Read Mayangna Apastil Balna Warknina 15 Bible Online

Apastil Balna Warknina 15 - Mayangna bible

Apastil Balna Warknina 15

¹Kidika mani balna yakat, Judea kaupak Antioquía yakat uiwi sumamalna kulyang balna yakat, witingna sip laihwi yaknin kidika duduwas karang, Papang sainni kidika duduwaskat, Moses yaklauwi pakwak yayamwadai kaput.

²Pal, Bernabé dawak kidika muihni balna karak parasni kalbibilna, witni kat, Bernabé dawak ūk balna karak yayakna Jerusalén yakat uiwi adika yulni apostel dawak muihbararak balna karak yulbauwi talnin, kidika tawanni nuhni sutsni yakat.

³Antioquía sutsni yaklauwi disihna, bahang witingna laih Fenicia dawak Samaria munah bayakwi diyuyulna, amput ju awas balna kidika muhnilau kulninna dai kidika dawi Papang usnit uhuiwa kidika. Kulyang balna kidika kasak alasna kalalahna adika yulni dakakawi.

⁴Pal dawak Bernabé karak uiwi kakana Jerusalén yakat, dawak kidika sutsni balna yamni diduduna, apostel dawak muihbararak balna bik, dawak witingna yuyulna Papang yaklauwi ais yamna kidika witingna yakat.

⁵Kaunah parisi muihni balna buas kulyang kakalna dai kidika balna dai kidika, yaklauwi yuyulna: —Kulyang balna ju awas kidika laih Papang sainni dunin ki, kaput laih pakwak Moses lani kat yamnin.

⁶Kalududuhna apostel balna dawak muihbararak balna karak, adika yulni laihwi talna atnin.

⁷Wat yulbauwi tatalna usnit kat, Pita yaklauwi dawi, diyulna: —Wirah balna, manna amanglatamana, ma mahni kiwi Papang yawalwi yakna manna pasmangna kaupak, witing yulni kidika sumalna atnin ju awas balna yakat, kaput laih witingna bik kulna atnin.

⁸Dawak, Papang laih muih kulninna talwa bahang, niningnakana witingna kidika bik diduwa bahang Spirit Holi kidika witingna yakat diana, mayang kau mayana kapat.

⁹Papang yaklauwi satuk yamwas ki, mayang dawak witingna karak, witingna kulninna kidika maisihnidis yamna, kasak kukulwa kidika munah.

¹⁰Waralaih, ¿ais yamta Papang trainitalamanah, kulyang muihni balna minitna yakat tikini iltamana kidika, mayang dawak mamuihki bararak balna bik sip yayamwasdai kidika?

¹¹Nawatkauh laih, mayang kuldi, minitdis palni mailaihwi yakna, Dawan Jisas minikun talnin duwa kidika kau, bahang witingna bik sihm kaput ki.

¹²Bitik ap dawi dakakana Bernabé dawi Pal karak yuyulwak amput Papang sain balna yamna dai kidika witingna munah, ju balna awas pasyakat.

¹³Yulwi dahn dadawak, Jims yulna: —Wirah balna yadakanauh:

¹⁴Saiman maiyulwada, amput Papang yaklauwi yamni diyamna kidika ju balna awas yakat, dawak witingna pasyakat tawan as yakna witing dini.

¹⁵Prapit balna uhulna yakat kaiwi kalahwi, ulna yakat aput yulwa kidika:

¹⁶‘Kidika usnitkat aiwaki Devid ūni labanni bukkiuna kidika dulautik yamki; bahwi uhna kidika laihtik yamki dawak wattik laihtik dulauki,

¹⁷kaput laih muih ūk bik Dawan yakat walna atnin nisan balna bitik karak aslah yang diki yakna kidika ayangki kau.

¹⁸Dawan yaklauwi adika dini niningkana sara mani kaupak, witing yulni kidika dana.’

¹⁹“Kidika bahang yang kultayang, truknin dini awas kidika minitna yakat ilna atnin, Ju awas balna kidika, witingna kulninna umani kidik dawi Papang usnit uhuiwa kidika.

