Read Mayangna Apastil Balna Warknina 14 Bible Online

Apastil Balna Warknina 14 - Mayangna bible

Apastil Balna Warknina 14

¹Iconio yakat, Pal dawak Bernabé karak papatni uiwi kakana, sumamalwa ūni yakat, ju balna, dawak sumamalwak muih manas kasak kukulna, ju balna dawak ju balna awas kidika bik.

²Kaunah ju balna kulyang kakalwas dai kidika balna laih ju awas balna kulninna dutni duduwadai kidika balna yakat uswi sahmuhwi kulyang balna niningnakauh yaklalauna.

³Kaput kaunah apostel balna kidika ma manas yakat wawatna dai, dawak Dawan yakat kulninna āwi duduwa kidika bahang yul kidika barangni lāih yulbabauna; dawak Papang dalani lani sumamalwa kidika Dawan yaklauwi rahm kaput yamwādai, parasni diana dai sain balna kidika yamnin.

⁴Kauna muih balna tawan nuhni kau kidika wayahwi kalahna bangdai, buas kidika laih ju balna karakdai, dawak ūk balna kidika laih apostel balna karak dai.

⁵Kaput laih, ju balna dawak ju awas balna kidika karak aslah kalalahna dai dutni diyamwi kipala kau bahrna atnin.

⁶Kaunah Pal dawak Bernabé karak witingna amanglawi kiri yaklalana Listra dawak Derbe yakat, Licaonia tawanni, dawak yaihnitkau sau ūk balna yakat,

⁷dawak kidika pāni balna yakat bik yul yamni wisam kidika sumamalna.

⁸Listra yakat al as sakdai, witing laih sip lapakwasdai. Batahndana kaupak kalni dutni dai bahang. Kidika alni laih yalahna sakdai,

⁹Pal yulwa kidika dakana, dawak Pal yaklauwi witing yakat talna, bahang amanglana, kidika kasak kulnin aitani duwadai, witing sakahniwa kaupak yamni kalahnin.

¹⁰Kaput laih yulni parasni kau kalyulna: —¡Lawa kalma kau ataktah! Al kidika sutwi yaklauwi kalni kau atakna, dawi mahka lapakna.

¹¹Pal yamna kidika talwi, muih balna kidika Licaonia tuni kau parasni yulwi sararahna: —¡Dawan balna kidika muih kalwi aiwi yaklalakna mayang akat!

¹²Dawak yuyulna Bernabé kidika laih dawan Zeus, dawak Pal laih dawan Hermes, kat witing yulbauwādai bahang.

¹³Sumalyang Zeus laih, tawan kiwi kāwa yakat makatyulnin ūni duwādai bahang, witing duaina turuh almuk, dipulu; dawak witing, kaput bik muih ūk balna bik sakripais as yamnin kukulna witingna yakat.

¹⁴Pal dawi Bernabé karak amanglawi praknina iswi bibisna, dawi muih balna pasyakat kawi sarahwi yuyulna:

¹⁵—Kaunah, ahal balna, ¿ampat dawak kaput yamtamanah? Yangna laih muih ahal yangna sihm manna kapat. Aiwanayangna kidika laih yul wisamni kidika manayulna atnin, adika dini ilp as bik kalahwas kidika dana atnamna, dawak Papang sangka yakat nawatta aiwana atnamna, sau dawak makau kisang yamna kidika, kuma dawak kidika pasyakat di balna bangkidika bitik yamna kidika.

¹⁶Ma ūk balna yakat, Papang yaklauwi dawak muih kidika tanina silp uina,

¹⁷witing lāih kalahwa kidika dawasdai, di yamni balna yamwa kidika munah, witing kidika waispa; witing kuduh kalawak waslauwa kidika manna yakat, dawak bik di minik balna bik kalahwa kidika, dawak witing yaklauwi kasnin dini balna aitani manawi, kaput laih ismangnalak atnin.

¹⁸Kidika bitik diyuyulna kaunah, sip-awasdai muih balna kidika dilaihwatna atnin, yuldarangkat sakripais yamwas atnin.

¹⁹Kidika yakat ju balna uina dai Antioquía dawak Iconio kaupak bik, dawak muih balna kidika kulninna wirlamumukna, kaput laih Pal yakat kipala kau babahrna, dawak ipapamna kulwi, murwi yakpapamna tawan nuhni kidika kaupak ahni yakat.

²⁰Kaunah kulyang balna kidika Pal yaihnit yakat uina, dawak yaklauwi watwi tawan yakat kiwi kana; dawak payahwak Bernabé karak mahka Derbe yakat uina.

²¹Derbe yakat, yul yamni kidika sumamalna, dawak muih manas bik kulyang kakalna, dawak nawatwi Listra yakat uina, Iconio yakat dawak Antioquía kat.

²²Kidika pāni balna yakat kulyang balna kidika baisa kulninna dulalauna, dawak bik sumamalna witingna kasak kukulwa kidika ban parasni duna atnin, kaput bik diyuyulna, Papang kingni lani yakat kanin laih kasak wauhnin ki, makulnik buknin kidika.

²³Dawak suts bitik yakat, muih bararak balna kidika tunan ahana, di kaswas dawak minitna yulwi dawi Dawan tingni yakat ahana, witing yakat kukulna kidika.

²⁴Pisidia sauni munah bayakwi Panfilia kat uina.

²⁵Dawak Perge pāni yakat bik sumamalna, kidika kaupak Atalia yakat uina;

²⁶kidika kaupak kuring kau kawi Antioquía yakat uina, kidika tawanni nuhni yakat Papang dalani lani duwa yakat atnin diyuyulna dai kidika, bahang kidika yakat laih wark kidika yamwi dadana dai.

²⁷Antioquía yakat uiwi suts kidika uduhwi diyuyulna, Papang amput witingna yakat yamna dai kidika, dawak amput Dawan witing dūr apahna kidika ju awas balna yakat bik, kaput laih witingna bik kulyang kalna atnin.

²⁸Pal dawak Bernabé karak ma mahni wawatna dai yakat, kulyang balna karak.