Read Mayangna Apastil Balna Warknina 13 Bible Online

Apastil Balna Warknina 13 - Mayangna bible

Apastil Balna Warknina 13

¹Antioquía kau suts sakdai kidika yakat prapit as sakdai dawak maestro bik as sakdai. Kidika balna laih Bernabé dawak Saiman (ayangni ūk kidika laih Sani bik kalatwadai), Lucio Cirene kaupak dai kidika, Manahem (Herod karak aslah bararakna dai kidika) dawak Saulo.

²Ma as kat prias yamwabangkat Dawan yakat, dawak bik di kaswas, dawak Spirit Holi kidika yulna: “Bernabé dawak Saulo kidika silp yaktanauh, witingna wark yamnin diyulnayang kidika yakat.”

³Kaput laih, di kaswas dawi minitna yuyulna usnit kat, witingna minitna yakat tingnina yuwi dawak mahka damumukwak uina.

⁴Spirit Holi yaklauwi disihna Bernabé dawak Saulo karak, bahang Seleucia yakat uina, dawak kidika munah kuring kau kawi Chipre kalangnisah yakat uina.

⁵Dawak Salamina yakat uiwi kikilna, dawak mahka sumamalna Papang yulni kidika sumamalwa ūni ju balna duduwadai yakat. Dawak Jan bik witing kiuna tingninasut laihyang as kapat.

⁶Kalangnisah kidika bitik awaihwi tatalna, dawak Pafos yakat uina, bahang kidika yakat ju al as sakdai kidika laih sukyah, ayangni laih Barjesús, witing laih prapit alas muihni as dai.

⁷Adika sukyah laih, kabamint tunan muihni Sergio Paulo karak dai, bahang kidika alni laih sinsni sirihni dai. Dawak kabamint muihni kidika yaklauwi diyulna uina atnin, Bernabé dawak Saulo karak, kat Papang yulni kidika dakakihdai bahang.

⁸Kaunah sukyah kidika, witing ayangni kidika grik kau laih Elimas, bahang witing yulwasdana, kabamint muihni kasak kulwarang kidika yulni tanit dakna.

⁹kaput laih Saulo, dawak ayangni ūk kidika laih Pal, witing Spirit Holi kidika kalbuhng bahang, witing yakat yamni kaltalna

¹⁰dawi kalyulna: —¡Alas muihni, muih dutni, diablo walanibis dawak di yamni balna kidika bitik niningkauhman! ¿Ampadawak datasmahn, Dawan tani balna barangni kat wirtaman kidika?

¹¹Waralaih Dawan yaklauwi wah mawarang: mamakpa puklakwarang, ma as as, ma yaringni kidika talas awama. Kidika minitni yakat, Elimas witing minikpa kidika puklakna, dawak muih walna kaldukiuna atnin tingni yakat laihwi, kat minikpa di talwa kalna bahang.

¹²Kidika talwi, kabamint kidika kulyang kalahna, kat Dawan yulni sumalna kidika yamni palni dai bahang.

¹³Pal dawak wanaihni as balna kidika karak Pafos yakat kuring kau kawi Perge yakat uina, Panfilia sauni yakat; kaunah Jan laih nawatwi Jerusalén yakat kiuna.

¹⁴Perge kaupak bayakwi Pisidia kau Antioquía yakat uina. dawak kidika yakat urupnin mani[10] kat sumamalwa ūni yakat uiwi kawi yalalahna.

¹⁵Lā balna dawak prapit balna wauhninataya kidika yulwi tatalna usnit kat, sumamalwa ūni tanituna balna yaklauwi diyuyulna uina atnin: —Wirah balna, manna yul dutamana kat, muih balna kulninna dulaunin, waradika yultanauh.

¹⁶Kaput laih Pal yaklauwi, tingni kau sain yamna, witing ap danin, dawak yulna: —Manna dakanauh, Israel balna, dawak pa ūk muihni Papang yamanidutamana balna kidika bik.

