Read Mayangna Apastil Balna Warknina 12 Bible Online

Apastil Balna Warknina 12 - Mayangna bible

Apastil Balna Warknina 12

¹Kidika mani balna yakat, king Herod suts muihni balna yakat laihnin uina.

²Witing yaklauwi pakna Jims kidika isparah kau inin, Jan wirahni kidika;

³dawak kidika talwak ju balna kidika yamni tatalna, bahang pakwak Pita kidika bik lalaihna. Bahang kidika laih kalahna plawar pupuhnin dis busna kat kakaswa kidika mani dai.

⁴Pita kidika laihna dawak Herod yaklauwi silak yakat āna, bahang soldado balna uduhna arungka kidika witingna maintatalwadai, uduhna as kidika soldado arungka arungka duwadai. Witing kulna, insal kaiwi bayakna mani kidika usnit kat muih balna yakat niningnakanin.

⁵Kaput laih Pita kidika silak ūni yakat sakdai, maintatalwak, kaunah suts muihni balna witing yulni minitnayuyulwa kidika dadawasdai, parasni minitnayuyulna.

⁶Herod yaklauwi muih balna yakat yakwi niningnakawarang kidika puknita tanit kauh yakat, Pita kamatusdai soldado balna bu walsah yakat, dawak bik sīn kau sitna dai, soldado ūk balna kidika laih dūr yakat maintatalwādai.

⁷Sirihni Dawan innisal as witing yakat kiuna, dawak silak ūni kidika yaringni manah dana. Insal kidika Pita pirini yakat sukwi sahmuhna, dawi kalyulna: “¡Usnit kat lawah!” Kidika minitni yakat sīn balna kidika uluhwi bubukna Pita tingni kaupak.

⁸Dawak insal yaklauwi kalyulna: “Prakma awah, dawak susma bik ātah.” Bahang Pita laih kaput yamna, dawak baisa kalyulna: “Kalmuknam kidika kau kalmuktah dawak uskit uitah.”

⁹Pita, witing insal usnit yakat kalahwi kiuna, witing yamni laih amanglawasdai, rahmpa kidika awaskat dauhpa, insal yamwa kidika. Witing niningyakat talwa kidika laih amana kapātdai.

¹⁰Guardia tatuna kau raudai kidika bayayakna, kidika kaupak usnit dai kidika bik bayayakna, dawak ayan dūrni yakat uina mani kat, ta nuhni niningkauh yakat sakdai kidika, dūr kidika silp apahna dai. Kaput laih ta nuhni as lapapakna usnit kat, insal yaklauwi witing alas dapamna dai.

¹¹Kaput dawak Pita amanglawi yulna: “Waralaih amanglatayang, rahm palni laih Dawan innisal sihna dai yalaihwi yakna atnin Herod tingni kaupak, dawak ju balna yāyamnin kukulwadai kidika bitik.”

¹²Pita kidika amanglawi, Mery ūni yakat kiuna, Jan nanangni yakat, ayangni ūk kidika laih Mark, kidika yakat muih manas laih kaluduhwi minitnayulwa bangdai.

¹³Dūr yakat kiwi yulna, dawak yal sirau bin as ayangni Rode, witing kalahwi talna wais yulwapa.

¹⁴Yulwa kidika Pita dinit kat dakawi, kulnin kasak alasna duna dawak, bahang dūrni apahwas dawi kiri kawi kiuna ū pasyakat, muih balna yakat isningnapaknin Pita dūr yakat sakkidika.

¹⁵Kalyuyulna: —¡Sinsma disyah! Kaunah witing yulna rahmki. Dawak witingna yuyulna: —Witing awaski, kaunah innisal.

¹⁶Pita laih ban dūr yakat yulwasakdai. Dawak witingna dūr kidika apahwi talwi muihsakdadauna.

¹⁷Kaunah witing, tingnikau sain diyamna ap atnin, dawak diyulna Dawan yaklauwi witing yakat amput silak kaupak kalyakna kidika. Dawak minityakat lakwi yulna: —Adika Jims yakat kalyultanauh, dawak wirah balna yakat bik. Kidika usnit kat kalahwi pa ūk yakat kiuna.

¹⁸Payahlawak, soldado balna pasyakat sip amanglalawasdai, angkatdanapa Pita kidika.

¹⁹Herod yaklauwi pakna walna atnin, kaunah sip yayakwas dadana bahang, guardia balna kidika ihina dai Herod yaklauwi pakwak. Kidika usnit kat Herod kidika Judea kaupak kalahwi kiwi Cesarea yakat yalahna dai.

²⁰Herod kidika kulnin daukalna dai, Tiro dawak Sidón muihni balna niningna yakat, bahang muih balna kidika yulbauwi aslah kalalahna dai, witing yakat kiuna atnin. Witingna Blasto kidika kulnin lalaihna, kat Blasto laih Herod king kāwa kidika pasyakat nuhni as kalkulna dai bahang, dawak witing munah kulnin aslah lani kidika wawalna, kat Tiro dawak Sidón kidika balna laih king kaupak kasnin dini balna kidika duduwadai bahang.

²¹Ma as kat Herod yaklauwi diyulwak uina dai, dawak witing king prakni kidika kawi dawi la yamwa sinini yakat yalahwi yulbauna.

²²Dawak muih balna kidika sarahwi yuyulna: “¡Adika yulbauwa kidika laih muih al awaski, kaunah dawan as ki!”

²³Kidika minitni yakat, Dawan innisal as yaklauwi kalyamwak Herod kidika siknis kalahna, Papang yakat nuhni kalkulwasdana kidika yulni, dawak babil kaspapamwak dauna.

²⁴Kaunah Papang yulni kidika laih baisa tanit yakat kiuna, pa bitik yakat yulwi sumamalna.

²⁵Bernabé dawak Saulo karak Jerusalén yakat witingna warknina yamwi dahn dawi, nawatwi uina yakat Jan kidika duwi uina, ayangni ūk kidika laih Mark.