Read Mayangna Apastil Balna Warknina 1 Bible Online

Apastil Balna Warknina 1 - Mayangna bible

Apastil Balna Warknina 1

¹Wauhkitaya tatuna kidika yakat, Teófilo yamni palni, yang lawik Jisas tatuna kaupak di yamna balna dawak sumalna balna

²dawak mahka makau kisang yakat kilwi kiuna mani kat kidika ulnayang. Baisa witing kiwas tanit yakat, witing amput atnin kidika disumalna dai Spirit Holi munah, witing apostel balna walwi yakna dai yakat, witingna ais yamnin dai kidika.

³Dawak dauna usnit kat witing muihni nuhni lāih kalahwi niningnakana, witing dauwas kidika. Ma 40 praisni dāwak kaltatalna dai, dawak Papang king kāwa lāni balna kidika diyulna dai.

⁴Witing baisa apostel balna karak bangdai mani balna yakat Jisas diyulna dai witingna Jerusalén kaupak uinin awas ki. Diyulna: —Tahatanauh Papangki pramis manayamna kidika kaiwi kalahwarang kat, kidika yulni kuduh yang manayulnayang dai.

⁵Rahmki, Jan witing was karak manautuhwi yakna, kaunah nai awaskat manna laih Spirit Holi karak manautuhwi yakwarang.

⁶Dawak Jisas karak bangdai kidika balna kalyulwi dakakana: —Dawan, ¿Israel kingni lani kidika watta āmayah?

⁷Jisas nangnitnalana: —Manna amanglanamna dini awaski, mampat mani Papang yamwarang kidika, kat witing manah parasni duwa bahang yamnin;

⁸kauna Spirit Holi kidika kaiwarang kat manna mamatna yakat, manna parasni dutanama, dawak alahwa yang yulki yultanama, Jerusalén yakat, Judea, Samaria, kaput bik sau naikau balna yakat bik.

⁹Adika yulni yulwak talwabangkat Jisas kidika mahka duwi kiuna, dawak mukus pasyak āna, bahang watwi talwas dadana.

¹⁰Dawak witingna Jisas kidika amput makau kisang yakat kilwi kiwa kidika talwabangkat, muih ahal bu praknina pihni kat kawi witingna yaihnitna yakat yaklauna raudai

¹¹dawak yuyulna: —Galileo ahalni balna, ¿ais yamta makau kisang yakat talamanah? Sihm adik Jisas kuduh manna pasmangna yakat likdai kidika, bahang waralaih makau kisang yakat duwi kiuna, kaput bik wat nawatwi kaiwarang, amput kiwak talnamana kaput.

¹²Olib asangni kaupak, apostel balna kidika nawatwi uina Jerusalén yakat: ta barangni parahni munah uina, urupnin mani[1] lā āna kaput, ta naini lapaknin awas.

¹³Witingna tawan nuhni yakat uiwi kakana, dawak ū uptis makau bangdai yakat kikilna. Adika balna dai: Pita, Jan, Jims, Andru, Pilip, Tomás, Bartolomé, Mateo, Jims, Alpius walanibis dai kidika, Saiman, Celote balna kaupak as dai kidika, dawak Judas Jims walanibis.

¹⁴Adika balna bitik kalududuhwādai minitna yulnin, Jisas wirahni balna karak, Mery witing nanangni, dawak yayal ūk balna dai kidika karak bik.

¹⁵Bahang kidika mani balna yakat, kulyang balna kidika muih 120 dai kidika kalududuhna, dawak Pita yaklauwi yulna:

¹⁶“Wirah balna, Spirit Holi Devid munah yulna dai kidika, kaiwi kalahnin dai, Judas yulni, kidika witing waihla balna taninatuna kawi duwi kiuna dai Jisas yakat laihna atnin.

¹⁷Judas kidika mayang paskaupak dai, dawak mawarkki kidika witing bik yamwadai.

¹⁸Kaunah witing kiwi sau as bakanna, dutni yamwak minitlauwi kalalana dai kidika lalahni karak, kidika usnit kat, tunan tani bukwi tutwi dauna, dawak bani balna bitik kurwi kalahna dai.

¹⁹Bahang Jerusalén muihni balna dakawi, witingna kidika sauni ayangni Acéldama papakna, kidika tanka laih ‘Ā sauni’.

²⁰Kat Salmo wauhnitaya yakat yulwa kaput: ‘Ūni kidika kauhmak wanilang as kalahwarang, dawak muih as bik yakat sip yalahwas karang.’ Dawak aput bik yulwi: ‘Witing warkni kidika muih ūk duwarang.’

²¹“Mapasking akat ahal dudi, bahang witingna laih ma bitik yakat mayang karak dai, Dawan Jisas mayang karak dai mani balna yakat,

²²Jan yaklauwi was utuh'yakna kaupak, makau kisang yakat kilwi kiuna kat. Kaput bahang kidika balna as mayang mapasking yakat ānin wantki, kaput laih kalpakdi witnis yulnin, Jisas kidika yaklauna sauū kaupak.”

²³Kaput laih muih bu yayakna: José, Barsabás, dawak bik Justo bik kalyuyulwadai, dawak Matías.

²⁴Dawak witingna aput minitna yuyulna: “Dawan man muih balna bitik kulninna talaman kidika, nikingnakata, bu adika kaupak angdika palni yakta dunamahn

²⁵kaput laih witing apostel warkni Judas dutni yamwi dispamna kidika pāni yakat duwarang, kat Judas laih witing pāni palni yakat kiuna bahang.”

²⁶Dawak suerte yakwi tatalwak Matías minitkat bukna, kaput laih kidika minitni kaupak 11 balna pasyakat kāna dai.