Read Mayangna Jan 9 Bible Online

Jan 9 - Mayangna bible

Jan 9

¹Jisas kalahwi kiwakat, tanipas yakat muih al as minikpa dis batahndana dai kidika sakdai.

²Dawak disainipil balna kalyulwi dakakana: —Maestro, ¿amput dawak kidika alni minikpa dis batahndana yah? ¿Papangni balna dutni yayamna yulni, kidika awaskat witing alas dutni yulni?

³Jisas yaklauwi nangnitnalana: —Witing alas dutni bik awas, dawak papangni balna dutni yayamna bik awaski, kaunah witing munah lāih kalahna atnin, Papang di yamnin sip kidika.

⁴Baisa madah kidika yakat, yasihna muihni warkni balna kidika yamnin ki; kat pukta kidika kaiwi, bahang muih as bik sip wark yamwas karang ki.

⁵Baisa muih balna pas-akat likyang kidika, yang laih muih balna yaringnina yang.

⁶Kidika yulna usnit kat, Jisas sau yakat susuih tuhwi ulangwi dawi, muih minikpa dis yakat kahna minikpa balna yakat.

⁷Usnit kat kalyulna: —Yawa Siloé wasni yakat suhtah (Siloé tanka laih: “Sihna”). Minikpa disdai kidika kiwi suhna, dawi nawatwi kaiwak uman minikpa kidika talnin sipdai.

⁸Yaihnitkau muih balna witingna tatalwadai, kidika alni lalah yulwak, dawak yulwi dakakana: —¿Kidika muihni awasyah yalahwi lalah yulwadai kidika?

⁹Buas yuyulna: —Agha, kidika laih witing. Ūk balna yuyulna: —Witing awaski, kaunah sihm kapapat ki. Kaunah witing palni bik yulna: —Agha, kidika laih yang.

¹⁰Kaput laih kalyulwi dakakana: —¿Dawak waralaih amput dawak mamakpa talamahn?

¹¹Witing yaklauwi nangnitnalana: —Kidika alni ayangni Jisas kidika yaklauwi wasmak yamwi dawi mikpa yakat kahwi dawi yayulna: ‘Siloé yakat yawa suhtah.’ Dawak yawik suhnayang, bahang kidika minitni yakat yang mikpa talnayang.

¹²Dawak kalyulwi dakakana: —¿Kidika alni angkat sakyah? Dawak witing yaklauwi diyulna: —Amanglatasyang.

¹³Jisas witing wasmak yamwi, muih minikpa kalana mani kidika laih urupnin mani dai. Kidika bahang parisi balna yakat duwi uina, minikpa kalana muihni dai kidika,

¹⁵dawak witingna kalyulwi dakakana, amput dawak waralaih witing minikpa talwa kidika. Dawak witing yaklauwi diyulna: —Mikpa yakat wasmak kahna, dawak yawik suhnayang, bahang waralaih talayang.

¹⁶Parisi buas yuyulna: —Adika yamna muihni laih Papang awaski, kat urupnin mani[15] rispik yamwas bahang. Kaunah ūk balna kidika yuyulna: —¿Kaunah amput adika sainni as yamnin sipkarang, dutni yamyang muihni kat? Kaput laih witingna pasyakat kalwayahwi kalahnin sakdai,

¹⁷dawak watwi kalyulwi dakakana, muhnilau minikpa dis dai kidika yakat: —Mamakpa mana bahang, ¿man laih ais yultamahn witing kidika? Witing yaklauwi nangnitnalana: —Yang yultayang laih prapit as ki.

¹⁸Kauna Ju balna kukulwas dai kidika muihni minikpa dis dai kidika, dawak waradika laih witing minikpa duwa kidika, dawak papangni balna yuyulwak uina

¹⁹dawak diyulwi dakakana: —¿Adika man walamabis yah? ¿Manna yultamanah minikpa dis batahndana daih? ¿Waradika laih amput dawak minikpa talwih?

