yakat kalkukulna balna yakat diyulna: —Manna yang yulki balna yakat barangni awanama kat, manna rahm palni laih yang disaikipil awanama;

³²di rahm kidika amanglatanama, dawak rahm kidika yaklauwi manalaihwi yakwarang.

³³Witingna yaklauwi nangnitlalana: —Yangna laih Abraham sulani balna yangna, bahang watas bik muih dini yamyang alahwasyangna; ¿amput man yultamahn yangna yanalaihwi yakwarang?

³⁴Jisas yaklauwi diyulna: —Rahm manayultayang, dutni yayamwa bitik kidika laih dutni kidika warauni kakalwi.

³⁵Muih dini yamyang as kidika wanaihni balna pasyakat kalkulna awaski; kaunah walanibis kidika laih, wanaihni balna pasyakat kalkulna ki.

³⁶Kaput bahang, Walanibis al kidika yaklauwi laihwi yakwi, bahang manna laih rahm palni malaihwi yakna karang.

³⁷Yang uman amanglatayang, manna laih Abraham sulanimana; kaunah yaīnin yamtamana, kat yang yulki kidika dutasmana bahang.

³⁸Yang yultayang Papang yaklauwi nikingkana kidika; kaput bik manna bik, papangmana kaupak dakanamana kidika yamtamana.

³⁹Witingna yaklauwi kalyuyulna: —¡Yangna papangkina laih Abraham! Kauna Jisas yaklauwi nangnitnalana: —Manna kidika rahm Abraham walanibis balna mana kat laih, witing yamna kaput manna bik yamnamna dai.

⁴⁰Kaput kaunah, di rahm kidika Papang yaklauwi yasumalna kidika manayulnayang kaunah, manna yaīnin yamtamana. ¡Abraham witing kaput yamwasdai!

⁴¹Manna laih papangmana yamwa kapat yamtamana. Dawak witingna yaklauwi kalyuyulna: —¡Yangna laih bastar awasyangna; Papang aslah dutayangna, kidika laih Papang!

⁴²Jisas yaklauwi nangnitnalana: —Papang kidika rahm manna papangmana katlaih, manna yang akat dalani yatalnama, kat yang laih Papang kaupak aiwayangna, bahang akat sakyang. Yang alas kulnik aiwasyang, kaunah Papang yaklauwi yasihna.

⁴³¿Amput dawak yang sumaltayang balna kidika amanglatasmanah? Kat kidika laih yang yulki kidika dakanin sip awasmana.

⁴⁴Manna papangmana laih sitan; manna laih witing dinimana, dawak manna yamtamana witing dukih kalawa kidika kaput. Sitan laih tatuna kaupak muih iyang ki. Di rahm yakat awaski, dawak bik rahm kidika yulwas ki. Witing alas yulwa kidika, yulbauwa kidika yakat ki; kat alas muihni bahang, dawak bik alas balna papangnina witing laih.

⁴⁵Kaunah yang laih di rahm yultayang bahang, manna yang akat rahm yakultasmana.

⁴⁶¿Manna pasyakat wais sipyah, yang dutni as yamnayang kat nikingkanin? Dawak yang di rahm yultayang kat, ¿amput dawak yultayang kidika kasak kultas manah?

⁴⁷Papang kaupak kidika laih, Papang yulni kidika dakawi; kaunah manna laih Papang kaupak awasmana bahang, dakakih manawas ki.

⁴⁸Kaput laih Ju balna yaklauwi kalyuyulna: —Rahmkina dutayangna, yangna yultayangna kidika, man laih Samaria kaupak man, dawak walasa dutaman.

⁴⁹Jisas yaklauwi nangnitnalana: —Yang walasa as bik disyang. Yamtayang kidika laih Papangki ayangni nuhni yamtayang; kaunah manna laih nawatkauh rispik dis yayamtamana.

⁵⁰Yang alas alaskina yaksihni kidika waltasyang; muih as ki walwa kidika, dawak witing kuduh muih lani laihwi yamwa kidika.

⁵¹Rahm manayultayang, wais kat yang yulki balna dakawa kidika laih dauwas karang.

⁵²Ju balna yaklauwi nangnitlalana: —Waralaih rahm palni amangladi walasa dutaman kidika. Abraham dawak prapit balna bitik dadauna, dawak man yultaman: ‘Wais yang yulki dakawa kidika dauwas karang.’

⁵³¿Man kidika yangna papangkina Abraham karak tanit mahn? Witing dauna dawak prapit balna bik dadauna. ¿Bahang man kidika wais kaldakamahn?

⁵⁴Jisas yaklauwi nangnitlana: —Yang alas alaskina yaksihni kidika yamtayang kat, yang alaskina yaksihni kidika laih dauhki. Kaunah Papangki yaklauwi yamwa kat, manna bik yultamana kidika mapapangki, Papang.

⁵⁵Kaunah manna laih amanglatasmana witing kidika. Yang laihtak amangnilatayang; yang yulki kat amangnilatasyang, kidika laih alas muihni as awaki manna kapat. Kauna rahm palni laih witing kidika amangnilatayang, dawak witing yulni balna kidika dakik yamtayang.

⁵⁶Abraham, manna muihmanabarak, witing alasna duna dai kat yang maki adika talwarang dai bahang; dawak talna; kaput laih alasna nuhni duna.

⁵⁷Ju balna Jisas yakat kalyuyulna: —Man kurih 50 bik dutasman, ¿dawak yultaman Abraham talnaman?

⁵⁸Jisas yaklauwi nangnitnalana: —Yang rahm manayultayang, Abraham dis mani kaupak yang laih banyang.

⁵⁹Kaput laih witingna kipala duwi bahrnin yayamna; kaunah Jisas yakmaldi makatyulnin ūni kaupak kalahwi kiuna.