²⁰Wauhtaya ulwi sihnin kamanah ki, kasnin dini dawan dauh kau kalalana kidika kaupak naikau kalahnin, marid lani munah kalduduwas kidika, dawak tinglau dinimak wirwi bahna dawak waskau kakiwi dauna kidika balna bik kasnin awas, dawak ā bik kasnin awas ki.

²¹Kat sara mani kaupak, tawan balna bitik yakat Moses lani kidika sumamalna, dawak bik urupnin mani balna yakat yulwi tatalwi sumamalwa ūni yakat.

²²Apostel balna dawak muihbararak balna, suts bitik kalpakwi watwi yayakna muih as as Antioquía yakat sihna atnin, Pal dawak Bernabé balna karak libitwi. Judas kidika yayakna, ayangni ūk laih Barsabás kalatwadai, dawak Sailas, witing kidika laih kulyang balna pasyakat nuhni kalkukulna dai,

²³Witingna karak adika wauhnitaya sisihna: “Apostel balna yangna dawak muihbararak balna bik, yangna laih manna wirahmana balna yangna, bahang parasni manasihtayangna, Ju awasmana yakat, Antioquía, Siria dawak Cilicia yakat yalahtamana kidika.

²⁴Amanglanayangna, muih as as akaupak uina, yangna lawik paktasyangna bik, bahang witingna manauhusna sumamalwa balna kidika karak, dawak bik amanglatas ta disnamana.[11]

²⁵Kidika bahang, yangna bitik kulnikna aslah dutik muih yaknayangna, uiwi manatalna atnin, wirahkina dalani talayangna Pal dawak Bernabé karak kalpakwi,

²⁶bahang witingna kuduh sangninaka kidika yamadangni yakat ahana, Dawan Jisaskrais yulni.

²⁷Aput bahang sihdi Judas dawak Sailas bik: witingna yaklauwi lāih manayuyulwarang di bitik.

²⁸Spirit Holi niningyakat dawak yangna nikingna yakat bik yamni talnayangna, manna mamatna yakat tikini ūk ilnin awas, adika dini yayamni balna kaupak di ūk:

²⁹dawan dauh kau dimuihni kalalana balna kidika kakaswinih, ā, tinglau dinimak wir'bahna balna bik kakaswinih, kaput bik laih marid lani dutni kulna kidika yayamwinih. Adika dini balna yamtas awanama kat, manna laih yamni yamtanama. Parastanauh.”

³⁰Kaput laih witingna kidika kalparaswi dadawak mahka Antioquía yakat uina, dawak muih balna kidika uduhwi wauhtaya kidika yakwi diayana.

³¹Wirah balna kidika yulwi tatalna kat alasna kalalahna, walaniānin yamni as diayawa kidika yulni.

³²Judas dawak Sailas kidika balna bik prapit balna dai bahang, yulnina kau manas palni walanina ahana dai.

³³Ma as as bayakwak, wirah balna kidika diparaswi dadawak mahka kalahwi uina kulninna aslah, nawatwi uina disisihna muihni balna yakat.[12]

³⁵Kaunah Pal dawak Bernabé karak laih Antioquía yakat wawatna dai, muih ūk balna kidika karak, kaput laih Dawan yulni wisam kidika sumamalna.

³⁶Ma as as bayakwak, pal yaklauwi Bernabé yakat kalyulna: —Watdi mawi taldang wirah as balna yakat, tawan nunuhni bitik kau Dawan yulni sumalnamayang kidika balna yakat, ampat bangpa talnin.

³⁷Bernabé laih Jan bik duwi kiunin kulna, ayangni ūk laih Mark kalatwadai kidika;

³⁸kaunah Pal laih kulwasdai duwi kiunin, kat Mark kidika laih Panfilia yakat didamukna dai bahang, dawak witingna karak wark yamwasdana dai kidika yulni.

³⁹Parasni kalna dai, sip kulninna aslah kukulwas kidika, bahang kaldakwi kalalahna: Bernabé laih Mark kidika duwi kiuna Chipre yakat, kuring kau kawi,

⁴⁰dawak Pal laih, Sailas kidika duwi kiuna, wirah balna yakat Dawan dalani lani duwa kidika diawi dawi, kidika kaupak kalahwi kiuna

⁴¹dawak Siria, Cilicia kidika pāni balna munah bayakwi kiuna, kidika sutsni balna yakat kulninna dulauwi dawi.