²⁰Papangnina balna kidika yuyulna: —Adika laih yangna walakinabis, witing minikpa dis batahndana;

²¹kaunah amanglatasyangna amput dawak waradika minikpa ditalwapa, dawak bik amanglatasyangna wais yaklauwi minikpa kalana pa. Witing yakat kalyulta dakanauh; witing uman muihbarak ki, witing silp manayulnin sipki.

²²Papangni balna kidika kaput yuyulna, yamaduwi, kat Ju balna kidika kulninna aslah kalalahna dai bahang, sumamalwa ūni kaupak kangwi yaknin kidika, wais kat Jisas kidika Mesías kulwarang kat.

²³Kidika bahang papangni balna yuyulna: “Witing yakat kalyulta dakanauh, witing laih muihbarak ki.”

²⁴Ju balna watwi kalyuyulwak kiuna minikpa dis dai kidika, dawak kalyuyulna: —Papang niningyakat di rahm kidika yanayultah. Yangna amanglatayangna, kidika lani laih dutni yamyang as ki.

²⁵Witing yaklauwi nangnitnalana: —Dutni yamyang kidika laih amanglatasyang. Yang amanglatayang kidika laih, mikpa disyang dai kaunah waralaih talayang.

²⁶Watwi kalyulwi dakakana: —¿Ais mayamnayah? ¿Amput yamwi mamakpa manayah?

²⁷Nangnitnalana: —Uman manayulnayang, kaunah yulki kidika dakasmana. ¿Ampadawak wattik yulting dakakih manawih? ¿Manna bik usnit uikih manawih?

²⁸Kaput laih niningkauh yaklauwi kalyuyulna: —Man kidika alni disainipil awama; yangna laih Moses disainipil yangna.

²⁹Yangna amanglatayangna, Papang yaklauwi Moses yakat yulkalbauna, kaunah kidika muihni laih angkaupak kalahna kidika amanglatasyangna.

³⁰Al kidika yaklauwi nangnitnalana: —¡Di taldas diniyah! Manna amanglatasmana angkaupak kalahna kidika, kaunah yang laih mikpa yana.

³¹Yamni amangladi, dutni yamyang balna yulnina laih Papang dakawas ki; witing kulnin lani yayamwa balna kidika manah laih yulnina dakawi.

³²Wat as bik dakadaski, muih as minikpa ditalwas batahndana kidika minikpa kalana atwakat.

³³Adika alni Papang kaupak kaiwas kat, witing di as bik yamwas karang.

³⁴Kaput laih witing yakat kalyuyulna: —Man, dutni manah buhng batahndanaman kidika, ¿yangna akat yanasumalnin kultamahn? Dawak makatyulnin ūni kaupak[16] yakpapamna.

³⁵Jisas dakana muih al minikpa dis dai kidika yakpapamna atwakat; dawak witing karak kalpakwak kalyulwi dakana: —¿Muih Walanibis al yakat man kasak kultamahn?

³⁶Witing yaklauwi kalyulna: —Dawan yayultah, kidika waisyah, yang witing yakat kulna atnik.

³⁷Jisas yaklauwi nangnitlana: —Uman talnaman: kidika laih yang, witing karak kuduh yulbautaman kidika.

³⁸Kaput laih al kidika Jisas muhni yakat limbabahwi kalyulna: —Yang kasak kultayang, Dawan.

³⁹Kidika usnit kat Jisas yulna: —Yang sau muihni balna akat aiwanayang la kat kidika yamna atnik, dawak miniknapa dis balna kidika talna atninna, dawak miniknapa tatalwa balna kidika di talwas kalninna.

⁴⁰Parisi balna buas witing karak bangdai kidika, dakawi, kalyulwi dakakana: —¿Yangna bik miniknapa diskatpah?

⁴¹Jisas yaklauwi nangnitnalana: —Manna mamaknapa diskat laih, dutni yamnamana kidika pātni dis awanama. Kaunah taldi timana bahang, pāt dutamana.