¹⁷Israel Papangni kidika yaklauwi mamuihki bararak balna kidika yakwi duna; dawak nisan nuhni yamna, witingna kidika sau ūk muihni kapat yalalahna Egipto yakat, dawak usnit kat, witing parasni nuhni kau, kidika sauni kaupak yakna.

¹⁸Papang witing wauhna, witingna dutni yayamna kidika kauhmak wanilang yakat, kurih 40,

¹⁹dawak nisan tiaskaubu dismukna Canaán sauni yakat, mamuihki bararak balna yakat sau dianin yulni.

²⁰Kidika bitik laih kurih 450 bayakna dai. “Kidika usnit kat tunan muihni wihta diana, kaput laih prapit Samuel mani balna kat.

²¹Kaput laih witingna king as yuyulna, kaput laih Papang yaklauwi Saúl, Cis walanibis kidika king diana, kurih 40, witing laih Benjamín sulani kaupak dai.

²²Kidika kaupak usnit kat, Papang yaklauwi Saúl pāni kaupak yakpamna, dawak Devid kidika king diawi yulna: ‘Isaí walanibis Devid kidika yaknayang, bahang al as yamni talayang, dawak bik yang yulki kat yamnin kulwi.’

²³Sihm adika Devid sulani munah kuduh kaiwi kalahna Jisas, bahang witing kidika kuduh Papang yaklauwi sihna dai Israel kidika laihwi yaknin, witing pramis yamna kaput.

²⁴Jisas kaiwas tanitkauh, Jan laih Israel bitik yakat adika yulni yulwi awaihna, witingna kidika Papang yakat nawatwi ainin, dawak was utuh'kalahnin.

²⁵Dawak Jan kidika sangnika witni yakat kaiwakat, yulna: ‘Yang kuduh manna kultamana kidika awasyang; kaunah yang uskit yakat as kaiwi, bahang yang sip-awasyang susni wahni manah bik uluhnik.’

²⁶“Wirah balna, Abraham sulani balna, manna pa ūk muihni balna, Papang yamanidutamana kidika: laihwi yaknin yulni adika laih mayang madiki.

²⁷Jerusalén kau yalalahwa balna kidika, dawak tunan muihni balna kidika, witingna Jisas kidika amangnilawas dadana, dawak prapit balna sumamalwa ūni yakat, urupnin mani kat yulwi tatalwa kidika amanglawas dadana; kaput laih sihm witingna yaklauwi Jisas kidika daunin yakat wirlalana, bahang prapit yulna balna yakat kaiwi kalahna.

²⁸Dawak witing muihni yakat daunin dini as bik disdai kaunah, Pailat yakat papakna īna atnin.

²⁹Ulna yakat, witing yulni yulwa balna kaput kalyayamna usnit kat, pan prihni kaupak lakwi dawi nununa.

³⁰Kaunah Papang yaklauwi dauna kaupak dulauna.

³¹Dawak, ma manas lāih dikalahna dai, kidika balna witing karak Galilea kaupak Jerusalén yakat kalpakwi uina balna dai kidika balna yakat; kidika bahang waralaih witingna kidika Jisas witninis balna tawan muhni yakat.

³²“Kaput laih, yangna manna yakat manayultayangna adika yulni: Papang yaklauwi pramis yamna dai kidika mamuihki bararak balna dai yakat,

³³bahang kaput kaiwi kalahna sulani mayang akat. Kidika laih Jisas dauna kaupak watwi dulauna kidika, salmo usnit kau ulna kaput: ‘Man laih yang Walakibis man; yang warmani mabatahnnayang.’

³⁴Papang, uman yulna dai, dauna kaupak dulauwarang kidika, kaput laih dāwak witing muihni kidika dutlawas karang, ulna yakat yulna: ‘Devid yakat pramis holi dawak rahm balna yamnayang kidika kat yamki ki.’

