Read Mayangna Apastil Balna Warknina 11 Bible Online

Apastil Balna Warknina 11 - Mayangna bible

Apastil Balna Warknina 11

¹Apostel balna dawak kulyang balna bik Judea yakat bangdai kidika balna yul dakakana, ju balna awas kidika bik Papang yulni kidika duduna.

²Pita, Jerusalén yakat nawatwi kiuna kat ju muihni balna wiryaklalana kidika witing niningkauh yaklalauna dai.

³Dawak kalyulwi dakakana: —¿Ais yamta Ju awas balna yakat yawa ditalnamahn, dawak bik witingna karak dikasnamahn?

⁴Pita yaklauwi tatuna kaupak ais kalahna balna kidika diyulna:

⁵—Yang sakyang dai Jope tawanni nuhni yakat, dawak mikityulta sakyangkat amana kapat as talnayang: Talnayang, dangrina asnina nuhni kapat sutni sipintang balna kidika sitna dai, bahang makau kisang kidika kaupak kaina yang sakyang yakat.

⁶Yamni talnayang, kidika pasyakat di bangkidika, bahang bangdai, kalni arungka duwa balna kidika, bil satni balna, dawak uhu balna bik.

⁷Dawak dinit as yulwak dakanayang: ‘Pita, lawa ita kastah.’

⁸Dawak yang nangnitlanayang: ‘Dikah Dawan, kat yang tikpas yakat di maisihni kidika as bik kāwaski.’

⁹Kaput dawak makau kisang kidika kaupak dinit as yulna kidika watwi yulna: ‘Papang yaklauwi, maisihnidis yamna kidika man lawa maisihni yulwinih.’

¹⁰Adika dini watbās yang akat kalahna, kidika usnit kat bitik watwi nawatwi kilwi kiuna kisang yakat.

¹¹Kidika minitni yakat, muih ahal bās Cesarea yakaupak sisihna dai, yang akat yawalwi, bahang sakyang ūni kidika yakat uiwi kakana.

¹²Spirit yaklauwi yāpakna, dauhkulnik awas, dawak witingna karak yawinik. Dawak adika wirah balna tiaskauas adika balna bik uina dai yang karak. Yangna bitik āwanayangna kidika al uni yakat,

¹³dawak yanayulna, amput witing ūni yakat insal talna kidika, yaklauna sakkauna yulkalbauwak: ‘Jope tawanni nuhni yakat muih sihtah, kaput laih Saiman kidika yultang kaiwang, bahang kidika alni ayangni ūk laih Pita;

¹⁴witing yaklauwi mayulwarang amput malaihwi yakna karang kidika, dawak ūmapas muihni balna bitik.’

¹⁵Yang mahka sumaltingkat, Spirit Holi kidika witingna minitna yakat kaina, tatuna mayang akat amput kaina dai kidika kaput.

¹⁶Kaput laih isingkatna, Dawan yulna dai kidika: ‘Rahmki, Jan laih was karak utuh'yakna, kaunah manna laih Spirit Holi kau manautuh'yakwarang.’

¹⁷Yamni ki, Papang yaklauwi diana ki witingna yakat bik, Jisaskrais yakat kalkuldak mayana kaput bik, ¿yang adika waisyang Papang niningyakat lawinik?

¹⁸Jerusalén kau kulyang balna adika yulni dakakana kat, ap dawi, Papang ayangni nuhni yamwi yuyulna: —¡Kaput laih ju balna awas yakat bik diana ki witing yakat kiunin kidika, dawak dauwas ban atnin kidika dunin!

¹⁹Esteban dauna usnit kat, kulyang balna yakat uhuina laihnin yulni, kaput bahang buas kiri uina Fenicia, Chipre dawak Antioquía. Kidika yakat ju balna yak yul wisamni kidika sumamalna, kaunah muih ūk balna yakat laih sumamalwasdai.

²⁰Kaput kaunah, kulyang muihni balna Chipre dawak Cirene kaupak balna kidika Antioquía tawanni nuhni yakat uiwi, dawak ju muihni balna awas yakat bik sumamalna, Dawan Jisas yulni balna kidika.

²¹Dawan parasni kidika witingna karak dai, dawak kaput laih kulninna umani kidika dadana, dawak Dawan yakat kukulna dai.

²²Jerusalén sutsni adika yulni amanglawi Bernabé kidika sisihna Antioquía yakat.

²³Bernabé kiwi talna, amput Papang blisin diana dai kidika, dawak kulninna alasna kalalahna. Yul disumalna, kulninna barangni duduwa balna kidika ban barangni dunin Dawan yakat.

²⁴Kat Bernabé laih al as kulnin yamni dai bahang, Spirit Holi dawak kasak kulnin bik buhng duwadai. Dawak kaput laih muih manas Dawan karak aslah kalalahna.

²⁵Kidika usnit kat, Bernabé Tarso yakat kiuna Saulo walwi,

²⁶kalpakna kat, duwi kiuna Antioquía yakat. Kidika yakat suts karak kurih as sakdai, muih yakat manas laih sumalna dai. Dawak Antioquía yakat kuduh disaipil balna yakat ayangnina papakna kristian.

²⁷Kidika mani balna yakat, prapit as as uina dai Antioquía yakat, Jerusalén kaupak.

²⁸As laih ayangni Agabo, witing yaklauna dawak Spirit kalduna dai, dawak yulna, yuh lakwarang ki sau bitik yakat, bahang kidika laih rahm kalahna dai, king tanit nuhni Claudio mani balna yakat.

²⁹Kaput laih Antioquía muihni kulyang balna yaklauwi ilp sisihna dai Judea kau kulyang muihni balna yakat, witingna ais dianin sip kidika diayana dai.

³⁰Kaput yayamna, Bernabé dawak Saulo kidika balna munah kalik uduhwi sisihna dai Judea muihnibararak balna yakat.