³⁵Kidika bahang pa ūk yakat yulwa kidika: ‘Datangkat dima yamyang holi muihni kidika dutlawas karang.’

³⁶Rahm kidika laih, Devid witing mani balna dai kidika muihni balna yakat dinina yamna dai, Papang yaklauwi pakna kaput, kidika usnit kat dauwi papangni karak kalpapakna, dawak witing muihni nuhni laih daukalna.

³⁷Kaunah, kidika muihni Papang yaklauwi watwi dauna kaupak dulauna kidika muihni laih daukalwasdai.

³⁸Kaput bahang, wirah balna, manna amanglanamna ki, dutni dawak disnin kidika laih yulna ki Jisas munah. Witing munah, kasak kukulwa balna kidika dutnina dawak diswi, Moses lāni munah sip dutni dawak disnin lalaihwas dai kidika.

³⁹

⁴⁰Bahang amungtalnauh, kaput laih manna mamatna yakat prapit balna uhulna kidika buknin awas yulni:

⁴¹‘Talnauh, manna minitdis kultamana kidika, tala muihsak kapat daka pini distanauh; kat manna mamana balna yakat sihm kidika dini kapat yamki manna rahm kultas awanama, muih as kidika dini manayulwak.’

⁴²Pal dawak wanaihni balna karak sumamalwa ūni kaupak kalalahna kat, diyuyulna dai urupnin mani ūk yakat watwi uiwi kidika yulni yuldibauna atnin.

⁴³Sumamalwa ūni yakat kalududuhna kidika dahn bayak dawakat, ju balna manas dawak ju lanina yakat wiryaklalana muihni balna bik witingna usnit uhuina Pal dawak Bernabé kidika balna yakat. Dawak witingna yaklauwi yul sumamalna, papang dalani kidika kau manayulwak aiwanamana kidika kaput ban awanauh.

⁴⁴Kidika wīkni bayakwak, urupnin mani ūk kaiwakat, tawan nuhni kidika bitik kapat kalududuhna Dawan yulni kidika dakana atnin.

⁴⁵Ju balna witingna tatalwak muih mahni kat, witingna minit anwi Pal niningkauh dutni yuyulna.

⁴⁶Kaput laih Pal dawak Bernabé karak yamaduwas yulbabauna, dawak bik nangnitnalalana: —Papang yulni sumalnikna kidika yangna warkkina, tatuna kidika laih ju balna mana yakat, kaunah manna ruhmtadatamana bahang, sangka ban atnin kidika sip manna dimana awaski, kaput bahang waralaih ju awas balna yakat yawanaki.

⁴⁷Kat kaput Dawan yaklauwi yanapakwi yanayulna: ‘Nisan balna yaringnina kapat mahatayang, kaput laih laihtik yaktayang kidika dutayawah sau, tanit naikau yakat.’

⁴⁸Kidika dakawi, ju awas balna kidika alasna kukulna, dawak bik yuyulna Dawan yulni kidika laih yamni palni ki; kaput laih sangka ban atnin dunin muihni balna kidika laih kasak kukulna dai.

⁴⁹Kaput laih Dawan yulni laih kidika sauni bitik yakat sumamalna dai.

⁵⁰Kaunah ju balna yaklauwi yayal kulninna minikun talnin duduwa dawak rispik yayalni balna yakat bik yulbabauna, dawak ahal apis nuhni dikukulwa balna yakat bik tawan nuhni pasyakat, dawak kulninna yakat dutni ahana Pal dawak Bernabé kidika balna niningnakauh yaklauna atnin, kaput laih witingna kaupak kangwiyaknin.

⁵¹Kaput laih witingna kalnina kau sau laihna kidika uswi yayakna, kidika muihni balna niningnakauh yaklalauwa kidika yulni, dawak mahka Iconio yakat uina.

⁵²Kaunah kulyang balna kidika laih alasna manah buhngdai dawak Spirit Holi bik.